Read Mitla Zapotec 1 Tesalonicenses 5 Bible Online

1 Tesalonicenses 5 - Mitla Zapotec bible

1 Tesalonicenses 5

¹Niluxh xcuent redxejga, reijzga, xhet riquiinditu gucuaäni lojtu,

²sa'csi la'tu anansa'ctu sidzujṉ dxej ni jiääd Jesucrist cheni rut cayunlojdini, sigajc che riääd te gubaan yääl.

³Che canii bejṉ: “laaca dxunnu, dxunsa'cnu”, chela gacbeereni acadejdreni trabajw si'c che rdzujṉ yäḻnayan te gunaa che rajl xi'nni, luxh digacdi guxuṉreni lojni.

⁴Niluxh bejtznu, di gac nayäältu te di che xhet cayunlojditu dxej xten Jesucrist, guidzuṉxhiga'tz dxejga si'c gubaan.

⁵Sa'csi guiraatu najctu beṉsa'c nabajṉtu lo bianij, lo rdxee, dinu gac beṉguijdx, dinu guibajṉ lo yääl, lo yäḻrcäjy.

⁶Ni'cni di nungäjḻ guidiesnu si'c rejs stecuaa bejṉ, ni'cni nungäjḻ sunasiṉnu na'cza jiennu redojḻ ni rlajz tiejxhnu.

⁷Reni rejs, rejsreni yääl, reni rsiojz, rsiojzreni yääl.

⁸Niluxh nuure nabajṉnu lo rdxee, ni'cni nanab na'c jiennu si'c, riäjḻ xca'nu yäḻrililajz näjza yäḻrinälajz si'c rca' soldaad gamangw guiib ni rajcwni, ni rusäuu lastooni. Riäjḻza guiläzdzu'tznu sa'csi yäḻrusḻaa lo dojḻ najc si'c xhumbrel-guiib ni ru' yejc soldaad ni rusäuu yejcni.

⁹Sa'csi di Dios nibe nuurnu te chonnu gabijl, alga guleni nuurnu te xca'nu yäḻnabajṉ ni rudeed xi'nni, Jesucrist.

¹⁰Sa'csi gujt Jesucrist lacuaa nuurnu, te guibaṉnäjnuni masä nabajṉnu lo guedxliujre o nagayejsnu neṉ baa che guibi'ni.

¹¹Ni'cni, coḻguspaa lajz sa'tu, tejtu sigajcza steetu, sigajcni cayujntu ṉaj. Rulijdx Pabl resa'ni

¹²Bejtznu, rniabduxhnu lojtu, coḻhuiduxh reni ruluii xtidx Dios lojtu, sa'csi agule'c Dadreni te guinibeereni, te gulijdxreni la'tu.

¹³Riäjḻza chanälazduxhtureni xcuent dzuun ni rujnreni. Coḻcuedxi con resa'tu.

¹⁴Rulijdxnu la'tu, bejtznu, coḻgulijdx reni najc beṉlatsiaj; coḻsudzu'tz lajz reni guxii rbalajz lo xnez Dios; coḻgacnäj reni di gumbesa'c xtidx Dios, coḻcuecdxi lajz guiraasi bejṉ.

¹⁵Coḻhuii di chu tejtu gunza doḻguijdx lo rebejṉ ni rujn doḻguijdx. Laaca guntu ganax dzunsa'c lo sa'tu, sigajcza lo chutis bejṉ.

¹⁶Coḻguibalajztis guideb nabajṉtu.

¹⁷Na'c cuääz guiniitu lo Dios.

¹⁸Mase xhitis rsiajctu, coḻdeed xquixtios lo Dios, sa'csi si'c rlajz Dios gun reni rililajz Jesucrist.

¹⁹Di cuälaztu xtidx Sprit Dxan xten Dios ni rniini neṉ lastootu.

²⁰Na'c cuälaztu xtidx reni rnii xtidx Dios xcuent nani churu gac.

²¹Coḻquiil guiraa rediidx, coḻjiannäjtis rediidx ni najc didxsa'c.

²²Coḻbicaj lo guiralii doḻguijdx.

²³Lagajc Dios, Dios ni rbecdxi lajztu, gusiapac lastootu, te cucheeni xaimtu, näj lastootu, näjza tiejxhtu, te na'c guntu dojḻ ni di riäjḻ guntu te cuääztu dxej ni guibisac Dad Jesucrist.

²⁴Dad ni gurejdx la'tu rujnza guiraa ni rniini, ni'c sujnzani guiraa redzuunre. Ruzadiidxnireni

²⁵Bejtznu, coḻnab lo Dios xcuent nuurnu.

²⁶Coḻgudeed xtixtios lo rebejtznu ni yu' ro'c.

²⁷Con laj Dad Jesucrist rnibeä, goḻtu guijtzre loj guiraa rebejtznu.

²⁸Gacnäj Dad Jesucrist la'tu. Sugacni si'c.