Read Mitla Zapotec Hechos de los Apóstoles 6 Bible Online

Hechos de los Apóstoles 6 - Mitla Zapotec bible

Hechos de los Apóstoles 6

¹Neṉ redxejga, xhidalro gujc rexpejṉ Jesucrist. Niluxh gusloj camojm̲ rexpejṉ Jesucrist nani rnii didx griegw. Räjpreni: ―Xhet laadi cayujn rebejṉ ni rnii didx hebreo. Rebiuud nani rnii didx hebreo rca'ru loj rexpiuudnu. Rebiuud ni rnii didx hebreo rca'ru xhi gaureni che rguisreni xhi gau rebiuud guixe-guixee.

²Dxejcti batie' guitzubitio'p reapost guiraa rexpejṉ Jesucrist, räjpreni lo guiraareni: ―Et laadi guisaannu guluiinu xtidx Dios te quisnu xhi gau rebiuud.

³Ni'c nanab cuetu lo resa'tu gajtz niguii nani najntu najc beṉsa'c, nani rbäjz Sprit Dxan xten Dios neṉ lastooreni, nani yu' xcäriejnreni. Reniguiire quis xhi gaureni.

⁴Te si'c sajc chanuutis guiniabnu lo Dios, guiluiizanu xtidx Dios lo rebejṉ.

⁵Guiralii rebejṉga bidxaglajzreni diidxga. Dxejcti gulereni Esteban, te niguii ni rlilajzpac xtidx Dios, rbäjzza Sprit Dxan xten Dios neṉ lastooni. Gulezareni Felipe, Prócoro, Nicanor, Timón, Parmenas; gulezareni Nicolás nani siääd guedx Antioquía. Nicolás najc te proselite, nalajznu, dini gac xpejṉ Israel, per basoobni xleii toMoisés che gajdni chalilajz xtidx Jesucrist.

⁶Sas biädnä rexpejṉ Jesús guigajtz niguiiga lo reapost. Dxejcti guredx-gunab reapost lo Dios xcuent reniguiiga, batzuubreni ṉaareni yejc reniguiiga si'c te seen abiu'reni lo xtzuunreni.

⁷Birechduxh xtidx Dios. Xhidajl beṉ Jerusalén huililajz xtidx Dios, näjza xhidajl bixhojz. Gunaazreni Esteban sanärenini lo rebixhojz nani rnibee

⁸Gucnäduxh Dios Esteban, bejnni redzunro, remilagwr nez lo rebejṉ.

⁹Dxejc rebeṉ guidoo ni laa Libertados gusloj cadiḻnäj Esteban. Lojreni nadxaag beṉ Cirene, näjza beṉ Alejandría, näjza gaii beṉ Cilicia, näjza sgaii bejṉ ni siääd reguedx Asia.

¹⁰Reniguiire di niajcdi nuzejcreni diidx lo Esteban, sa'csi nasiṉduxhni, luxh cayacnäj Sprit Dxan xten Diosni.

¹¹Dxejcti baquiḻreni sgaii niguii ni di gac xpejṉ Jesús, te räjpreni: ―Biejn diaagnu caniyaj Esteban toMoisés näjza Dios.

¹²Scree gujc bache'chreni rebejṉ näjza rebejṉ ni ruluii leii näjza rebeṉgool. Dxejcti bachagsa'reni, gunaazreni Esteban. Huinärenini lo reguxhtis xten Israel.

¹³Dxejcti biädnäreni reniguii nani baquiḻreni te guniireni didx-xhii. Räjp reniguiire: ―Entis rniyaj Esteban leii xten toMoisés näjza guidodxanre.

¹⁴Abiejnza diaagnu gunii Esteban: “Jesús nazareno sutzujḻ guidoro, suchaazani leii nani baniidx toMoisés loonu.”

¹⁵Dxejcti guiraa rebejṉ ni sobga' ro'c bahuiireni lo Esteban, bahuiireni rujn lojni si'c rujn loj te angl xten Dios.