Read Mixtec Lucas 20 Bible Online

Lucas 20 - Mixtec bible

Lucas 20

¹Te ɨɨn quɨvɨ̄ steén yā jnūhun nuū ñáyuu ini templo, te nácani ya jnūhun jeē jnáma Yaā Dios ñayuu. Te ni quecoo sutū cácujéhnu jíín tée cástéén tutu ley Yaā Dios jiín táca tée jéhnu cándacu jniñu.

²Te ni cacahān de: Castūhún, ¿ndé ní nihīn jníñu ró jéē sáha ró jniñu yáha? ¿Te ndé ɨɨn ni tee jniñu sɨquɨ̄ rō jeē sáha ró súcuan? Achí de.

³Te ni cahān Jesús jiín de: Suni ruhū cajnūhun rí rohó ɨɨn jnūhun jíjnáhan ró. Castūhun núū rī:

⁴¿Ndé ɨɨn ni tee jniñu sɨquɨ̄ Juan jeē ni scuándute de? ¿A Yaā Dios chí táca tée? Achí yá.

⁵Yūcuán na te ni candajnūhun máá de: ¿Ndese cahān yō? Núu cahān yō jeē Yaā Dios ni tee ya jniñu un sɨ́quɨ̄ Juan, te cahān de jíín yó: ¿Najehē tu ní cácandíje ró de núu súcuan?

⁶Te núu cahān yō jeē ñáyuu ni catee jniñu un sɨ́quɨ̄ de, te ndɨvii ñayuu cahni i yóhó jíín yúū, chi cácandíje i jeē tée ni nacani jnūhun Yaā Dios ni cuu ndije Juan, achí de cácahān maá de.

⁷Te ni cacahān de jeē tu cájini de ndé ɨɨn ni tee jniñu sɨquɨ̄ Juan jeē ni scuándute de.

⁸Yūcuán na te ni cahān Jesús: Ni ruhū, suni ma cáchi rī nuū rō ndé ɨɨn ni tee jniñu sɨquɨ̄ rī sáha ri jniñu yáha, áchí yá. Jnūhun yátá sɨ́quɨ̄ tēe néé cásájniñu nuū uva (Mt. 21.33‑44; Mr. 12.1‑11)

⁹Te ni quejéé Jesús cahán yā jnūhun yátá yáha jíín ñáyuu ún: Ɨɨn tēe ni nachuhun de cuehē uva nuū ñúhun de. Te ni stóo de nuū sava tēe sájniñu nuū, te cuu sava de ndehē jiín. Te ni tee de ichi jeē cuahān nahán de ɨnga ñuu.

¹⁰Te máá tiempo ndutútú uva, te ni tají de ɨɨn mozo cuahān nuū tée cásájniñu ún, návāha naquihin de sava ndehē uva un. Te tēe un ní cacani de mozo, te ni canatají de i cuanuhun i súcuan‑ni.

¹¹Te tēe chíí uva ni tají tucu de ɨnga mozo cuahān. Te tēe cásájniñu ún, suni ni cacahān ndevāha de nuū i, te ni cacani de i, te ni canatají de i cuanuhun i súcuan‑ni.

¹²Te tēe chíí uva ni tají tucu de ɨnga mozo cuahān. Te tēe cásájniñu ún, suni ni castújí de mozo un, te ni cascúnu de i.

¹³’Yūcuán na te ni cahān tēe chíí uva: ¿Ndese sáha ri? Na tájí rí sēhe ri jeē maní rī jiín, chi sanaa te núu ni cajito de i te coo yɨ́ñúhún de nuū i. Achí de.

¹⁴Te tēe cásájniñu ún, ná ni cajito de jeē véji i, te ni cacahān de: Tēe chíí táhū cúu jeē véji ún. Na cáhni yō de, te ndōo tahū de cuu máá yó, achí.

¹⁵Te ni caquenehen de i ɨnga lado, te ni cajehni de i, áchí yá. Te ni cajnūhun yá de: Núu súcuan ¿te ndese sáha tēe chíí uva jiín tée cásájniñu ún?

¹⁶Ndiji de te cahni de tēe un jíjnáhan, te cuāha de ñuhun cáá uva un núū ɨnga sava tēe sájniñu nuū, achí yá. Te jeē ní cajini ñayuu jnūhun yáha, te ni cacahān i: Aī, núu ma cóo cuɨtɨ súcuan víī, achí i.

¹⁷Te ndéhé yá nuū i jíjnáhan i, te ni cahān yā: Núu súcuan ¿te á cájecūhun ni rō jnūhun yáha jéē yosó núū tútu iī jeē cúu ri nájnūhun ɨɨn yuū? Chi áchí tutu:Yuū jeē ní casquéhichī tēe cájeni vehe,yuū yáha nduu jeē quítuu vehe. Achí.

¹⁸Te ñayuu tu cácandíje, ndoho i nájnūhun ndóho ñayuu jeē cotúú sɨquɨ̄ yuú te jnáhnú i. Te quɨvɨ̄ sándaā Yaā Dios cuēchi, te ñayuu tu cácandíje, ndoho i nájnūhun ndóho ñayuu jeē nɨ́nga yuū sɨquɨ̄ i te cundihī i sáha. Achí yá. Sɨquɨ̄ xúhun renta (Mt. 21.45‑46; 22.15‑22; Mr. 12.12‑17)

¹⁹Yūcuán na te sutū cácujéhnu jíín tée cástéén tutu ley Yaā Dios, ni cacuni de jnɨɨ de ya maá hora un. Chi ni cajecūhun ni de jeē sɨquɨ̄ maá de cúu jnūhun yátá ní cahān yā sɨquɨ̄ tée cásájniñu nuū uva jiín tée cájeni vehe. Te tu ní cúu, chi cáyūhú de jeē quɨtɨ̄ ni ñayuu.

²⁰Yūcuán na te ni catají de jecu tēe cuacoto yuhu de ya, te tēe un cásáha‑ni de jeē tée ndaā cácuu de. Te cánducú de sáha de jeē cahán yā ɨɨn jnūhun jeē nihín de cuēchi sɨquɨ̄ yā, te quindeca de ya nuū tēe cúu gobernador.

²¹Te ni cacahān de: Maestro, cájini na jéē cahán vāha ní, te stéén ndaā ní. Te tu sáha ní cuenta ndese cúu ɨɨn ɨɨn ñayuu, chi ɨnuú‑ni sáha ní jíín i. Te stéén ndaā ní ndese squícu ñayuu nuū Yaā Dios.

²²Núu súcuan te cachi ní: ¿A íyó váha jeē chúnaa yō renta nuū rey nación Roma jeē jnɨ́ɨ nación yō, chí tuú? áchí de.

²³Te ni jini yā jeē cácuni de stáhú de ya, te ni cahān yā jiín de: ¿Najehē cájito ndee rō ruhū?

²⁴Stéén ɨɨn xūhún na cóto ri. ¿Ndé ɨɨn nuū cúu jeē ndeé nuū xúhun yáha, te ndé sɨ́hvɨ́ cúu jeē ndeé yāhá? áchí yá. Te ni cacahān de jíín yá: Nuū jiín sɨ́hvɨ́ rey un cúu, áchí de.

²⁵Yūcuán na te ni cahān yā jiín de: Núu súcuan te nacuāha ró núū rey un jéē yɨ́hɨ cuenta nuū de, te nacuāha ró núū Yaā Dios tāca jéē yɨ́hɨ cuenta nuū maá yá, achí yá.

²⁶Te tāca tée ún tu ní cúu nihīn de cuēchi sɨquɨ̄ yā jiín ni ɨɨn jnūhun cáhán yā, cájito jínúū ñayuu. Chi sa ni canaa ni de jeē ndichí ní stió cuɨ́ñɨ́ yā jnūhun nuū de, te tuá na vé ni cácahān de. Jeē ní cacajnūhún de sɨquɨ̄ jeē nátecu ndɨ̄yɨ (Mt. 22.23‑33; Mr. 12.18‑27)

²⁷Yūcuán na te jecu tēe grupo saduceo ni quecoo de nuū yā. Te tēe un cácahān jeē tu nátecu cuɨtɨ ndɨ̄yɨ. Te ni cacahān de jíín yá:

²⁸Maestro, Moisés ni tee de nuū tútu jeē cánevāha yó: Núu ɨɨn tēe cuu de, te ndōo ñasɨhɨ́ de, te núu tu ní íyo sēhe de jíín ña, núu súcuan te cánuú jeē ñani de naquihin ñasɨhɨ́ de, te sēhe de jeē cácu jíín ña nucuɨñɨ̄ i nuū ndɨ́yɨ ñani de, áchí tutu.

²⁹Núu súcuan te ni īyo uxā ñani. Te tēe núú ní quijnáhan de jíín ñahan. Te ni jihī de, te tú sēhe de ní íyo.

³⁰Te tēe uū ni naquihin de ña, te suni ni jihī de, te tú na sēhe de ní íyo.

³¹Te tēe unī ni naquihin de ña. Te suni súcuan ndɨhúxá de ni condeca de ña, te ni cajihī ndɨhɨ de, te ni ɨɨn de tú sēhe de ní íyo.

³²Te jeē sándɨ̄hɨ́ te suni ni jihī ñahan ún.

³³Núu súcuan te núu na nátecu de jíjnáhan de quɨvɨ̄ nátecu ndɨ̄yɨ, ¿te ndé ɨɨn de cuu ña ñasɨhɨ́ de? Chi ndɨhúxá de ni condeca de ña. Achí de jíjnáhan de.

³⁴Yūcuán na te ni cahān yā jiín de: Ñayɨ̄vɨ yáha chi cáquijnáhan tēe jíín ñahan.

³⁵Te ñayuu vāha jeē natecu i quɨ̄vɨcoo i andɨvɨ́, ma quijnáhan ga i yūcuán, chi tuá na jnūhun quijnáhan tēe jíín ñahan coo.

³⁶Ni ma cúū cuɨtɨ gā i, chi coo i nájnūhun ndajéhé Yaā Dios. Te sēhe Yaā Dios cuu i, chi je ni canatecu i.

³⁷Te suni máá Moisés cáhán de jeē nátecu ndɨ̄yɨ, chi ni tee de nuū tútu ndese ni cahān yā jiín de mēhñu yúcū jeē cayú yáñuhūn. Chi ni cahān de jeē cúu ya Yaā Dios Abraham jiín Isaac jiín Jacob.

³⁸Te jeē ni cáhān de súcuan cúu jeē ní cachi de jeē cátecu tāca ndɨ́yɨ. Chi vēsú je ni cajihī i, te cátecu i nuū iyó máá yá, chi cúu ya Yaā sáha jeē técu ñayuu nɨɨ́ cáni. Achí yá jiín de.

³⁹Te jecu tēe cástéén tutu ley Yaā Dios ni cacahān de: Vāha ni cahān ní Maestro.

⁴⁰Te tuá ni cáchundeyɨ́ ni de cajnūhún de ya. Sɨquɨ̄ jeē cúu Cristo sēhe yucūn David (Mt. 22.41‑46; Mr. 12.35‑37)

⁴¹Te ni cahān yā jiín de jíjnáhan de: ¿Ndese cúu jeē cácahān ñayuu jeē Cristo cúu sēhe yucūn David?

⁴²Chi máá David suhva ni cahān de jnūhun ya nuū tútu Salmo:Máá Jítoho yō Yaā Dios suhva ni cahān yā jiín Jítoho rī, Yaā quiji:Cucōo ró lado váha ri nuū cujéhnu ró,

⁴³te na sáha ri jeē quende rō poder tāca jéē cájito uhū rohó. Achí Yaā Dios. Achí David.

⁴⁴Te núu sēhe yucūn David cúu Cristo, ¿te ndese cúu jeē ni cáhān de jeē Jítoho de cúu ya? áchí yá. Jeē ni cáhān yā jeē iyó cuéchi de jíjnáhan de (Mt. 23.1‑36; Mr. 12.38‑40; Lc. 11.37‑54)

⁴⁵Te ni cahān yā jiín tée cáscuáha jíín yá, te suni ni cajini sōho ndɨhɨ ñayuu:

⁴⁶Coto má cándíje ró táca tée cástéén tutu ley. Chi cácusɨɨ̄ ni de cáñuhun de sahma cáni jeē steén jeē cujéhnu de, cájica cuu de jíín. Te cánujnahan ni de jeē cahán yɨñúhún ñáyuu jiín de nuū yáhu. Te cánujnahan ni de cucōo de nuū silla yɨñúhún gá ini vehe iī sinagoga, jiín silla yɨñúhún gá nuū víco cáyeji ñayuu.

⁴⁷Te cáquende de vehe ñahan ní caquendōo ndáhú. Te nahán cájicān tahú de návāha cani ni ñayuu jeē tú na cuēchi de. Tēe yáha jíjnáhan de chi xeēn gā ndoho de castigo. Achí yá. Jeē ni sócō ñahan viuda xūhún (Mr. 12.41‑44)