Read Mixtec Marcos 5 Bible Online

Marcos 5 - Mixtec bible

Marcos 5

¹Te ni jinū Jesús jiín de jíjnáhan de ɨnga lado mar, región Gadara.

²Te ná ni quenda ya ini barco un, te ɨɨn tēe ñúhun tachī ini, ni quenda de nde nuū yɨ́ndūji ndɨ̄yɨ, te ni quee de nuū yā.

³Tēe un ndéé de nuū yɨ́ndūji ndɨ̄yɨ. Te tu jéjníñu jeē jíhni ñayuu de, ni jíín cadena.

⁴Chi cuehē jínu ni conuhnī jehē de ndaha de jíín cadena. Te tāca jínu jéhnde de, te sácuéchí de. Te tú ni ɨɨn cúndeyɨ́ jíín de.

⁵Te nduú ñuú jíca de yucu jíín núū yɨ́ndūji ndɨ̄yɨ, te cána cóhó de, te stújí de máá de jíín yúū.

⁶Te náa jícá gá vēji Jesús, te ni jito de ya. Te jínu de ni quee de nuū yā, te ni jecuɨñɨ̄ yɨtɨ́ de nuū yā.

⁷Te ni cana cóhó de: ¿Naun vēji ní núū ná, Jesús Sēhe Yaā Dios, Yaā cujéhnu téyɨ́? Cáhán ndahú ná jíín ní, jíni nahín Yaā Dios, ma stóho ní sáña, áchí de.

⁸Súcuan ni cahān de, chi je ni cahān Jesús: Táchī, quenda ini tēe yáha quíhīn rō.

⁹Te ni cajnūhun yá de: ¿Na vé naní ró? Te ni cahān de: Legión naní ná, chi cuehē tachī ñúhun ini ná, áchí de.

¹⁰Te ni cahān ndahú ndasɨ́ de jíín yá jeē ma tájí yá tachī quendacoo región ún.

¹¹Te yajni yucu yúcuan cáhīin cuehē quɨnɨ̄ cájitu tɨ.

¹²Te tachī jeē ñúhun ini tēe un ní cacahān ndahú jíín yá: Núu tají ní sāñá, te cuāha ní jnúhun quɨ̄vɨcoo ná ini quɨnɨ̄ yūcuán, áchí.

¹³Te Jesús ni jēhe ya jnūhun. Te ni quendacoo tachī ún ini tēe ún, te ni quɨ̄vɨcoo ini quɨnɨ̄, te íyó nájnūhun uū mil tɨ̄. Te quɨnɨ̄ un ní cajinu tɨ ni nɨngoo tɨ ɨɨn yucáva, ni quɨ̄vɨcoo tɨ nuū mar. Te ni ndaquɨ̄hɨ tɨ ndute, ni cajihī tɨ̄.

¹⁴Te tēe cándito tɨ, ni cajinu de cuangoo de jeē ní cayūhú de. Te ni jinūcoo de ni cacastūhún de nuū ñáyuu ñuu un jíín ñáyuu tāca rancho. Te cuangoo ñayuu un cuácondēhé i na vé ni cuu.

¹⁵Te ni jinūcoo i nuū íne Jesús, te ni cajito i nuū tée ni ñuhun cuehē tachī ini. Te néne de, te ñúhun de sahma, te je ni nducájí xínī de. Te ni cayūhú ñáyuu ún.

¹⁶Te tēe ní cajito, ni canacani de jnūhun nuū ñáyuu, ndese ni nduvāha tēe ni ñuhun tachī ini, jiín ndese ni candoho quɨnɨ̄ ún.

¹⁷Yūcuán na te ni caquejéé i cácahān ndahú i jíín yá jeē na cújiyo ya región yūcuan quíhīn yā.

¹⁸Te ni ndɨ̄vɨ ya ini barco. Te tēe ni ñuhun tachī ini un ní cahān ndahú de jíín yá jeē na cuáha ya jnūhun quihīn de jíín yá.

¹⁹Te Jesús tu ní jéhe ya jnūhun, chi ni cahān yā jiín de: Cuánuhun vehe ró núū jnáhan ró, te nacani ró jnúhun nuū i ndese yōhyo jéhnu jniñu ni sáha máá Jítoho rō jiín ró, te ndese ni cundáhú ni yā rohó, áchí yá.

²⁰Te ni quenda de cuahān de, te ni quejéé de nácani de jnūhun tācá ñuu Decápolis ndese yōhyo jéhnu jniñu ni sáha Jesús jiín de. Te ndɨvii ñayuu un ní canaa ni i cájini nahín i. Jnūhun sēhe sɨ́hɨ́ Jairo jiín ñahan ní quehé yusáhma ya (Mt. 9.18‑26; Lc. 8.40‑56)

²¹Te ni nayāha tucu Jesús cuanuhun yā ɨnga lado mar jiín barco. Te ni quecoo cuehē ñayuu nuū yā, nuū íne ya yumar.

²²Te ni quee ɨɨn tēe cújéhnu ini vehe iī sinagoga, naní de Jairo. Te ná ni jito de nuū yā, te ni jecuɨñɨ̄ yɨtɨ́ de nuū jehé yā.

²³Te ni cahān ndahú ndasɨ́ de jíín yá: Sēhe sɨ́hɨ́ ná je yajni cuu i. Na quíhín yō vehe ná te soó ní ndaha ní sɨ́quɨ̄ i návāha na ndúvāha i te cotecu i, áchí de.

²⁴Yūcuán na te cuahān yā jiín de. Te cuehē ñayuu cándiquīn i ya, te ni chitú níhin i xiin ya cuangoo i.

²⁵Te mēhñu ñáyuu un cuáhān ɨɨn ñahan cúhú, jeē ní cuu uxī uū cuiyā ndóho ña cuehyɨ̄ nɨñɨ̄.

²⁶Te yōhyo ni ndoho ña, chi ni jexin ña tāca jéē névāha ña jíín cuéhē tēe tájná, te tu ní jéjníñu jeē ndúvāha ña, chi sa suhva víhyá gā sáha.

²⁷Te ñahan yáha ná ni nihīn ña jnūhun Jesús, te ni quee ña ichi yátá yā mēhñu ñáyuu cuehē ún, te ni quehé ña yusáhma ya.

²⁸Chi ni jeni ni ña: Vēsú maá sahma ya na níhín rī quehé rí, te nduvāha ri, jéni ni ña.

²⁹Te ni jecuɨñɨ̄‑ni nɨñɨ̄ ña, te ni jini ña jeē ní nduvāha ña cuehyɨ̄ ún.

³⁰Te Jesús ni jini yā jeē ní nduvāha ɨɨn ñayuu jiín fuerza yā. Te ni ndió cóto ya nuū ñáyuu cuehē, te ni cahān yā: ¿Ndé ɨɨn ni quehé sahma ri? Achí yá.

³¹Te tēe cáscuáha jíín yá, ni cacahān de: Jíto ní jéē ñáyuu cuehē yāha ní chitú níhin i xiin ní te cáquɨ̄hɨ i níhín nɨ́ɨ́ cáni ichi, te cájnūhun ní ndé ɨɨn ni quehé sahma ní.

³²Te máá yá jíto ya cháha chúcuan, cúní yā jeē na cáchi ñayuu ni sáha.

³³Te ñahan un yúhú ña te quɨ́sɨ i ña, te je jíní ña jeē ní nduvāha ña. Te ni quee ña, te ni jecuɨñɨ̄ yɨtɨ́ ña nuū yā, te ni cachi ña ndɨhɨ ndese ni cuu jíín ña.

³⁴Te ni cahān yā jiín ña: Séhē, ni candíje ró jéē cuu nasávāha ri rohó, te jeē yúcuan ní nduvāha ró. Cuáhán te na ndúsɨɨ̄ ni rō, chi je ni nduvāha ró cuéhyɨ̄ ní ndoho ró, áchí yá.

³⁵Te níní cáhán gā yā súcuan, te ni quecoo ñayuu cáyūcú vehe tēe cújéhnu ini vehe iī sinagoga, te ni cacahān i jíín de: Je ni jihī sēhe sɨ́hɨ́ ní. Te ma sajnéñu ga ní Maestro, achí i.

³⁶Te Jesús tu ní sáha ya cuenta jeē súcuan cácahān i, te ni cahān yā jiín tée cújéhnu ini vehe iī sinagoga: Ma yūhu ró, chi candíje ró jéē nastécu rī i, áchí yá.

³⁷Te tu ní jéhe ga yā jnūhun condiquīn ñayuu yā, chi máá‑ni Pedro jiín Jacobo, jiín Juan ñani Jacobo.

³⁸Te ni jinū yā vehe tēe cújéhnu ini vehe iī sinagoga, te ni jito ya ñayuu, cácuvaā i, te cándahyū i, te cácana cóhó i.

³⁹Te ni quɨ̄vɨ ya, te ni cahān yā: ¿Najehē yōhyo cásávaā rō te cándahyū rō? Sūchi sɨ́hɨ́ yáha, tu ní jíhí i, chi quíxí‑ni i, áchí yá.

⁴⁰Te ni cajecū catá i jeē ni cáhān yā. Te ni quenehen ndɨhɨ ya i cuahān i nuū quéhe. Te ni cana ya máá‑ni tátá jiín náná sūchi sɨ́hɨ́ un, jíín tée cáhīin jíín yá, te ni quɨ̄vɨ ya jiín de nuū catú súchi sɨ́hɨ́ ní jihī ún.

⁴¹Te ni jnɨɨ ya ndaha i, te ni cahān yā jiín i: Talita cumi, achí yá. Te jnūhun un cúní cahān: Sɨ́hɨ̄, cáhán rī jiín ró, ndocuɨñɨ̄, achí yá.

⁴²Te ni ndocuɨñɨ̄‑ni sūchi sɨ́hɨ́ un, te ni nacaca i, chi je íyó i uxī uū cuiyā. Te yōhyo ni canaa ni ñayuu cájito i.

⁴³Te ni ndacu nīhin ya jniñu nuū i jíjnáhan i jeē ma cáchi cuɨtɨ i nuū ni ɨɨn. Te ni cahān yā jeē na cuáha ña jeē cáji sūchi sɨ́hɨ́. Jeē cuánuhun yā ñuu Nazaret (Mt. 13.53‑58; Lc. 4.16‑30)