Read Mitla Zapotec Apocalipsis (de Juan) 19 Bible Online

Apocalipsis (de Juan) 19 - Mitla Zapotec bible

Apocalipsis (de Juan) 19

¹Che gulujx recosre, biejn diagä lascanu xse' xhidalro bejṉ ni canii xhaguibaa, cayäjpreni:¡Coḻguiliä'p xpala'n Dios!Xtentis Dios, xtenni najc yäḻrusḻaa lo dojḻ,näj yäḻrdimbicha', näj yäḻmilagwr.

²Sa'csi xcäḻguxhtisni najc ganax laaca,huentis najcni, sa'csi abejnni yäḻguxhtis gunadxabga nani caguxhiṉ rebeṉ guedxliuj xcuent xcäḻnadxabni.Abejn Dios yäḻguxhtisni,agudijxhni xcuent xtiejn rexpejṉ Dios ni baxhe' gunadxabga, che bagu'tnireni.

³Guibi' guniizareni: ―¡Coḻguiliä'p xpala'n Dios! Gujxh xten gunadxabga sanuutis cayä'p par tejpas.

⁴Guiraa regalbitajp rebeṉgool näjza guidap remanbajṉga bazuxhijbreni, biabrlojreni gojṉreni Dios ni rbej lo troṉ cadro rnibeeni, caniireni: ―Sugacni si'c. ¡Coḻguiliä'p Xpala'n Dios!

⁵Dxejcti nez lo troṉ cadro rnibee Dios biejn xse' tej ni canii:Coḻgudeed xquixtios lo Dios,guira'tu ni rujn xtzuun Dios,guira'tu ni rajṉtu Dios, rebeṉro sigajc rebeṉnadolajz. Sa' xten Xiil xten Dios

⁶Dxejcti biejn diagä ascanu xse' xhidalduxh bejṉ, riejnni si'c che cayäjt nisro xhidajl gueu, näjza si'c che caguidxaduxh guzii, caniireni:¡Coḻguiliä'p xpala'n Dios!Sa'csi Gueb Dios, Dad xtennu ni rajp guiralii yälṟnibee, ani acanibee.

⁷Guibalajznu, guibalazduxhnu, guiliä'pnu xpala'nni sa'csi abidzujṉ dxej guchṉaa Xiil xten Dios, aguzucheeza dxa'p.

⁸Abadeedreni ladliṉ ni najc nuiduxh gacwni.Ladnolni, luxh rdimbicha'ni sa'csi nayadujni.Ladnayare säloj redzunsa'c ni bejn rexpejṉ Dios.

⁹Najza anglga loä: ―Bacuaa diidxre: “Chicbaa renani bidoṉ jiääd lo xsa' Xiil xten Dios.” Guniizani loä, najni: ―Rediidxre najc didx-guliipac xten Dios.

¹⁰Dxejcti bazuxhibä lojni te gaṉäni, dxejc laani najni loä: ―Na'c gunlu si'c, sa'csi narä nacä sigajc najclu, nacä te ni rujn xtzuun Dios, näjza bejtzlu ni rusule' xtidx Jesucrist. Bazuxhijb lo Diostis sa'csi Dios rudeed gusule' bejṉ xcuent Jesucrist, gusule'zareni xtidx Dios. Nani bijb te cabainol

¹¹Dxejcti bahuiä bixal xhaguibaa, biricaj te cabainol. Luxh laj nani rbijbni säloj casobsa'cpacni diidx, rniizani ganax didxgulii. Entis laaca rujnni yäḻguxhtis, entis laaca rucuaani che rujnni gueṟ.

¹²Rebalojni rbebajl, yejcni yu' xhidalduxh coroṉ, luxh caj te laj lojni nani rutliidi racbee, luxh laatisni racbeeni xhi sälojni.

¹³Najcwni te lajd ni nadiini rejn; lajni najcza Xtidx Dios.

¹⁴Guiraa resoldaad guibaa xten Dios siädnajlni najcwreni ladnol, ladnaya, bijbzareni cabainol.

¹⁵Ro'ni carii te spaad ni caduxh guiro'p laad ro'ni te ni'c tiḻnäjni guiralii reguejdx lo guedxliuj, te guinibeeni guiraa rebeṉ guedxliuj ca'ni si'c te barguiib. Sujnzani yäḻguxhtis loj reni rdxechlajz lo Dios, si'c ruläjreni yec uub che rbääreni bin, si'c sujnza Dios ni rajp guiralii yäḻrnibee.

¹⁶Lo xhajbni näjza cuä' cujdni caj lajni: “Reii xten reṟeii, Dad xten redad.”

¹⁷Bahuiä loj te angl suga'ni galäii gubijdx, cabedxa'ni caniini loj guiraa reman ni rutajt xhaguibaa, räjpni: ―Coḻtaa, coḻguire' ree, te gautu xcheroduxh xten Dios;

¹⁸te gautu xpääl reṟeii, näjza xpääl recapitán, näjza xpääl rebeṉro, näjza xpääl recabaii, näjza xpääl renani rbijb recabaii, näjza xpääl guiraasi bejṉ, bejṉ ni rdo' si'c rdo' guidxaa sigajc rebejṉ ni di gun xtzuun bejṉ, rebeṉbäz sigajc rebeṉro.

¹⁹Dxejcti bahuiä loj manro näjza loj reṟeii guedxliuj, abire'reni te gucuanäjreni nani rbijb cabainol näjza guiraa resoldaad xtenni.

²⁰Biga' manroga näjza profetxhii ni bejn senro nez loj manroga te basgueeni guiraa renani cua' seen xten manroga, näjza renani bazuxhijb lo banäjb xten manroga. Guiro'p redee bacuaareni guideb nabajṉreni neṉ te bal guiboduxh ni recnäj sufr.

²¹Dxejc guiraa reni bia'n bagu't spaad ni birii ro' ni bijb cabainol. Guiraa reman xhaguibaa gudajw xpäälreni.