Read Mixtec Juan 13 Bible Online

Juan 13 - Mixtec bible

Juan 13

¹Te jehíni ɨnga quɨvɨ̄ te quejéé vico pascua. Te je jíní Jesús jeē ní quee quɨvɨ̄ jeē quénda ya ñayɨ̄vɨ yáha quínuhun yā nuū Tatá yā. Te níní cúndáhú ni yā ñayuu maá yá jeē cáyūcú ini ñayɨ̄vɨ́. Te vijna jeē jínu jeē íne ya ñayɨ̄vɨ́, te sáha ya ɨɨn jniñu jeē steén cají yá jeē cundáhú ni yā i.

²Te jexeén je ni squɨ́vɨ ini anuá Judas Iscariote sēhe Simón, jeē vijna nastúu de ya.

³Te jíní Jesús jeē véji ya nuū Yaā Dios, te nuhūn yā nuū Yaā Dios, jiín jéē ni sáha Tátá yā jeē cujéhnu ya sɨquɨ̄ ndɨhɨ‑ni.

⁴Te cúxíni ya jiín tée cáscuáha jíín yá, te ni ndocuɨñɨ̄ yā. Te ni stáa ya sahma ndíi ya, te ni jihni yā ɨɨn toalla chīji ya.

⁵Te ni chuhun ya ndute ini ɨɨn tijehēn. Te ni quejéé yá nácate ya jehē tēe cáscuáha. Te násíchí yā jiín toalla jeē nuhní chīji ya.

⁶Te ni jinū yā nuū Simón Pedro. Te ni cahān Pedro jiín yá: ¿Sa máá ní nacate jehē ná naún?

⁷Te ni cahān Jesús: Tu jécūhun ni rō jeē sáha ri vijna, te cúcuéé gá te jecūhun ni rō.

⁸Te ni cahān Pedro jiín yá: Ma nácate cuɨtɨ ni jéhē ná. Te ni cahān Jesús: Núu tú nacate ri jehē rō, te ma cúu cundúú ró jiín rí.

⁹Te ni cahān Simón Pedro: Núu súcuan cúu te nasūu máá jéhē‑ni ná, chi suni nacate ní ndaha ná jíín xínī ná, áchí de.

¹⁰Te ni cahān Jesús jiín de: Tēe jeē sa ní jichi, tu jíni ñúhún ndundoo nɨ́ɨ́ cáhnu de, chi máá jéhē‑ni de, chi je íyó ndoo nɨ́ɨ́ cáhnu de. Te máá ró chi je ni candundoo ró. Te tú ndɨhɨ ró cáhīyo ndoo.

¹¹Chi je jíní yā ndé ɨɨn de cúu jeē nastúu de ya, te jeē yúcuan ní cahān yā: Tú ndɨhɨ ró cáhīyo ndoo.

¹²Te nuū ni jínu ni nacate ya jehē de jíjnáhan de, te ni naquihin ya sahma ndíi ya, te ni nucōo tucu ya nuū mesa. Te ni cahān yā: ¿A cájecūhun ni rō na vé cuní cahān jeē ni sáha ri jiín ró?

¹³Cácahān rō jeē Maestro jiín Jítoho rō cúu ri, te ndaā cácahān rō, chi suu ndije cúu ri.

¹⁴Núu súcuan te vēsú Maestro rō jiín Jítoho rō cúu ri, te ni nacate ri jehē rō jijnáhan ró, te suni súcuan cánuú jéē nacate máá ró jehē jnáhan ró.

¹⁵Chi jniñu yáha ni sáha ri jeē steén rī nuū rō jeē suni súcuan sa cuajníñu ró núū jnáhan ró, nájnūhun sa máá rí ni jejníñu ri nuū rō.

¹⁶Jendaá cahán rī jiín ró jeē ɨɨn mozo tu cújéhnu de nuū patrón de, te tēe jíca jniñu táhú nuū de, te cújéhnu de nuū tée ni tají de. Te máá ró cácuu mozo rī, te na cuájníñu ró núū jnáhan ró nájnūhun ni steén rī nuū rō.

¹⁷Te núu ni cajecūhun ni rō jnūhun yáha, te yōhyo ndetū rō te núu squícu ró.

¹⁸’Te nasūu jéē cahán rī jeē ndɨhɨ ró ndétū, chi je jíní rī tāca róhó jéē ní nacāji ri. Te cánuú squícu jnūhun yáha jeē cáhán tutu iī: Tēe yéji staā jiín rí, ni ndió cuɨ́ñɨ́ de sɨquɨ̄ rī, achí tutu.

¹⁹Te vijna te je cástūhun rí tāca jéē yáha núū rō nde ná tu coo, návāha núu na cóo, te candíje ró jéē maá rí cúu Yaā ní tají Yaā Dios.

²⁰Jendaá cahán rī jiín ró jeē na‑ni ñayuu jeē cuatáhú i tāca jéē tají rí, te ruhū jetáhú i. Te ñayuu jetáhú rúhū, suni jétáhú i Yaā ní tají rúhū vēji ri, achí yá. Jeē ní cachi yā jeē nastúu Judas yā (Mt. 26.20‑25; Mr. 14.17‑21; Lc. 22.21‑23)

²¹Te ná ni cahān Jesús tāca jnúhun yáha, te ni cucuíhyá ndasɨ́ ni yā. Te ni cahān cají yá: Jendaá cahán rī jiín ró jijnáhan ró jéē ɨɨn máá ró nastúu ruhū, achí yá.

²²Yūcuán na te tēe cáscuáha jíín yá, ni candacoto de nuū jnáhan de, cájeni ni de ndé ɨɨn de cúu jeē ni cáhān yā.

²³Te ɨɨn máá tée scuáha jeē maní gā yā jiín, néne de xiin ya mesa jeē cácuxíni de jíín yá.

²⁴Te ni sáha Simón Pedro seña nuū de jeē na cájnūhún de ya ndé ɨɨn de cúu jeē ni cáhān yā.

²⁵Yūcuán na te tēe un ní scáyɨ de máá de nuū Jesús, te ni cajnūhún de ya: ¿Ndé ɨɨn de cúu? áchí de jíín yá.

²⁶Te ni cahān Jesús: Na chúndaji ri staā te cuāha ri nuū ɨɨn de, te suu tēe un cúu, áchí yá. Te ni chundaji ya staā, te ni jēhe ya nuū Judas Iscariote sēhe Simón.

²⁷Te jeē ní quihin de staā ún, te ni quɨ̄vɨ‑ni Satanás ini anuá de. Yūcuán na te ni cahān Jesús jiín de: Jniñu jeē sáha ró, na sáha yachī rō.

²⁸Te ni ɨɨn tēe cáyeji staā jiín yá, tu ní cájecūhun ni de naun ni cahān yā súcuan jíín de.

²⁹Chi sava de cájeni ni de jeē ni cáhān Jesús jiín Judas jeē cuáan de jeē jíni ñúhún yá vico ún, chí jéē cuáha de jecu xūhun núū ñayuu ndahú. Chi máá de ndíso yɨjnɨ xūhún.

³⁰Te jeē ní yeji de staā ún, te ni quenda‑ni de cuahān de. Te je ni cuaa. Jeē ní ndacu ya jniñu jéé

³¹Yūcuán na te jeē cuahán Judas te ni cahān Jesús: Vijna te ruhū, Yaā ní nduu tēe, stéén rī ndese cújéhnu ri, te suni jíín rúhū te cuni ñayuu ndese cújéhnu Yaā Dios.

³²Te núu jíín rúhū cuni ñayuu ndese cújéhnu Yaā Dios, núu súcuan te suni stéén Yaā Dios ndese cújéhnu ruhū jeē cúu ri Sēhe ya. Te yachī‑ni stéén yā.

³³Séhē, tuá nahán condee rī jiín ró jijnáhan ró. Te nanducú ró ruhū, te nájnūhun ni cahān rī jiín táca jnáhan yó hebreo, suni súcuan cáhán rī jiín ró vijna, jeē ma cúu jinūcoo ró núū quihín rī.

³⁴Te vijna te ndácu ri ɨɨn jniñu jéé núū rō, jeē na cúndáhú ni rō jnáhan ró. Nájnūhun cúndáhú ni rī rohó, suni súcuan na cúndáhú ni rō jnáhan ró.

³⁵Te núu cúndáhú ni rō jnáhan ró, súcuan te cuni tāca ñáyuu jeē cácuu ró tée cáscuáha jíín rí, achí yá. Jeē ní cachi yā jeē yūhu Pedro cahān de jeē jiní de ya (Mt. 26.31‑35; Mr. 14.27‑31; Lc. 22.31‑34)

³⁶Te ni cahān Simón Pedro jiín yá: ¿Ndé nuū quihín ni núu súcuan? Te ni cahān Jesús: Nuū quihín rī chi ma cúu condiquīn rō ruhū vijna, te cúcuéé gá te jinū rō.

³⁷Te ni cahān Pedro: ¿Najehē ma cúu condiquīn na níhín vijna? Tu yúhú ná cuu na jéē sɨquɨ́ ni.

³⁸Te ni cahān Jesús: ¿A jéni ni rō jeē tu yúhú ró cuu rō jeē sɨquɨ́ rī? Jendaá cahán rī jiín ró jeē nde ná tu cana líhli, te unī jínu yūhu ró te cahān rō jeē tu jíní rō ruhū. Achí yá. Jesús cúu ichi jeē jinú yō nuū Tatá yā