Read Mixtec Mateo 14 Bible Online

Mateo 14 - Mixtec bible

Mateo 14

¹Te tiempo yúcuan te Herodes, tēe ndácu jniñu región Galilea, ni jini jnūhun de jnūhun Jesús.

²Te ni cahān de jíín ñáyuu cáhīin jíín de: Tēe yúcuan cúu Juan tēe ni scuándute, te ni natecu de. Jeē yúcuan íyó poder de sáha de jniñu jéhnu. Achí de.

³Chi Herodes, je ni ndacu de jniñu jeē na quɨ́vɨ Juan vecāa, jíín jéē na cónuhnī de jíín cadena. Súcuan ni sáha de jeē sɨquɨ́ Herodías, ñasɨhɨ́ ñani de Felipe.

⁴Chi Juan ni cahān de nuū Herodes: Tu íyó ley condeca ró ña, áchí de.

⁵Te jeē yúcuan ní cuni Herodes cahni de Juan. Te yúhú de jeē quɨtɨ̄ ni ñayuu, chi ndɨhɨ i jéni ndije ni i jeē ɨɨn tēe nácani jnūhun Yaā Dios cúu Juan.

⁶Te ɨɨn quɨvɨ̄ ni sáha Herodes ɨɨn vico quɨvɨ̄ ní cacu de. Te sēhe sɨ́hɨ́ Herodías ni quɨ̄vɨ i ni jita jéhé i nuū ñáyuu ní cana de ún. Te ni cusɨɨ̄ ni Herodes ni sáha i.

⁷Te ni jejnūhun téyɨ́ de jeē cuáha de núu na vé cacān i nuū de.

⁸Te ni jehēn i ni cajnūhún i náná i na vé cacān i. Te ni ndɨ̄vɨ i nuū Herodes, te ni cahān i: Cuāha ní xínī Juan tēe scuándute, cone nuū ɨɨn cohō, achí i.

⁹Yūcuán na te rey Herodes ni cucuíhyá ni de. Te sɨquɨ̄ jeē ni jéjnūhun téyɨ́ de, jíín jéē ní cajini sōho tēe cáyeji staā jiín de, jeē yúcuan ní ndacu de jniñu jeē na cuáha nuū i.

¹⁰Te ni tají de soldado jeē na quícahnde xinī Juan ini vecāa.

¹¹Te ni quee soldado un jíín xínī Juan, íne nuū ɨɨn cohō, te ni jēhe nuū súchi sɨ́hɨ́ un. Te máá i ni jendeca i nuū naná i.

¹²Yūcuán na te ni jengoo tēe cáscuáha jíín Juan, te ni candonehen de yɨquɨ cúñu Juan, te ni cachindūji de. Yūcuán na te ni jengoo de ni cacastūhún de nuū Jesús. Jeē ni scáji yā uhūn mil tēe (Mr. 6.30‑44; Lc. 9.10‑17; Jn. 6.1‑14)

¹³Te ná ni jini Jesús jnūhun, te ni cujiyo ya yūcuan cuáhān yā jiín barco, jeē cóne sɨ́ɨn ya ɨɨn lugar nuū tú ñayuu. Te ni cajini ñayuu jeē cuahán yā. Te tācá ñuu ni quendacoo i cájica jéhé i, cuajnahan i ya.

¹⁴Te nuū ní quenda Jesús ini barco, te ni jito ya ñayuu cuehē ún. Te ni cundáhú ni yā i, te ni nasávāha ya tāca ñáyuu cácuhū jeē véjicoo i jíín.

¹⁵Te nuū ní ini, te tēe cáscuáha jíín yá, ni quecoo de nuū yā, te ni cacahān de: Je ni ini, te yāhá chi tú na ñayuu yúcu. Núu súcuan te tají ní ñayuu na quíngoo i tācá ñuu, te cuaan i jeē cáji i.

¹⁶Te ni cahān Jesús jiín de: Tu jíni ñúhún quíngoo i, chi cuāha máá ró jeē cáji i, áchí yá.

¹⁷Te ni cacahān de jíín yá: Tú na vé cánevāha ná yáha, chi uhūn‑ni staā jiín úū‑ni chācá, áchí de.

¹⁸Te ni cahān yā jiín de: Cuāha na quíji, áchí yá.

¹⁹Te ni cahān yā jiín ñáyuu un jéē na cúcōo i nuū íte. Te ni quihin ya ndɨhúhún staā jiín úū chācá un. Te ni ndacoto ya ichi ándɨvɨ́, te ni nacuatáhú yá. Te ni tahú cuéchí yá staā ún, te ni jēhe ya nuū tée cáscuáha jíín yá. Te máá de ni casaja de nuū ñáyuu cuehē ún.

²⁰Te ndɨvii i ni cayeji, te ni candutú chíji i. Te ni canastútú de pedazo jeē ní quendōo, te ni chitú úxī uū jīca.

²¹Te tēe ni cayeji un cúu nájnūhun uhūn mil, te sɨ́ɨn ga cúu ñahan jíín súchi lúlí. Jeē ní jica jéhé yá nuū mar (Mr. 6.45‑52; Jn. 6.16‑21)

²²Yūcuán na te ni cahān‑ni Jesús jiín tée cáscuáha jíín yá jeē na quɨ́vɨcoo de barco, te cosnūú de quingoo de nde ɨnga lado mar, níní jéē nátají yá ñayuu un quínungoo i.

²³Te nuū ní cuu ni nacuatáhú yá nuū i, te máñúhún‑ni ya ni caa ya yucu, cuacacān tahú yā. Te ni cuaa, te íne máñúhún yá yūcuán.

²⁴Te barco un, je ni cuu sava nuū mar cuahān. Te ndute mar un nátundahá níhin barco, chi vēji tachī ichi núú de.

²⁵Te jeē yɨ́nee gā ni quee Jesús nuū de, jíca jéhé yá nuū mar.

²⁶Te tēe cáscuáha ún, ni cajito de ya jeē jíca ya nuū mar. Te ni candondava de, te ni cacana cóhó de jeē cáyūhú de. Jíhná cúu, áchí de.

²⁷Te ni cahān‑ni Jesús jiín de: Ndeyɨ́ coo ni rō, te ma yūhu ró, chi máá rí cúu, áchí yá.

²⁸Yūcuán na te ni cahān Pedro jiín yá: Núu máá ní cúu, te cahān ni jíín ná jéē na cáca jéhé ná nuū mar te jeē na núū ní, áchí de.

²⁹Te ni cahān yā: Nehen núu súcuan, áchí yá. Te ni quenda Pedro ini barco, te ni jica de nuū ndúte cuahān de nuū Jesús.

³⁰Te nuū ní jini de jeē níhin yɨ́hɨ tachī, te ni yūhú de. Te ni quejéé de quée de chīji ndute. Te ni cana cóhó de: Jnama ní sáña, áchí de.

³¹Te Jesús ni jnɨɨ‑ni ya ndaha de. Te ni cahān yā jiín de: Tēe tu cándíje nīhin cúu ró. ¿Naun ni nayūhu ró? Achí yá.

³²Te ni quɨ̄vɨ ya ini barco un jíín de, te ni jecuɨñɨ̄‑ni tachī.

³³Yūcuán na te tēe cáhīin ini barco un, ni cajecuɨñɨ̄ yɨtɨ́ de nuū yā. Te ni cacahān de: Jendaá ndije jeē Sēhe Yaā Dios cúu ní, áchí de. Jeē ní nasávāha ya ñayuu cácuhū región Genesaret (Mr. 6.53‑56)

³⁴Te ni quenda jíyo ya jiín de nuū mar un, ní jinū yā región Genesaret.

³⁵Te ñayuu yūcuan ní canacuni i ya. Te ni cascáca i jnūhun tācá ndañúū yūcuan jéē ni jínū yā. Te ñayuu ni caquindeca i ñayuu cácuhū nuū yā.

³⁶Te ni cacahān ndahú i jíín yá jeē na quéhé i vēsú yusáhma ya. Te tāca ñáyuu jeē ní caquehé sahma ya, ni canduvāha i. Sɨquɨ̄ ndese cújnéhén ñáyuu (Mr. 7.1‑23)