Read Mitla Zapotec 1 Timoteo 3 Bible Online

1 Timoteo 3 - Mitla Zapotec bible

1 Timoteo 3

¹Dee najc didx gulii: palga rlajz te niguii ga'p dzuun xten Dios, gusule'ni xtidx Dios, guinibeeni rebejṉ, te dzunsa'c najc ni rlajzni gunni.

²Ni'cni, ni rlajz gac nani rnibee, riäjḻ guibaṉsa'cni te na'c chu xhicuent guiniyaj rebejṉni. Riäjḻ gacni chääl tejtis gunaa, riäjḻ susiṉni, gacni te beṉsa'c, cuedxini, te guibaṉsa'cni. Riäjḻza di gudxojnni rolijzni guidzujṉ bejṉ, nägajc riäjḻ gacni te bejṉ ni nansa'c te guluiini.

³Na'c gacni te beṉgu, nicla te ni rdxagdijḻ bejṉ, na'cza gacni te nani rsia' lajzni ga'pni xhidajl meel, riäjḻ cuedxi lajzni, na'c chanälajzni meel.

⁴Riäjḻ guinibesa'cni rolijzni, saru gunni te gusoob rexi'nni xtiidxni.

⁵Sa'csi palga di te bejṉ gan xho guinibeeni lagajc rolijzni, aticaxh gac ga'pni guidoo xten Dios.

⁶Di riäjḻ guinibee te beṉcoob nani entis huililajz, te di guschä'pni xpala'nni sas jiajbni lo lagajc xcäḻṉaj Dios ni biajb beṉdxab.

⁷Luxh riäjḻza guinii reni di chalilajz xtidx Dios laaca najcni, te na'c jianxtujyni, te na'cza jiajbni ladzṉaa beṉdxab. Xho riäjḻ gac reni rcanäj neṉ guidoo

⁸Si'cza rediaconos riäjḻ gacreni bejṉ ni yu' xcäriejnreni, nanab gunreni si'cpac ni rniireni, na'cza soozreni, na'c xca'reni meel ni direni niunsa'c gaan.

⁹Riäjḻ gapdzu'tzni rediidx nagajn xten yäḻrililajz, ni'c nanab gac naya lastooreni.

¹⁰Riäjḻ fixgaatu xho nabajṉreni. Palga nabaṉsa'creni, rutza gacdi gucuaquijdireni, sajc gacreni diacono.

¹¹Regunaa ni rlajz gac diaconas riäjḻza chu xcäriejnreni, na'c güireni diidx ni di guchaag, na'c soozreni, gacreni gunasa'c, cuedxireni, gunreni si'cpac ni rniireni lo guira'ti dzuun.

¹²Riäjḻ gac rediacono chääl tejtis gunaa. Riäjḻ guinibesa'cni rexi'nni näj guiraa reni yu' rolijzni.

¹³Sa'csi rediaconos ni runsa'c xtzuunni, sanälajz bejṉreni, dizareni guidxejb rsiudzu'tz lastooreni lo xcäḻrililajz xtidx Jesucrist. Gurobduxh najc yäḻxhiga'tz xten Jesucrist

¹⁴Cacuaä diidxre lojlu, niluxh rlazä jiädhuigaä la'tu.

¹⁵Luxh palga gaclaä, anajnlu xho riäjḻ guibajṉ bejṉ rolijz Dios, nalajznu xquidoo Gueb Dios ni nabajṉ par tejpas. Guidoore rniasdzu'tz näjza ruluiiru didxlii xten Dios.

¹⁶Rdxeloyaduxh guiralii bejṉ yäḻxhiga'tz xten xcäḻnajn Dios:Dios biääd lo guedxliuj si'c te beṉguedxliuj,Sprit Dxan xten Dios gunii beṉdxanni;bahuii rexangl Dios lojni;basule'reni xtiidxni lo rebejṉ ni di gac xpejṉ Israel;guira lajt huililajz bejṉ xtiidxni;huäjsni lo xcäḻrdimbicha' Dios xhaguibaa.