Read Mixtec Mateo 15 Bible Online

Mateo 15 - Mixtec bible

Mateo 15

¹Yūcuán na te jecu tēe grupo fariseo jiín tée cástéén tutu ley Yaā Dios, ni quendacoo de ñuu Jerusalén, te ni quecoo de nuū yā. Te ni cacahān de jíín yá:

²Tēe cáscuáha jíín ró, ¿naun cástɨ́vɨ de costumbre jeē ní cajequin ñayuu jenahán? Chi tu ní cásquícu de costumbre jeē nándahá de nuū yā te caji de staā. Achí de.

³Te Jesús ni cajnūhun yá de: Te máá ró jijnáhan ró, ¿suni naun cástɨ́vɨ ró jniñu ní ndacu Yaā Dios nuū rō? Chi sa costumbre maá ró cúu jeē casquícu ró.

⁴Chi ni cahān Yaā Dios: Coo yɨ́ñúhún ró jiín tátá rō jiín náná rō. Te núu ndé ɨɨn cahān sɨquɨ̄ tatá chí sɨ́quɨ̄ naná, na cúū nahín, áchí Yaā Dios.

⁵Te máá ró chi cácahān rō jeē cuu cahān ɨɨn tēe jíín tátá de jíín náná de: Ma cúu chindéé ñáhán ná níhín cuáha na jéē cáji ni jéē cúhun ní, chi ndɨhɨ jeē névāha ná, je ni socō na núū Yaā Dios.

⁶Te tēe cahān súcuan, tuá cánuú chindéé ñáhán de tátá de náná de, áchí ró jijnáhan ró. Te súcuan cástɨ́vɨ ró jniñu ní ndacu Yaā Dios, jeē sɨquɨ́ costumbre ni cajequin máá ró.

⁷Tēe stáhú‑ni cácuu ró. Ndaā ni nacani Isaías jnūhun sɨquɨ̄ rō nde jenahán, yósó núū tútu iī jeē ni cáhān Yaā Dios:

⁸Ñayuu yáha chi máá yuhu‑ni i cájetáhú i ruhū,te nasūu ndé jiín ini jiín ánuá i.

⁹Te cáchiñúhún sáá‑ni i ruhū,chi jnūhun cástéén i cúu jniñu ní candacu tēe,te nasūu jéē ní ndacu máá rí cúu. Achí Yaā Dios. Achí yá.

¹⁰Te ni cana ya ñayuu cuehē ún, te ni cahān yā jiín i: Cuni sōho vāha jíjnáhan ró, te chuhun ni rō:

¹¹Nasūu jéē quɨ́vɨ ini yuhu ñayuu cujnéhén i sáha. Chi jnūhun jeē quénda yuhu i, yūcuan cúu jeē cujnéhén i sáha, áchí yá.

¹²Yūcuán na te tēe cáscuáha jíín yá, ni quecoo de nuū yā, te ni cacahān de: ¿A jíní ni jéē ní caquɨtɨ̄ ni tēe fariseo jeē ní cajini sōho de jnūhun ni cahān ní? áchí de.

¹³Te ni cahān maá yá: Cácuu de nájnūhun yujnu jeē tu ní náchuhun Tátá rī, Yaā ndeé andɨvɨ́, te ɨɨn quɨvɨ̄ te jnuhun ya quihīn.

¹⁴Na quíngoo máá de. Chi cácuu de nájnūhun tēe cuáá cástéén ichi nuū ɨnga tēe cuáá. Chi núu ɨɨn tēe cuáá stéén de ichi nuū ɨnga tēe cuáá, te ndɨndúú de nɨnga de xehvā. Achí yá.

¹⁵Te ni cahān Pedro jiín yá: Castūhun cájí ní jnúhun yátá yáha nuū na jíjnáhan ná, áchí de.

¹⁶Te ni cahān Jesús: ¿Te á suni máá ró ná tu jecūhun ni rō chí naún?

¹⁷¿A tu cájecūhun ni rō jeē tāca jéē yéji ñayuu, chi quɨ́vɨ chīji i, te quénda‑ni cuahān?

¹⁸Te jnūhun jeē quénda yuhu ñayuu, chi nde ini anuá i vēji, te yūcuan cúu jeē cujnéhén i sáha.

¹⁹Chi nde ini anuá ñayuu quénda jeē jéni néé ni, jeē jéhni ndɨ̄yɨ, jeē casɨ́quɨ́ ndéē jnáhan, jeē jíca jnéní, jeē sacuíhná, jeē cahán jnūhun stáhú, jeē cahán yāa sɨ́quɨ̄ jnáhan.

²⁰Tāca jéē yáha cúu jeē cujnéhén ñayuu sáha. Te núu tu squícu i costumbre jeē nándahá i te caji i staā, tu cúnéhén i sáha. Achí yá. Ñahan ɨnga nación jeē ní candíje nīhin (Mr. 7.24‑30)

²¹Te ni quenda Jesús yūcuan cuáhān yā región Tiro jiín Sidón.

²²Te ɨɨn ñahan ñuu Canaán, néne ña región Tiro jiín Sidón, te ni quee ña nuū Jesús. Te ni cana jee ña: Tátā, Sēhe yucūn David, cundáhú ni ni sáña víī. Chi sēhe sɨ́hɨ́ ná, ñúhun tachī ini i, te yōhyo xeēn ndóho i, áchí ña jíín yá.

²³Te tu ní cáhán cuɨtɨ yā jeē ni cáhān ña. Yūcuán na te ni quecoo tēe cáscuáha jíín yá, te ni cacahān de: Cahān ni jíín ña na quíhín ña, chi cána jee ña vēji ña yatā yō, achí de.

²⁴Te ni cahān yā jiín ña: Nuū maá‑ni ñayuu nación Israel ni tají Yaā Dios sāña véji ná, chi cácuu i nájnūhun lanchi, quɨtɨ ní sana.

²⁵Te ñahan ún chi ni quee ña, te ni jecuɨñɨ̄ yɨ̄tɨ́ ña nuū yā, te ni cahān ña: Tátā, chindéé ñáhán ní sáña víī, achí ña.

²⁶Te ni cahān yatá yá jiín ña: Tu íyó váha jeē quénde yō staā sēhe, te cuāha yó núū ína, achí yá.

²⁷Te ni cahān ña: Jendaá cahán ni Tátā, te chindéé ñáhán ní sáña vēsú cúu ná nájnūhun ina. Chi suni máá tɨ́ cánihīn nahín tɨ́ pedazo staā cuechí jéē cóyo chīji mesa jitoho tɨ̄ cáyeji tɨ̄, achí ña jíín yá.

²⁸Yūcuán na te ni cahān Jesús: Yōhyo vāha jeē cándíje nīhin ní súcuan, nánā. Te na sáha ná jéē cuní ni, áchí yá. Te máá hora un ní nduvāha‑ni sēhe sɨ́hɨ́ ña. Jeē ní nasávāha ya cuehē ñayuu cácuhū

²⁹Te ni quenda Jesús cuahān yā yūcuán, te ni yāha ya yumar Galilea. Te ni caa ya ɨɨn yucu, te yūcuan ní cucōo ya.

³⁰Te cuehē ñayuu ni quecoo i nuū yā, te cándeca i tāca jéē cájica chácuá, jeē cuaá, jeē ñɨhɨ́n, jeē cacúhndú, jíín cuéhē gā ñayuu cácuhū. Te ni cajequin i nuū jehé Jesús. Te ni nasávāha ya i jíjnáhan i.

³¹Te ni canaa ni ñayuu un cájito i jeē nácahān ñayuu ñɨhɨ́n, ndúvāha ñayuu cuhndú, nácaca vāha ñayuu chacuá, nánune tɨnūu ñáyuu cuaá. Te ni cacahān i jeē yóhyo vāha Yaā cúu Yaā Dios ñuu i Israel. Jeē ni scáji yā cuūn mil tēe (Mr. 8.1‑10)

³²Yūcuán na te ni cana Jesús tēe cáscuáha jíín yá, te ni cahān yā jiín de: Cúndáhú ni rī ñayuu cuehē yāhá, chi je ni cuu unī quɨvɨ̄ cáyūcú i jíín rí, te tuá na vé caji i. Te tu cúní rī natají rí i nuhun ndite i, chi núu súcuan te sava ichi te cuīta íī i. Achí yá.

³³Te ni cacahān tēe cáscuáha jíín yá: ¿Te ndé nuū nihín yō staā caji ñayuu cuehē yāhá? Chi yāhá tú na ñayuu yúcu, achí de.

³⁴Te ni cajnūhun yá de: ¿Nasaa staā cánevāha ró? Te ni cacahān de: Uxā‑ni, jíín jecu chācá lúlí, áchí de.

³⁵Yūcuán na te ni cahān yā jiín ñáyuu cuehē un jéē na cúcōo i.

³⁶Te ni quihin ya ndɨhúxá staā jiín cháca ún, te ni nacuatáhú yá nuū Yaā Dios. Te ni tahú cuéchí yá, te ni jēhe ya nuū tée cáscuáha jíín yá, te máá de ni casaja nuū ñáyuu.

³⁷Te ndɨhɨ i ni cayeji, te ni candutú chíji i. Yūcuán na te ni canastútú de pedazo jeē ní quendōo, te ni chitú úxā jīca.

³⁸Te tēe ni cayeji ún, nde cuūn mil de cúu, te sɨ́ɨn ga cúu ñahan jíín súchi lúlí.

³⁹Yūcuán na te ni nacuatáhú yá nuū ñáyuu ún, te cuanungoo i. Te ni ndɨ̄vɨ ya ini barco, te cuahān yā región Magdala. Jeē cájicān de ɨɨn jniñu jéhnu nuū yā (Mr. 8.11‑13; Lc. 12.54‑56)