Read Mitla Zapotec 2 Corintios 6 Bible Online

2 Corintios 6 - Mitla Zapotec bible

2 Corintios 6

¹Ni'cni rniabnu lojtu, jia'cnu tejsi lo xtzun Dios, na'c cuälaztu xcäḻracnäj Dios; palga guntu si'c, xlia'si cua'tuni.

²Sa'csi loj xtidx Dios caj scree:Dxej nani riäjḻ gunäni, bacuadiagä xtiidxtu,dxej che gubicaj xtojḻtu gucnää́ la'tu.¡Coḻjiejn! N̲aj najc te tiempsa'c,coḻjiejnza, ṉaj najc dxej ni guibicaj xtojḻtu.

³Na'c jiennu nicla tej ni gun guidxe'ch lajz bejṉ, didi guiniireni xhet laadi najc xcäḻrusule'nu.

⁴Niluxh lo guira'ti dzuun ni riennu, guluilojnu lo rebejṉ najcnu xmos Dios; gacnu nadolajz; jiennu huant che rusacsíreni nuure; che rdejdnu trabajw; che di jieṉ xho jiennu;

⁵che rguijṉreni nuure; che rusäureni nuure neṉ latzguiib; che rdejdnu lo bieiduxh; che rdajl xtzuunnu; che re'ch bacaḻ yääl; che rucua'nnu;

⁶guluilojza najcnu xmos Dios xcuent xcäḻnabaṉsa'cnu lo Dios; näjza xcäḻnansa'c xtidx Diosnu; näjza yäḻrajc nadolajz; sa'csi laaca riennu lo sa'nu; näjza sa'csi rbäjz Sprit Dxan xten Dios neṉ lastoonu; näjza xcuent yäḻrinälajzpac bejṉ;

⁷näjza xcuent didxguliipac; näjza lo xcäḻrnibeduxh Dios; ca'zanu si'c te madxed xcäḻnaya Dios, ca'nuni guropṉaanu, ladbee, näjza ladbäjgw.

⁸Ruluilojzanu najcnu xmos Dios palga chä'p xpala'nnu, o palgaza jianxtujynu; palga guiniireni didxsa'c xcuentnu, o palgaza guiniyajreni nuunu; palga naareni najcnu beṉrusguee, mase najcnu bejṉ ni rnii didxlii.

⁹Palga rut rlajzdi gumbee nuunu, o palga guira'ti bejṉ numbee nuunu; acayejtnu, niluxh bahuii, anu anabajṉ; rusaan Dios rguijṉreni nuure, niluxh dinu guet;

¹⁰najcnu si'c bejṉ ni yu' xliajs, niluxh rbalaaznu; najcnu si'c bejṉ ni xhet rajpdi, luxh riennu gapduxh bejṉ; najcnu si'c bejṉ ni xhet rajpdi, niluxh rajpnu guiraloj.

¹¹Lojtu, beṉ Corinto, aguniliinu lojtu guiragajc rediidx ni yu' neṉ lastoonu.

¹²Xhetliidi diidxdi bacua'tznu lojtu, niluxh pet cacuatz lajztu diidx ni nanab guiniitu loonu.

¹³N̲aj narä rulidxä la'tu si'c rulijdx te Dad rexi'nni: ¡Coḻguinii loonu rediidx ni yu' neṉ lastootu! Najcnu si'c xquidoo Dios ni nabajṉ

¹⁴Na'c guchaagtu lo rebejṉ nani di chalilajz xtidx Dios, sa'csi di gacdi gunteblojtu dzuun sa'csi tejni rlajz gun dzunsa'c, steeni rlajz gunni dzunguijdx, ¿xho gac sanäj bajl xcäjy, ä?

¹⁵O ¿xho gac sanäj Jesucrist beṉdxab ni laa Satanás, ä? O ¿xho gac sanäj te bejṉ nani rililajz xtidx Dios te bejṉ ni di chalilajz xtidx Dios, ä?

¹⁶¿Xhixh tebloj najc xquidoo Dios con rebanäjb, ä? Ni nuunu najcnu xquidoo Dios ni nabajṉ, lagajc si'cni gunii Dios galoo:Cuäzä neṉ lastooreni, sisianää́zareni.Narä sacä Xtiosreni, laareni sajcreni rexpeṉä.

¹⁷Ni'cni coḻṟii galäiireni, coḻguibicaj lojreni, te laad coḻcuääz, si'c naj Dios:Te gac xca'ätu, na'c faḻtu recosdxuudx.

¹⁸Dxejc la'tu sajctu rexinganä, rexindxa'pä,luxh narä gacä xtadtu,si'c naj Gueb Dios ni rajp guiralii yäḻrnibee.