Read Mixtec Juan 15 Bible Online

Juan 15 - Mixtec bible

Juan 15

¹’Máá rí cúu nájnūhun yoyúcú uva váha ndaā, te Tátá rī cúu nájnūhun tēe ndíto yoyúcú uva un.

²Te máá ró chi cácuu ró nájnūhun ndaha, te núu tu jéhe ró ndéhē te quende yā rohó. Te núu cácuu ró nájnūhun ndaha jeē jéhe ndehē, te nasándoo ya nacahnde yā rohó nájnūhun jeē cúu ró ndaha ún, návāha cuāha ró cuéhē gā ndehē.

³Te máá ró chi je ni candundoo ánuá rō jiín jnúhun ni steén rī nuū rō, nájnūhun ndúndoo ndaha uva.

⁴Na cúndúú ró jiín rí, te suni máá rí cundúú rí jiín ró. Ɨɨn ndaha uva ma cúu cuāha ndehē jeē maá, te núu tu yɨ́jnɨ̄ɨ jicā yóho. Te suni súcuan máá ró, ma cúu sáha ró jniñu váha te núu tu cúndúú ró jiín rí.

⁵’Máá rí cúu yoyúcú un, te máá ró cácuu ndaha ri. Ñayuu jeē nduú jíín rí, te ruhū ndúú rí jiín i, máá i cúu nájnūhun ndaha jeē jéhe cuehē ndehē. Chi núu tú cundúú ró jiín rí, te tú cuɨtɨ na jniñu váha cuu sáha ró.

⁶Ñayuu jeē tu cúndúú jíín rí, quende yā i nájnūhun ɨɨn ndaha uva, te ichī. Te ndoho i nájnūhun ndaha uva un jéē ndutútú te cayū nuū ñuhún.

⁷’Núu ndúú ró jiín rí, te cáñuhun ni rō jnūhun cáhán rī, yūcuán na te cacān rō na‑ni vé cácuni rō, te sáha ri jeē cácahān rō.

⁸Te núu cásáha ró cuéhē jniñu váha, súcuan cástéén rō jeē cúu ndije ró ñáyuu cascuáha jíín rí, te súcuan nácuni ñayuu jeē yóhyo cújéhnu Tátá rī.

⁹Nájnūhun manī Tatá rī jiín rí, suni súcuan manī rī jiín ró jijnáhan ró. Núu súcuan te ma siaá rō jnūhun manī rī jiín ró.

¹⁰Núu squícu ró jniñu ní ndacu ri nuū rō, te níní coo manī rī jiín ró, nájnūhun máá rí squícu ri jniñu ní ndacu Tátá rī nuū rī, te níní íyó mánī yā jiín rí.

¹¹’Súcuan ni cahān rī jiín ró návāha coo sɨɨ̄ ni rō nájnūhun íyó sɨ́ɨ̄ ni rī, chi nde cusɨɨ̄ teyɨ́ ni rō.

¹²Te yāha cúu jniñu ndácu ri nuū rō jijnáhan ró: jeē na cúndáhú ni rō jnáhan ró nájnūhun cúndáhú ni rī rohó.

¹³Núu ɨɨn tēe cuu de jehē amigo de, te tuá na vé cúmanī gā sáha de jeē cundáhú ni de amigo de.

¹⁴Te máá ró cácuu amigo rī núu squícu ró jniñu ndácu ri nuū rō.

¹⁵Ma cahán gā rī mozo jiín ró, chi ɨɨn mozo tu cástūhún patrón nuū i ndese jéni ni de sáha de. Chi sa suhva amigo cahān rī jiín ró, chi je ni castūhun rí nuū rō tāca jnúhun ni cahān Tatá rī jiín rí.

¹⁶Máá rí ni nacāji róhó jéē jnáma ri rohó, te nasūu máá ró ni cánacani ni xīhna gā jeē cóndiquīn rō ruhū. Te ni jeni ri rohó jéē caca ndaā rō te scándíje ró cuéhē ñayuu jeē cuu i sēhe ri nɨɨ́ cáni. Te súcuan te ndɨhɨ jeē cacán rō nuū Tatá rī sɨquɨ̄ jeē cácandíje ró rúhū, sáha ya jeē jicán rō.

¹⁷Te yāha cúu jniñu ndácu ri nuū rō: jeē na cúndáhú ni rō jnáhan ró. Jeē cáquɨtɨ̄ ni ñayuu ñayɨ̄vɨ núū Jesús jiín núū ñáyuu cácandíje

¹⁸’Te núu cáquɨtɨ̄ ni ñayuu ñayɨ̄vɨ núū rō jijnáhan ró, te je cájini rō jeē xíhna gā nuū maá rí ni caquɨtɨ̄ ni i.

¹⁹Te núu jeē iyó gá rō jiín modo ñayuu ñayɨ̄vɨ́, te coo manī ñayuu ñayɨ̄vɨ jíín ró nuú, nájnūhun manī i jíín jnáhan i. Te ni nacāji ri rohó jéē tuá coo ró jíín modo ñayuu ñayɨ̄vɨ́. Te jeē yúcuan cáquɨtɨ̄ ni i nuū rō, chi tuá cácuu ró cuenta ñayɨ̄vɨ́.

²⁰Nucūhun ni rō jnūhun ni cahān rī jiín ró: Núu tu íyó yɨ́ñúhún ñáyuu nuū patrón, te nagā ni cuu nuū mozo de. Núu ni cajito xeēn i ruhū, te suni súcuan coto xeēn i róhó jéē cácuu ró mozo rī. Te núu jeē ni cájetáhú i jnūhun ni steén rī, te suni cuatáhú i jnūhun cástéén rō.

²¹Te tācá jniñu yáha sáha i jíín ró jeē sɨquɨ́ ruhū, chi tu cájini i Yaā ní tají rúhū vēji ri.

²²’Núu jeē tu ní quíji ri nacani ri jnūhun nuū i, te ma cóo cuēchi i núú. Te vijna chi ma cúu ga cahān i jeē tu jíní i jeē iyó cuéchi i.

²³Ñayuu jeē cáquɨtɨ̄ ni nuū rī, suni nuū Tatá rī cáquɨtɨ̄ ni i.

²⁴Núu jeē tu ní sáha ri jniñu jéhnu nuū i jeē ní ɨɨn tēe tu ní sáha de súcuan, te ma cóo cuēchi i núú. Te vijna je ni cajito i jniñu ún, te vēsú súcuan te cáquɨtɨ̄ ni i nuū rī jiín núū Tatá rī.

²⁵Te súcuan cásáha i návāha squícu jnūhun yósó núū tútu ley Yaā Dios jeē cánevāha i: Ni caquɨtɨ̄ ni i nuū rī, vēsú tú na cuēchi ri, achí.

²⁶’Te tají rí maá Yaā chindéé ñáhán róhó te sáha ya jeē cóo sɨɨ̄ ni rō. Te Yaā un cúu máá Espíritu jeē steén jnūhun ndaā, te quiji ya nde nuū Tatá rī, te nacani cájí yá jnūhun ri.

²⁷Te suni máá ró nacani ró jnúhun ri, chi je cáhīin ro jíín rí nde ná ni quejéé rí nácani ri jnūhun.