Read Mitla Zapotec Santiago 1 Bible Online

Santiago 1 - Mitla Zapotec bible

Santiago 1

¹Narä Santiaag, xmos Dios näjza xten Dad Jesucrist, ruxhaḻä xtixtios loj guitzubitio'p cuaa rexpejṉ Israel ni nare'ch lo guedxliujre. Yäḻnajn nani runiidx Dios loonu

²Rebetzä lo xtidx Dios, coḻguibalazduxhtis che rsiajctu recos nani ruquiiltu cuälaztu xnezyuj Dios,

³sa'csi che rsiajctu reni'c, rsiajctureni te don la guliipac ahuililajztu xtidx Dios, dxejc rsieedrutu yäḻrbecdxi lajz.

⁴Dxejcti yäḻrbecdxilajz sajc gunni xtzuunni neṉ lastootu, te gactu beṉsa'c, bejṉ ni aguyajl lo xtidx Dios, nani xhet cayäädxdi xcäḻnajnni.

⁵Palga yu' tejtu ni cayäädx xcäḻnajnni, suguiniabnini lo Dios, sa'csi Dios rudeedduxhni yäḻnajn loj guira'ti bejṉ, luxh dini guinii didxlaa lojni. Palga guiniab bejṉni, sudeedza Diosni.

⁶Niluxh che guiniabni, suchalilajzpacni, na'c guntio'p lajzni, sa'csi bejṉ ni runtio'p lajzni najc si'c bäj ni sanä bej, nezree-nezre'c sääbni.

⁷Nani najc si'c, na'c gunni xhigab yu' xhi xca'ni lo Dad Jesucrist.

⁸Sa'csi nani runtio'p lajzni, lo guiraa ni rujnni nadxej rujnni tej xhigab, guixee rujnni xte'ca xhigab, di gacdi chanuuni tejsi xhigab.

⁹Te sa'nu ni najc nadolajz, suguibalajzni sa'csi najcni beṉro sa'csi guläs Diosni,

¹⁰sigajcza bejtznu ni yu' xhixtenni, suguibalajzni sa'csi abaluii Dios lojni najcni bejṉ ni xhet sajcdini, sa'csi nägajc laani sinitlojni si'c rnitloj reguii ni yu' lo cuaan ni yu' loniaa.

¹¹Sa'csi che rliejn gubijdz näjza te belaa, li rgoḻ recuaanga, li riuii reguii ni caj lojni, dxejc rtejbreni, dxejcti agunijt xcäḻsacruni. Si'cza sinitloj te bejṉ ni yuduxh xhixtenni laḻ ni yu'ni lo xnezyujni. Xhi xca'ni che tedni trabajw

¹²Chicbaa niguii ni rsiudzu'tz laḻ ni cadejdni trabajw, sa'csi che agunii Dios didxsa'c xcuent nani bejnni sica'ni coroṉ xten yäḻnabajṉ par tejpas ni bia'n Dios diidx gudeedni loj rebejṉ ni sanälajz Dios.

¹³Che gunijt tejtu, rujntu dojḻ, na'c gäbtu: “Dios bejn banitä”, sa'csi di gacdi quiquiil Dios te gunni cosguijdx, digacdi gunijt Dios, luxh sigajcza di gacdi gun Dios gunijt te bejṉ, gunni dojḻ.

¹⁴Niluxh tejgatu runijt che rcäjy xcäriejntu sa'csi riajb yejctu guntu cosguijdx.

¹⁵Che riajb yejctu guntu cosguijdx, runijttu rujntu dojḻ, luxh dojḻ che abejntuni, riädnäni yäḻgujt.

¹⁶Sa'ä ni sanälazä, na'c gusaantu gusgueereni la'tu.

¹⁷Guiraa recoshueen, guiraa recossa'c xhaguibaali siäädreni loonu; Dios ruxhaḻreni, lagajc Dios ni benchee rebajl xhaguibaa, Dios nani di guchaa, sigajctis najcni.

¹⁸Lagajc xcuentni bejn Dios gacnu xpejṉni sa'csi huililajznu xtidxliipacni, te gacnu rebeṉ galoo loj rexpejṉni. Xho nanab jiennu

¹⁹Acanajntu recosre, sa'ä ni sanälazä. Niluxh tejgatu nanab gusquejṉni te gucuadiajgni, per gaclaani te guiniini, gaclaazani te guidxe'chni,

²⁰sa'csi xcäḻrdxe'ch bejṉ dini gun xcäḻnasa'c Dios.

²¹Ni'cni coḻcuälaz guiraa recosguijdx, guiraa recoslatsiaj ni ria'n. Guideb yäḻnadolajz coḻchalilajz xtidx Dios ni basule'nu, ni yu'pac lastootu, sa'csi ni'c najc ni sajc gusḻaa xaimtu lo dojḻ.

²²Niluxh baluii lo guira'ti bejṉ najctu bejṉ ni rusoobpactu xtidx Dios, xhet bejṉdi ni rucuadiajgtis xtiidxni, ni rusgueeni lagajc laani.

²³Sa'csi palga najc te bejṉ te nani rucuadiajgtis xtidx Dios, niluxh dini gusoob diidxga, najcni si'c te bejṉ ni ruhuii lojni loj te guihuajn.

²⁴Sa'csi che ruhuiini xho najcni, sägajcni, riaḻlazgajcni xho najcni.

²⁵Niluxh nani ruhuidzu'tz lo leisa'c, nalajznu leii nani rusḻaa bejṉ, luxh rusobpacni leiiga, nani lacuaa jiaḻlajzni nani riejn diajgni, rujnpacni ni caj lo leiiga, bejṉga najc ni sajp yäḻrbalajzpac lo xhitis ni rujnni.

²⁶Palga yu' tejtu ni rujn xhigab najcni te bejṉ ni raṉduxh Dios, niluxh di gacdi gusäuni ro'ni, guiraloj rniini, bejṉga rusguee lagajc laani, luxh xhet sajcdi yäḻrajṉ Dios xtenni.

²⁷Yäḻrajṉ Dios ni najc guliipac, ni xhet nu'chdi lojni najc scree: chahuiini rebisiäjb, näjza regunaa ni agujt chäälni che yu' xhi rquiinreni, näjza na'c säblajztu guntu nani rujn rebeṉ guedxliuj ni di chalilajz xtidx Dios.