Read Mitla Zapotec 1 Pedro 5 Bible Online

1 Pedro 5 - Mitla Zapotec bible

1 Pedro 5

¹Narä nacä te beṉgool, bahuiä trabajw ni gudejd Jesucrist, bahuiäza xcäḻrdimbicha' Jesucrist ni guniidxni loonu che guibisacni lo guedxliujre. Ni'cni rulidxä la'tu ni najc rebeṉgool,

²coḻgajp renani rililajz xtidx Dios nani rajptu fiipactu xhi rujnreni. Coḻga'preni si'c te bejṉ ni rajp xiil, coḻyejnni guideb yejc, guideb lajztu. Coḻyejn si'c sa'csi si'c rlajz Dios guntu, na'c gunlojtu meel. Coḻguibalajz cayajptu rexpejṉ Dios.

³Na'c guinibeetu lojreni si'c rnibee te lam̲ loj reni rujn xtzuunni, coḻguluiireni xho gunreni con xcäḻnabaṉsa'clu.

⁴Che guibisac Jesucrist, ni rajp nuure, laani suniidxni xcuentnu, te yäḻnasacduxh nani dipac nitloj.

⁵Sigajcza la'tu ni najc bi'n, coḻgusobdiajg xtidx rebeṉgool. Guiraatu coḻjiu xtidx sa'tu, coḻguluii sa'tu guideb nadolajz. Sa'csi:Dios rbälaz rebejṉ ni runnaro lagajc laareni,niluxh racnäjni rebejṉ ni najc nadolajz.

⁶Ni'cni guideb yäḻnadolajz coḻjiu lo Dios sa'csi rajpni yäḻrnibeduxh, te guiliä'pni xpala'ntu che gaḻ dxej ni guibisacni.

⁷Coḻgudeed guiraa reyärsia' ni yu' lastootu lo Jesucrist te guscuecdxini xcäriejntu sa'csi laani sanälajzni la'tu.

⁸Coḻgusanij xcäriejntu, coḻsusiṉ sa'csi rdxe'ch beṉdxab lojtu, cansaxhiga'tzni si'c te beedz nialajz, caguiilni chu guxhiṉni.

⁹Coḻsudzu'tz nez lojni, guideb lastootu coḻchalilajz xtidx Dios, sa'csi anajntu sigajcza cayunnäjni guiraa rebetznu ni nabajṉ lo guedxliujre.

¹⁰Che agudejdtu trabajw tiop-choṉ dxej, Dios nani rajp guiraa yäḻracnäj, nani gurejdx la'tu te näjza la'tu xca'tu xcaḻrdimbicha'ni xcuent lagajc Jesucrist, lagajc laani sunsa'cni la'tu, bejṉ ni rsiudzu'tz lo xtiidxni, bejṉ ni nadip lajzni, bejṉ ni di guidxejb.

¹¹Laani rajpni yäḻrnibeduxh par tejpas, guiliä'pnu xpala'nni par tejpas. Sugacni si'c.

¹²Siädnä Silvan guijtzre lojtu. Runä xhigab najcni te bejṉ nani huililazsa'c xtidx Dios. Abacuaä bale'si diidxre lojtu te gulidxä la'tu, te guiniliä lojtu dee najc xcäḻracnäjpac Dios. Coḻsudzu'tz xcuent yäḻracnäjre.

¹³Rexpejṉ Dios ni re' lo guedx Babilonia ruxhaḻ xtixtios lojtu sa'csi gule Dios la'tu sigajc guleni laareni. Marcw, ni najc si'c xi'nä, ruxhaḻza xtixtios lojtu.

¹⁴Coḻguinii “xchan” lo tejga sa'tu ro'c. Rniabä lo Dios guscuecdxini lastoo guiraatu ni rililajz xtidx Crist.