Read Mixtec Juan 6 Bible Online

Juan 6 - Mixtec bible

Juan 6

¹Yūcuán na te cuahān Jesús ɨnga lado mar Galilea, jeē cúu mar Tiberias.

²Te yōhyo cuehē ñayuu ni candiquīn i ya, chi ni cajito i tācá jniñu jéhnu jeē steén yā poder yā jeē ní nasávāha ya ñayuu cácuhū.

³Te ni caa ya ɨɨn yucu, te ni cucōo ya yūcuan jíín tée cáscuáha jíín yá.

⁴Te je ni cuyajni vico pascua jeē cánucūhun ni jnáhan ñuu yā hebreo jeē ní cacācu i nuū ñáyuu nación Egipto.

⁵Te ni ndacoto ya, te ni jito ya jeē véjicoo cuehē ndasɨ́ ñáyuu. Te ni cahān yā jiín Felipe: ¿Ndé nuū cuaan yó jéē cáji ñayuu yáha jíjnáhan i?

⁶Te súcuan ni cahān yā jeē jíto ndee yā de núu ndese cahān de. Chi je jíní maá yá ndese sáha ya.

⁷Te ni cahān Felipe jiín yá: Te ni ma cánda uū ciento denario staā, ni vēsú jeē cáji i jecu jecu jijnáhan i, áchí de.

⁸Yūcuán na te ni cahān Andrés, ñani Simón Pedro, ɨnga tēe scuáha jíín yá un:

⁹Yāha íne ɨɨn sūchi yɨ́ɨ́ jéē ndíso i uhūn staā cebada jiín úū chācá. ¿Te ndé canda cuɨtɨ ún, chi ñayuu cuehē ndasɨ́ cúu?

¹⁰Yūcuán na te ni cahān Jesús: Cahān jiín ñáyuu na cúcōo i, áchí yá. Te yūcuan cáa cuehē ite, te ni cacucōo i, te nájnūhun uhūn mil tēe cúu.

¹¹Te ni quihin Jesús staā ún, te ni nacuatáhú yá nuū Yaā Dios. Te ni jēhe ya nuū tée cáscuáha jíín yá, te máá de ni casaja de nuū ñáyuu ní cacucōo ún. Te suni súcuan ni sáha ya jiín cháca, te ni cayeji i nasaa cácuni maá i.

¹²Te nuū ní candutú chíji i, te ni cahān yā jiín tée cáscuáha ún: Nastútú ró tācá pedazo jeē ni ndóo, návāha tu stɨ́vɨ cuɨtɨ yō.

¹³Te ni canastútú de, te ni chitú úxī uū jīca pedazo jeē ni ndóo sɨquɨ̄ ndɨhúhún staā cebada un jeē tuá ni ndɨ́hɨ caji ñayuu.

¹⁴Te ñayuu un ní cajito i jniñu jéhnu ni sáha Jesús jeē ni stéén yā poder yā. Te ni cacahān i: Jendaá ndije jeē tée yáha cúu jeē cahán tutu jeē quíji ini ñayɨ̄vɨ jéē nácani jnūhun Yaā Dios. Achí i.

¹⁵Te ni jini Jesús jeē cácuni i sáfuerza i ya jeē cuu ya rey i núú. Te ni cujiyo tucu máá ɨɨn‑ni ya, ni caa ya cuahān yā nuū sucún gá yucu. Jeē ní jica jéhé yá nuū mar (Mt. 14.22‑27; Mr. 6.45‑52)

¹⁶Te nuū cuácuaa, te tēe cáscuáha jíín yá ni nanuu de cuangoo de nde mar.

¹⁷Te ni ndɨ̄vɨcoo de ini barco, te ni cascáca de jeē quíngoo de nde ɨnga lado mar nde ñuu Capernaum. Te je ni cunee, te ná tu ndee Jesús nuū de.

¹⁸Yūcuán na te ni jequɨ̄hɨ ɨɨn tachī níhin, te sáha jeē ndónda ndute mar un.

¹⁹Te jeē ní cuu nájnūhun uhūn chí íñū kilómetro cájica de jíín barco, te ni cajito de jeē jíca Jesús nuū mar, te ni cuyajni ya vēji ya nuū barco. Te ni cayūhú de.

²⁰Te máá yá ni cahān yā jiín de: Máá rí cúu. Ma yūhu ró jijnáhan ró.

²¹Te ni cacusɨɨ̄ ni de jeē na quɨ́vɨ ya ini barco. Te ni sáha ya jeē yachī‑ni ni jinūcoo‑ni de ñuhun íchi núū cuángoo de ún. Jeē cánanducú ñayuu Jesús

²²Te ɨnga quɨvɨ̄ ún, te ñayuu jeē ní caquendōo ɨnga lado mar, ni cajini i jeē tée cáscuáha jíín yá cuangoo de jíín máñúhún‑ni barco ni íne yūcuán, jíín jéē tu ní quɨ́vɨ Jesús quihīn yā jiín de jíjnáhan de.

²³Te sava ga barco jeē véjicoo ichi ñúū Tiberias, ni quecoo yajni lugar nuū ní cayeji i staā jeē ní nacuatáhú máá Jítoho yō jehē.

²⁴Te jeē ní cajito ñayuu un jéē tuá Jesús íne ya yūcuán, ni tēe cáscuáha jíín yá, te ni quɨ̄vɨcoo i tāca barco un, te cuangoo i ñuu Capernaum cuananducú i ya. Jesús cúu staā jeē cótecu yō nɨɨ́ cáni

²⁵Te nuū ni jínūcoo i nde ɨnga lado mar, te ni nanihīn jnáhan i jíín Jesús. Te ni cacajnūhún i ya: Maestro, ¿na hora ni quee ni yáha?

²⁶Te ni cahān Jesús: Jendaá cahán rī jiín ró jeē cánanducú ró ruhū sɨquɨ̄ jeē ní cayeji rō nde ni candutú chíji ró, te nasūu sɨ́quɨ̄ jeē ní cajito ró táca jniñu jéhnu jeē steén rī poder rī.

²⁷Ma cóndɨhvɨ̄ ni rō maá sɨ́quɨ̄ jeē caji rō jeē yachī nataxīn, chi sa suhva condɨhvɨ̄ ni rō sɨquɨ̄ jeē nihín rō jeē cótecu rō nɨɨ́ cáni sáha. Te máá rí, Yaā ní nduu tēe, cuāha ri nájnūhun staā jeē cótecu rō nɨɨ́ cáni sáha. Chi Tátá rī Yaā Dios ni jeni ya ruhū jeē sáha ri súcuan. Achí yá jiín i.

²⁸Yūcuán na te ni cacajnūhún i ya: ¿Ndese sáha ná návāha squícu ná jniñu cúní Yaā Dios?

²⁹Te ni cahān Jesús: Jniñu jeē cuní Yaā Dios cúu jeē candíje ró rúhū, Yaā ní tají yá vēji.

³⁰Yūcuán na te ni cacahān i: Núu súcuan ¿te na jniñu jéhnu sáha ní coto ná jíjnáhan ná te candíje ná jéē ní tají yá nihín? ¿Na jniñu cúu jeē sáha ní?

³¹Chi tāca jíí yō jenahán ni cayeji de maná jeē ní cuun ichi ándɨvɨ́ ndé nuū ñúhun téhé, nájnūhun yósó núū tútu: Yaā Dios ni jēhe ya staā ni cuun ichi ándɨvɨ́, ni cayeji i, áchí tutu. Achí i jíín yá.

³²Te ni cahān Jesús: Jendaá cahán rī jiín ró: Nasūú Moisés ni jéhe staā un núū de jíjnáhan de jeē ní cuun ichi ándɨvɨ́, chi máá Tátá rī ni jēhe. Te máá yá jéhe staā andɨvɨ́ jéē cótecu rō nɨɨ́ cáni sáha.

³³Chi staā jéhe Yaā Dios cúu máá Yaā ní quiji ichi ándɨvɨ́, te sáha ya jeē ñáyuu ñayɨ̄vɨ́ cotecu i nɨ́ɨ́ cáni andɨvɨ́. Achí yá.

³⁴Te ni cacahān i jíín yá: Níní cuáha ni stáā ún caji na núu súcuan.

³⁵Te ni cahān Jesús: Máá rí cúu máá stáā jeē cótecu rō nɨɨ́ cáni sáha. Ndé vé quɨ́vɨ ndaha ri, ma cúū cuɨtɨ gā sōco. Te ndé vé candíje ruhū, ma jichí cuɨtɨ gā.

³⁶Te nájnūhun je ni cahān rī jiín ró, tu cácandíje ró rúhū, vēsú ni cajito ró núū rī.

³⁷Tāca ñáyuu jeē sáha Tátá rī jeē candíje i ruhū, máá i quɨ́vɨcoo ndaha ri. Te jétáhú rí tāca jéē cuní quɨ̄vɨ ndaha ri, chi ma squéhichī cuɨtɨ rī quihīn.

³⁸Chi ni quiji ri ichi ándɨvɨ́ návāha sáha ri jniñu jeē cuní Yaā ní tají rúhū, te nasūu jéē sáha ri jeē cuní maá rí.

³⁹Te jniñu jeē cuní Tatá rī, Yaā ní tají rúhū, cúu jeē ma scuíta ri ni ɨɨn ñayuu ni jéhe ya nuū rī, chi condito ri i te nastécu rī i quɨvɨ̄ jínu ñayɨ̄vɨ́.

⁴⁰Te Yaā ní tají rúhū, cuní yā jeē tāca ñáyuu jeē nihín i jnūhun ruhū, Sēhe Yaā Dios, te candíje i ruhū, cotecu i nɨ́ɨ́ cáni andɨvɨ́. Chi nastécu rī i quɨvɨ̄ jínu ñayɨ̄vɨ́. Achí yá.

⁴¹Yūcuán na te ni caquejéé jnáhan ñuu yā hebreo cácahān de sɨquɨ̄ yā, chi ni cahān yā jeē maá yá cúu staā ní quiji ichi ándɨvɨ́.

⁴²Te ni cacahān de: ¿A násūu tée yáha cúu Jesús, sēhe José? Te cájini yō tatá de náná de. ¿Te ndese cúu jeē cahán de jeē ni quíji de ichi ándɨvɨ́ núu súcuan?

⁴³Te ni cahān Jesús jiín de: Ma cahán rō sɨquɨ̄ rī jijnáhan ró.

⁴⁴Ni ɨɨn ñayuu ma cúu quɨ̄vɨ i ndaha ri núu ma sáha Tátá rī jeē cúu ni i quɨ̄vɨ i, chi máá yá ni tají rúhū vēji ri. Te nastécu rī i quɨvɨ̄ jínu ñayɨ̄vɨ́.

⁴⁵Te suhva yósó núū tútu ni catee tēe ni canacani jnūhun Yaā Dios: Tācá i chi stéén Yaā Dios nuū i, áchí. Núu súcuan te tāca ñáyuu jíni sōho jnūhun cáhán Tatá rī, te jétáhú i jeē steén yā nuū i, ñayuu ún chi quɨ́vɨcoo i ndaha ri.

⁴⁶’Te tu ní jíto ni ɨɨn ñayuu nuū maá Tátá rī. Chi máñúhún‑ni ruhū ni jito ri nuū yā, chi nde nuū maá yá vēji ri.

⁴⁷Jendaá cahán rī jiín ró jijnáhan ró jéē ñayuu jeē candíje i jeē jnáma ri i, máá i cotecu i nɨ́ɨ́ cáni.

⁴⁸Máá rí cúu staā jeē cótecu rō nɨɨ́ cáni sáha.

⁴⁹Tāca jíí rō jenahán, ni cayeji de staā maná jeē ní cuun ichi ándɨvɨ́ ndé nuū ñúhun téhé, te tu ní sáha jeē cótecu de nɨ́ɨ́ cáni andɨvɨ́.

⁵⁰Te staā jeē cahán rī jeē véji ichi ándɨvɨ́, chi na‑ni ñayuu caji, te cotecu i nɨ́ɨ́ cáni andɨvɨ́.

⁵¹Te suu máá rí cúu staā un jéē ní quiji ichi ándɨvɨ́ jéē sáha jeē cótecu rō nɨɨ́ cáni. Te ñayuu jeē cáji staā yáha, cotecu i nɨ́ɨ́ cáni andɨvɨ́. Te staā jeē cuáha ri un cúu yɨquɨ cúñu rī, te cuāha ri návāha ñayuu ñayɨ̄vɨ́ cotecu i nɨ́ɨ́ cáni andɨvɨ́. Achí yá.

⁵²Yūcuán na te jnáhan ñuu yā hebreo ni cacahān de jíín táca jnáhan de: ¿Ndese cuu cuāha tēe yáha yɨquɨ cúñu de caji yō? achí de.

⁵³Te ni cahān Jesús jiín de: Jendaá cahán rī jiín ró: Núu tú candíje ró jéē yɨquɨ cúñu ruhū, Yaā ní nduu tēe, cúu nájnūhun staā, te nɨñɨ̄ rī cúu nájnūhun ndute, núu súcuan te ma cótecu rō nɨɨ́ cáni andɨvɨ́.

⁵⁴Chi ñayuu cácandíje jeē yɨquɨ cúñu rī cúu nájnūhun staā te nɨñɨ̄ rī cúu nájnūhun ndute, máá i cotecu i nɨ́ɨ́ cáni. Te nastécu rī i quɨvɨ̄ jínu ñayɨ̄vɨ́.

⁵⁵Chi yɨquɨ cúñu rī jiín nɨ́ñɨ̄ rī cúu ndije jeē sáha jeē cótecu i nɨ́ɨ́ cáni.

⁵⁶Te ñayuu cácandíje jeē yɨquɨ cúñu rī jiín nɨ́ñɨ̄ rī cúu nájnūhun staā jiín ndute jeē cótecu i nɨ́ɨ́ cáni sáha, máá i níní ndúú i jíín rí, te ndúú rí jiín i.

⁵⁷Máá Tátá rī, Yaā técu, ni tají yá ruhū vēji ri, te técu rī sáha máá yá. Te suni súcuan, ñayuu cácandíje jeē cúu ri nájnūhun staā i ndute i, suni súcuan cotecu i nɨ́ɨ́ cáni sáha ri.

⁵⁸Máá rí cúu staā ní quiji ichi ándɨvɨ́. Te staā jeē cahán rī tu cúu nájnūhun staā maná jeē ní cayeji tāca jíí rō jenahán, chi tu ní sáha jeē cótecu de nɨ́ɨ́ cáni. Te staā jeē cahán rī, chi ñayuu caji, cotecu i nɨ́ɨ́ cáni sáha, áchí yá.

⁵⁹Tāca jnúhun yáha ní steén Jesús nuū ñáyuu ní candutútú ini vehe iī sinagoga ñuu Capernaum. Jnūhun cotecu yō nɨɨ́ cáni

⁶⁰Te cuehē ñayuu cascuáha jíín yá, ni cajini sōho i jnūhun yáha jéē ni stéén yā. Te ni cacahān maá i: Yōhyo yɨɨ́ jnúhun cáhán yā yāhá. ¿Ndese cuu cuatáhú yó?

⁶¹Te ni jini Jesús jeē cácahān i jeē yɨɨ́ cúu jnūhun yāhá, te ni cahān yā jiín i: ¿A yɨɨ́ sáha jnūhun yáha jíín ró jijnáhan ró?

⁶²¿Te ndese sáha ró núu coto ró jéē ruhū, Yaā ní nduu tēe, ndaa ri nuhun rī nuū ni cóndee rī xīhna ñúhún?

⁶³Máá ánuá ñayuu cúu jeē sáha jeē técu i. Chi yɨquɨ cúñu i tu jéjníñu cuɨtɨ súcuan. Te tāca jnúhun ni cahān rī jiín ró cúu jeē quéndōo vāha ánuá rō, te cotecu rō nɨɨ́ cáni sáha.

⁶⁴Te sava ró chi tu cácandíje ró. Achí yá. Chi nde xīhna ñúhún je jíní Jesús ndé‑ni cúu ñayuu jeē ma cándíje, jíín ndé ɨɨn de cúu jeē nastúu de ya.

⁶⁵Te ni cahān gā yā: Jeē yúcuan ní cahān rī jiín ró jeē ma cúu quɨ̄vɨ ni ɨɨn ñayuu ndaha ri, te núu tu sáha Tátá rī jeē cúu ni i quɨ̄vɨ i, áchí yá.

⁶⁶Te nde quɨvɨ̄ ún te cuehē ñayuu cascuáha jíín yá, ni castóo i ya, te tuá ni cájica i jíín yá.

⁶⁷Yūcuán na te ni cahān yā jiín máá ndɨhúxí uū tēe cáscuáha jíín yá: ¿A suni cácuni máá ró quingoo ró, chí naún?

⁶⁸Te ni cahān Simón Pedro: ¿Ndé núū gā quingoo ná? Chi máá ní cúu jeē nácani jnūhun jeē cótecu na nɨ́ɨ́ cáni sáha.

⁶⁹Te ni cacandíje ná te cájini na jéē maá ní cúu Cristo, Sēhe Yaā Dios, Yaā técu, achí de.

⁷⁰Te ni cahān Jesús: Te vēsú ni nacāji ri ndɨhúxí uū rō, te íyó ɨɨn ró jeē ní quɨ̄vɨ jexeén ini. Achí yá.

⁷¹Te súcuan ni cahān yā sɨquɨ̄ Judas Iscariote, sēhe Simón. Chi máá de nastúu de ya, vēsú ɨɨn jnáhan jeē uxí uū tēe cáscuáha jíín yá cúu de. Jeē tu ní cácandíje ñani Jesús