Read Mixtec Juan 19 Bible Online

Juan 19 - Mixtec bible

Juan 19

¹Yūcuán na te ni cahān Pilato jeē na jnɨ́ɨ soldado Jesús, te cani de ya jiín cuarta ñɨɨ.

²Te ni casáha de ɨɨn corona iñu, ni cachuhun de xinī yā. Te ni cachuhun de ya ɨɨn sahma cuehé ndíhí jéē cúu sahma rey.

³Te ni jecondichi de nuū yā, te ni cacahān catá de: Nacā jeē váha rey cúu Rey ñayuu hebreo. Te ni cacani de nuū yā.

⁴Yūcuán na te ni quenda Pilato ɨnga jínu, te ni cahān de jíín ñáyuu: Yāhá condēhe ró tava rī de, návāha na cúni rō jeē tú na cuēchi níhín rī sɨquɨ̄ de.

⁵Te ni quenda Jesús, ñúhun ya corona iñu jíín sahma cuehé ndíhí un. Te ni cahān Pilato jiín i: Yāhá condēhe ró de jíjnáhan ró.

⁶Te nuū ní cajito sutū cácujéhnu jíín táca policía nuū yā, te ni cacana jee de: Cata caa ní de jicā cruz, na cúū de. Te ni cahān Pilato: Núu súcuan te najnɨɨ máá ró de te cahni rō de. Chi ruhū, tú na cuēchi níhín rī sɨquɨ̄ de.

⁷Te ni cacahān ñayuu hebreo un: Cánevāha ná ɨɨn ley, te jeē sɨquɨ́ ley un cánuú jéē cúū de, chi sáha de máá de jeē Séhe Yaā Dios cúu de.

⁸Te jeē ní jini sōho Pilato jnūhun yáha, te víhyá gā ni yūhú de.

⁹Te ni ndɨ̄vɨcoo tucu de ini palacio, te ni cajnūhún de Jesús: ¿Ndé nuū véji ró? Te tu ní cáhán cuɨtɨ Jesús jiín de.

¹⁰Yūcuán na te ni cahān de jíín yá: ¿Naun tu cáhán rō jeē cahán rī? ¿A tu jíní rō jeē ndíso jníñu ri jeē cáhni rī rohó jícā cruz, te suni ndíso jníñu ri jeē siaá rī rohó quíhīn rō?

¹¹Te ni cahān Jesús: Núu tu ní sáha Yaā Dios jeē ndíso jníñu ró, te tú na vé cúu sáha ró sɨ́quɨ̄ rī. Jeē yúcuan tēe jeē ní nacuāha ruhū ndaha ró, cuēchi xeēn gā condee sɨquɨ̄ de vēsú maá ró. Achí yá.

¹²Yūcuán na te nde hora un ndúcú ndéyɨ́ Pilato ndese siáá de ya. Te ñayuu hebreo chi cácana jee i: Núu siáá ni tée jiñā, te tu cúu ní amigo rey Roma jeē cujéhnu ndácu jniñu núu súcuan. Chi tāca tée jeē sáha de rey maá de, núu súcuan te cúu de enemigo sɨquɨ̄ rey un. Achí i.

¹³Te jeē ní jini sōho Pilato jnūhun yáha, te ni ndacu de jniñu jeē na quénda Jesús ini vehe quiji ya. Te ni cucōo de silla nuū cúndaā jniñu, nuū máni máá yúū ni jecāva, te lugar un nání Gabata nuū yúhu hebreo.

¹⁴Te cuacuu cahuxī uū, te jehíni quɨvɨ̄ ún quejéé vico pascua. Te ni cahān Pilato jiín ñáyuu hebreo: Yāha índichi maá rey rō.

¹⁵Te ni cacana jee i: Na cúū de. Cata caa ní de jicā cruz, achí i. Te ni cahān Pilato jiín i: ¿A jéē cata caa rī rey rō jicā cruz naún? Te sutū cácujéhnu un ní cacahān de: Tuá na ɨnga rey cánevāha ná jíjnáhan ná, chi máá‑ni rey Roma jeē cujéhnu ndácu jniñu nuū ná.

¹⁶Yūcuán na te Pilato ni nacuāha de ya nuū i jeē na cúū yā jicā cruz. Te ni cajnɨɨ i ya cuangoo i jíín yá. Jeē ní cacata caa de ya jicā cruz (Mt. 27.32‑44; Mr. 15.21‑32; Lc. 23.26‑43)

¹⁷Te ni quenda Jesús, ndíso ya cruz yā, cuangoo de jíín yá ɨɨn lugar nuū naní Yɨquɨ Xíní, te nuū yúhu hebreo naní Gólgota.

¹⁸Te yūcuan ní cacata caa de ya jicā cruz. Te suni ni cacata caa de uū tēe nuū uū gā cruz, ɨɨn ɨɨn de ɨɨn lado yā, te máá Jesús mēhñú.

¹⁹Te suni ni ndacu Pilato jniñu jeē na cóndee jnūhun xinī cruz yā, jeē cahán: Tēe yáha cúu Jesús ñuu Nazaret, Rey ñayuu hebreo, achí.

²⁰Te cuehē ñayuu hebreo ni cacahu i jnūhun yáha, chi máá yajni yuñúū cúu nuū ní cacata caa de ya. Te jnūhun un yósó jíín yuhu hebreo jiín griego jiín latín.

²¹Te tāca sútū cácujéhnu nuū ñáyuu hebreo, ni cacahān de jíín Pilato: Ma tée ní jéē cúu de Rey ñayuu hebreo, chi sa suhva tee ní jéē maá de ni cahān jeē cúu de Rey ñayuu hebreo.

²²Te ni cahān Pilato: Ma násama ri jeē jé ni ndacu ri jniñu ni jecondee.

²³Te soldado un, nuū ní cuu ni cacata caa de Jesús jicā cruz, te ni caquihin de sahma ya, te ni cajehnde de ni nduu cuūn parte, te ɨɨn ɨɨn parte ni cuu ɨɨn ɨɨn soldado un. Te suni ni caquihin de camisa yā. Te camisa un tu ní quícu, chi ni cunu nɨ́ɨ́.

²⁴Te ni cacahān maá de: Ma cáhnde yō, chi vāha ga na sáha yó sorteo, te na cóndēhe yó ndé ɨɨn yó níhīn, achí de. Te súcuan ni squícu jnūhun yósó núū tútu iī nde jenahán jéē cahān Jesús: Ni caquihin de sahma ri cuu máá de. Te ni casáha de sorteo sɨquɨ̄ camisa rī. Achí. Súcuan ni casáha soldado un.

²⁵Te yajni cruz nuū ndíta caa Jesús íne náná yā, jiín cúhū ña María ñasɨhɨ́ Cleofas, jiín María ñuu Magdala.

²⁶Te ni jito Jesús nuū naná yā jiín núū tée scuáha jeē maní gā yā jiín, suni índichi de yūcuán. Te ni cahān yā jiín náná yā: Nánā, nde vijna te máá de nucuɨñɨ̄ de cuu de sēhe ní.

²⁷Yūcuán na te ni cahān yā jiín tée scuáha ún: Nde vijna te cuu ña nájnūhun náná rō, achí yá. Te nde hora un ní cana de ña cuacondee ña vehe de condito de ña. Jeē ni jíhī Jesús (Mt. 27.45‑56; Mr. 15.33‑41; Lc. 23.44‑49)

²⁸Yūcuán na te ni jini Jesús jeē jé ni jīnu tācá jniñu jeē cánuú ndoho ya. Te návāha squícu jnūhun cáhán tutu iī, te ni cahān yā: Jíchí rī ndute, áchí yá.

²⁹Te yūcuan íin ɨɨn tɨndohō ñúhun chitú vinagre iyá. Te ni cachundaji de ɨɨn cachī nuū vinagre un, te ni catee de xinī ɨɨn ndaha yújnu hisopo, te ni catee de yuhu ya jeē cóho ya.

³⁰Te ná ni jihi ya vinagre un, te ni cahān yā: Je ni jīnu, áchí yá. Te ni cāyɨ́‑ni xinī yā, te ni jihī‑ni ya. Jeē ní cují soldado lanza xiin ya

³¹Te ɨnga quɨvɨ̄ ún coo vico pascua. Te tēe hebreo tu cácuni de jeē cóndita caa ndɨ̄yɨ ún jícā cruz quɨvɨ̄ ndétātú un. Chi quɨvɨ̄ ndétātú jeē cúu vico pascua, iī ndasɨ́ gá vēsú tāca gá quɨvɨ̄ ndétātú. Te ni cacahān de jíín Pilato jeē na ndácu de jniñu jeē jnahnú sɨ̄hɨn tēe cándita caa, te na cújiyo de jicā cruz.

³²Te ni quecoo soldado, te ni cajehnū de sɨ̄hɨn ɨɨn tēe jeē ndíta caa jíín yá, te suni súcuan ɨnga de.

³³Te nuū ní quecoo de nuū Jesús, te ni cajito de jeē jé ni jihī yā. Jeē yúcuan tu ní cájehnū de sɨ̄hɨn ya.

³⁴Te ɨɨn soldado chi ni cují de lanza xiin ya, te ni cane‑ni nɨñɨ̄ jiín ndute.

³⁵Te máá rí jeē tée tutu yáha, ni jito ri jeē súcuan ni cuu, te nácani ndaā rī jnūhun ndese ni cuu. Te jíní rī jeē iyó ndáā jnūhun cáhán rī, návāha suni candíje máá ró jijnáhan ró.

³⁶Chi súcuan ni cuu návāha squícu jnūhun cáhán tutu iī: Ma cahnú de ni ɨɨn yɨquɨ ya, achí.

³⁷Te suni ɨnga jnūhun cáhán tutu iī: Ɨɨn quɨvɨ̄ te coto i nuū Yaā jeē ní cují i lanza, achí. Jeē ní quindūji Jesús (Mt. 27.57‑61; Mr. 15.42‑47; Lc. 23.50‑56)

³⁸Te ni cuu tāca jéē yáha. Te íyó ɨɨn tēe ñuu Arimatea jeē naní José, te cúu de tēe cándíje Jesús. Te yuhu‑ni cándíje de, chi yúhú de jnáhan de hebreo. Te ni cahān ndahú de jíín Pilato jeē na cuáha jnūhun quihin de yɨquɨ cúñu Jesús. Te ni jēhe Pilato jnūhun. Yūcuán na te cuahān José, ni snúu de yɨquɨ cúñu Jesús.

³⁹Te suni ni jinū Nicodemo, tēe ni quiji nuū Jesús ɨɨn jecuáā. Te ndíso de nájnūhun ocō uxī kilo sūje uvuā jeē ní saca jnáhan jíín yúcū áloe.

⁴⁰Te ndɨndúú de ni caquihin de yɨquɨ cúñu Jesús, te ni cachusúcún de jíín tira sahma jeē ni quɨ́vɨ yucū jeē jeén asɨ̄n ún, nájnūhun íyó costumbre maá ñáyuu hebreo jeē cáchindūji i ndɨ̄yɨ.

⁴¹Te yajni nuū ni jíhī Jesús íyó ɨɨn huerto. Te nuū huerto un ndéé ɨɨn yaū jeē ní caan jeé jicā ɨɨn cava, nuū ná tu quindūji ndɨ̄yɨ.

⁴²Te yūcuan ní cachindūji de Jesús, chi íne yajni yaū ndɨ̄yɨ ún. Chi je yajni quejéé quɨ́vɨ̄ ndétātú de jeē cácuu de ñayuu hebreo, te tú na ley chindūji de ndɨ̄yɨ núu je ni quejéé quɨ́vɨ̄ ún. Jeē ní natecu Jesús (Mt. 28.1‑10; Mr. 16.1‑8; Lc. 24.1‑12)