Read Mitla Zapotec Apocalipsis (de Juan) 11 Bible Online

Apocalipsis (de Juan) 11 - Mitla Zapotec bible

Apocalipsis (de Juan) 11

¹Dxejcti baniidxni loä si'c te biquii nani rurejxh. Dxejc guyu' chu naj loä: ―Huisu te charejxhlu xquidoo Dios, näjza piändxan, balabza balti bejṉ rusuxhijb neṉga.

²Na'c gutiexhlu gabi lole' guidooga, sa'csi ni'c acua' rebeṉzijtni te tiubitio'p bäii chaläjsreni guedxdxan si'ctis ni rlajzreni.

³Narä sudedä yäḻrnibee lo tio'p dade' ni guinii diidx xcuentä, luxh guideb najcwreni ladyas, susule'reni xtidxä lojreni te miḻ tio'pgayuu gayojṉ dxej.

⁴Guiro'preni najc si'c tio'p yag oliib, si'c tio'p gandilieer ni suga' nez lo Dios.

⁵Palga yu' chu bejṉ rlajz gun latsiaj loj redade'ga, sirii bajl ro'reni te chec nani rdxe'ch lojreni. Luxh si'cpac riäjḻ guet chutis ni rlajz gun latsiajreni.

⁶Guiro'p redade'ga rajp yäḻrnibee te gusäureni xhaguibaa te na'c jiajb nisguij guideb neṉ redxej nani cagusule'reni xtidx Dios, rajpzareni yäḻrnibee te guchaareni nis te gacni rejn, rajpzareni yäḻrnibee te jiädgusacsí xhitis plaag lo guedxliuj, si'ctis huält ni rlajzreni.

⁷Che luux gusule'reni xtidx Dios, dxejcti ni najc si'c te man nialajz sirii gabijl te jiädchagdijḻni guiro'preni. Sujnni gaanreni, sugu'tnireni.

⁸Dxejcti jia'n guiro'p rebeṉgutga lad caii xten guejdx cadro bacuaareni Dad Jesucrist lo crujz. Guejdxroga rbälajzareni Sodoma näjza Egipto.

⁹Choṉ dxej garol guiraa rebejṉ ni siääd guedxbäz, ni siääd guedxro, ni najc garen-garen ṟaz, ni rnii garen-garen xtidx guiraa rebejṉ guedxliuj, suhuii loj guiro'p rebeṉgutga, direni gusaan guiga'tzreni neṉ baa.

¹⁰Guiraa renani nabajṉ lo guedxliujre sibalazduxhreni sa'csi gujtreni. Luxh sa'csi rbalajzduxhreni, suxhaḻzareni xhi xca' sa'reni; sa'csi guiro'p redade' ni basule' xtidx Dios baxhaḻ trabajwduxh lojreni.

¹¹Che gudejd choṉ dxej garolga, baspaṉsac Diosreni, dxejcti huitiesacreni. Guiraa reni bahuii lojreni, bidxebduxhreni.

¹²Dxejcti biejn diajg guiro'preni xse' te ni canii dipduxh desde xhaguibaali, räjpni lojreni: ―Coḻchä'p jiaare. Dxejcti huä'preni xhaguibaa lo te za, luxh guiraa renani rdxe'ch lojreni, bahuiireni huä'preni xhaguibaa.

¹³Lagajc oṟga gujc te xuduxh, gurebä'n tej lo tzuu la' guejdxga, gujt gajdz miḻ bejṉ lo xu ni gujc ro'c. Rebejṉ ni bia'n ro'c bidxebduxhreni, guslojreni calä'preni xpala'n Dios ni yu' xhaguibaa.

¹⁴Si'cti gulujx ni rojp casioon, luxh agojl guidzujṉ ni riojṉga. Ni rajc gajdz xangl Dios goḻ trompe't

¹⁵Che biḻ ni rajc gajdz xangl Dios trompe't ni ca'ni, dxejc biejn xse' reni dipduxh canii xhaguibaa, cayäjpreni:Xcäḻrnibee guedxliuj agudejd ladzṉaa Dad Dios näjza Jesucrist;luxh laani sinibeeni par tejpas.

¹⁶Gaḻbitajp rebeṉgool nani sobga' lo troṉ xtenreni cadro rnibee Dios, biabrlojreni nez loj Dios te calä'preni xpala'n Dios.

¹⁷Räjpreni:Xquixtioste Guejblu Dios, nani rajp yäḻrnibeduxh,nani najclu, nani gujclu, nani churu gac,sa'csi acua'lu xcäḻrnibeduxhlu te agusloj canibeelu.

¹⁸Bidxe'ch rebeṉ guedxliuj lojlu,luxh abidzujṉ dxej guidxe'chlu lojreni,gunlu yäḻguxhtis rebeṉgut, te gudeedlu cossa'c loj rexpejṉlu,lo renani gunii xtidx Dios, lo renani huililajz xtiidxlu, lo renani rusuxhijbni nez lojlu;rebeṉproob sigajc rebeṉro.Abidzujṉza dxej che cuäcajlu renani bejn daan guedxliujre,te nitlojreni par tejpas.

¹⁹Dxejc bixal xquidoo Dios ni yu' xhaguibaa, neṉ guidooga bieṉ te guijn cadro yu' guij cadro caj rediidx ni bia'n Dios loj rexpejṉ Israel. Dxejcti lacti bidinya', lacti guiniiza reguziro, gujc te xu, dxejc biajb te guixobroduxh.