Read Mitla Zapotec Tito 3 Bible Online

Tito 3 - Mitla Zapotec bible

Tito 3

¹Basnaj lajz rebejṉ gusoobreni xtiidx rebejṉ ni rnibee näjza reguxhtis, gusoobreni xtiidxreni, xcäjbzareni gunreni xhitis dzunsa'c.

²Na'c guiniyajreni bejṉ, cuedxireni, gaczareni bensa'c, saru gac nadolajzreni loj chutis bejṉ.

³Sa'csi galoo sigajcza xheti xcäriejnnu, dizanu gusoob xtidx Dios; basguee bejṉ nuurnu, yu'tisnu lo guiraasi doḻguijdx näjza lo ni rchaglajztis rujn tiejxhnu, nabajṉtisnu lo doḻguijdx, rudxonlajznu, rdxe'ch bejṉ loonu, rdxe'chzanu lo sa'nu.

⁴Niluxh che baluiloj xcäḻrulaslajz näjza xcäḻrinälajz Dios ni rusḻaa nuurnu näjza rebeṉ guedxliuj lo dojḻ,

⁵dxejc basḻaa Dios nuurnu lo dojḻ, xhet sa'csi yu'di xhi dzunsa'c biennu, alga sa'csi balaslajzni nuurnu. Basḻaa Dios nuurnu lo dojḻ sa'csi bidiib lastoonu, te biäjt xtojḻnu te najcnu beṉcoob, sa'csi bascoobza Xsprit Dxan xten Dios xcäriejnnu.

⁶Baniidx Dios cuääzpac Xsprit Dxanni neṉ lastoonu xcuent ni bejn Jesucrist ni basḻaa nuurnu,

⁷te sa'csi rujn Dios cuent najcnu beṉsa'c sa'csi abadzucajni xtojḻnu, ṉaj sica'nu xcäḻnasa'cnu ni cabääznu, nalaaznu yäḻnabajṉ par tejpas.

⁸Dee ni najc guliipac, ni'cni rlazä chanuutislu guiniilu rediidxre loj rebejṉ, te rebejṉ ni rililajz xtidx Dios gunduxhreni ganax dzunsa'c. Rediidxre najc laaca, sacduxhreni loonu.

⁹N̲aj basaan rediidx ni najc xlia'si, rediidx ni gunii rebeṉ galoo, yäḻrdiḻdiidx xcuent xleii toMoisés sa'csi guiraa rebiejyga xhet sajcdini, xhetza huendi rujnreni.

¹⁰Palga yu' te bejṉ ni gun la' sa' rebeṉ guidoo, gunii lojni tej o tio'p huält. Palga dini jiejn, coḻcuääni lojtu.

¹¹Sa'csi anajntu sa' bejṉga abaṟo'nni, agulälazni didxlii, lagajc xtojḻni sujn nitni. Diidx ni bacuaani lojtis Tito

¹²Che guxhaḻä Artemas o Tíquico lojlu, gudahuiipac narä lo guedx Nicópolis. Ro'c abenä xhigab tedä rebäinajḻ.

¹³Gucnäduxh licenciaad Zenas näjza Apolos, badeed guiraa ni rquiinreni te chanuureni xpiajreni, te xhet jiäädxdireni.

¹⁴Suguisieedza resa'nu gunreni dzunsa'c te gacnäjreni che guiquiinnureni, te na'c guibajṉreni xlia'si. Ruxhaḻni xtixtios

¹⁵Guiraa reni yunäj narä ruxhaḻ xtixtios lojlu. Badeedza xtixtios loj resa'nu lo yäḻrililajz. Dios gacnäj guiraatu. Sugacni si'c.