Read Mixtec Juan 7 Bible Online

Juan 7 - Mixtec bible

Juan 7

¹Yūcuán na te jíca cuu Jesús región Galilea. Chi tu cúní yā caca cuu ya región Judea, chi jnáhan ñuu yā hebreo jeē cáyūcu yúcuan, cácuni de cahni de ya.

²Te cuacuyajni vico jeē casáha ñayuu yā hebreo vehe ramádá, cáyūcú i chīji.

³Te ñani yā ni cacahān de jíín yá: ¿Naun máá yáha‑ni íne ró? ¿Naun tú quihīn rō región Judea, návāha tēe yūcuan jéē cácandíje de róhó, suni coto de jniñu jéhnu sáha ró.

⁴Chi núu cúní ɨɨn tēe jeē cuité núu jnūhun de, te tu sáha yuhu de jniñu. Te núu sáha nde ró táca jniñu jéhnu, vāha ga na sáha ró jéē cúni ndɨvii ñayuu.

⁵Súcuan ni cacahān ñani yā jiín yá, chi ni máá de tu cácandíje de ya.

⁶Yūcuán na te ni cahān Jesús: Ná tu quee maá quɨ́vɨ̄ jeē quihín rī. Te máá ró jijnáhan ró chi na‑ni quɨvɨ̄‑ni te cuu quingoo ró.

⁷Chi ma quɨtɨ́ ni ñayuu ñayɨ̄vɨ núū rō, te máá rí chi quɨ́tɨ́ ni i jíto i ruhū, chi cáhán rī jeē jiní rī jeē máni jniñu néé cásáha i.

⁸Cuángoo máá ró vico ún. Te máá rí chi ma quihín rī vijna, chi ná tu quee maá quɨ́vɨ̄ cánuú quíhīn rī. Achí yá.

⁹Súcuan ni cahān yā jnūhun yáha jíín de, te ni quendōo ya Galilea. Jeē ni jéhēn Jesús vico vehe ramádá

¹⁰Te nuū ni yáha ñani yā cuangoo de vico ún, te sáá te suni cuahān maá yá. Te tú cuahān ndijin yā, chi tu ní stéén yā maá yá.

¹¹Te jnáhan ñuu yā hebreo cánanducú i ya nuū víco ún, te cácahān i: ¿Ndé nuū íne tēe ún? áchí i.

¹²Te yōhyo ni cacahān ñayuu jeē sɨquɨ́ yā, chi sava i cácahān: Tēe vāha cúu de. Te sava ga i cácahān: Tuú chi stáhú de ñayuu.

¹³Te yuhu‑ni ni cacahān i jnūhun ya, chi cáyūhú i jeē quɨtɨ́ ni jnáhan i tēe hebreo.

¹⁴Te jeē ní cuu sava vico, te ni quee Jesús, ni quɨ̄vɨ ya templo cáhnu, te ni quejéé yá steén yā jnūhun.

¹⁵Te ni canaa ni jnáhan ñuu yā hebreo cájini sōho i, te ni cacahān i: ¿Ndese jíní tēe yáha cuéhē jnūhun ndíchí, chi tu ní jíca de escuela? áchí i.

¹⁶Yūcuán na te ni cahān Jesús: Jnūhun stéén rī chi nasūu jnúhun máá rí cúu, chi jnūhun jeē ni jéhe máá Yaā ní tají rúhū cúu.

¹⁷Núu ɨɨn ñayuu cuní i sáha i jniñu cúní Yaā Dios, ñayuu ún chi jecūhun ni i núu nde nuū Yaā Dios vēji jnūhun stéén rī, chí jnúhun jeē jéni ni maá‑ni ri cúu.

¹⁸Tēe cáhán jnūhun jéni ni maá de, tēe un ndúcú de jeē na sájéhnu ñayuu de. Te núu ɨɨn tēe ndúcú de jeē sajéhnu de Yaā ní tají de, tēe un cúu tēe ndaā, te tú na jnūhun stáhú íyó jíín de.

¹⁹’¿A násūu jéē ni jéhe Moisés ley yā nuū rō jeē squícu ró? Te ni ɨɨn ró tu cásquícu. Chi sa jeē cácuni rō cahni rō ruhū, ¿te najehē cúu? Achí yá.

²⁰Te ni cacahān ñayuu cuehē ún: Tachī ndóho ró. ¿Ndé ɨɨn cúní cahni rohó?

²¹Te ni cahān Jesús: Ni nasávāha ri ɨɨn tēe quɨvɨ̄ ndétātú, te ndɨvii rō ni canaa ni rō ni cajito ró jéē quɨvɨ́ ndétātú ni sáha ri jniñu ún.

²²Te Moisés ni jēhe de ley jeē cúu circuncidar nuū rō. Te cásáha ró circuncidar sūchi yɨ́ɨ́ núū uná quɨvɨ̄ jeē ní cacu i, vēsú quɨvɨ̄ ndétātu cúu. (Te nasūu máá Moisés ní jéquin ley un, chi je ni īyo nuū tāca jíí de.)

²³Núu súcuan te núu cásáha ró circuncidar vēsú quɨvɨ̄ ndétātu cúu, návāha squícu ró ley Moisés, ¿te najehē cáquɨtɨ̄ ni rō jeē ní nasávāha ndɨhɨ ri ɨɨn tēe quɨvɨ̄ ndétātú?

²⁴Ma yachí cani ni rō jeē cuéchi cúu jeē sáha ri. Chi sa cani vāha ni rō sɨquɨ̄ tācá jniñu váha. Achí yá. Jeē ní cachi Jesús ndé nuū véji ya

²⁵Yūcuán na te sava ñayuu ñuu Jerusalén ni cacajnūhun jnáhan i: ¿A násūu tée yáha cúu jeē cánanducú tée cácujéhnu jeē cáhni de, chí naún?

²⁶Te yāha cáhán ndijin de nuū chitú, te tú na jnūhun cácahān jiín de. ¿A sanaa te ni cacundaā ni tēe cácujéhnu jeē tée yáha cúu Cristo jeē achí tutu jeē quiji, chí naún?

²⁷Te tuú chi je cájini yō nuū véji tēe yáha. Te jeē quíji Cristo, chi ni ɨɨn yó má cúni ndé chi quíji ya. Achí i.

²⁸Yūcuán na te ni cahān jee Jesús jeē steén yā jnūhun ini templo: Cájini rō ruhū, te cájini rō ndé ñuu vēji ri. Te vēsú súcuan te máá Yaā ndaā cúu jeē ní tají rúhū vēji ri, te tú vēji ri jeē cuní maá rí. Te tu cájini rō ndese Yaā cúu ya.

²⁹Te máá rí chi jíní rī yā, chi nde nuū maá yá vēji ri, te máá yá ni tají rúhū, achí yá.

³⁰Yūcuán na te ni canducú de jnɨɨ de ya. Te ni ɨɨn de tu ní cúu jnɨɨ de ya, chi ná tu quee maá quɨ́vɨ̄ jeē jnɨ́ɨ de ya.

³¹Te cuehē ñayuu chi ni cacandíje i ya, te ni cacahān i: ¿A násūu tée yáha cúu Cristo, Yaā ndétu yó jéē quiji? Chi cuehē ndasɨ́ jniñu jéhnu sáha ya jeē steén yā poder yā. Achí i. Jeē ní catají de policía jeē jnɨɨ de Jesús

³²Te ni cajini tēe fariseo jeē súcuan cácahān ñayuu jnūhun ya. Te máá de jíín sútū cácujéhnu, ni catají de policía cándito templo jeē jnɨ́ɨ de ya.

³³Te ni cahān Jesús: Jecu na quɨvɨ̄ condee rī jiín ró jijnáhan ró. Yūcuán na te nuhun rī nuū Yaā ní tají rúhū vēji ri.

³⁴Te nanducú ró ruhū, te ma nánihīn rō ruhū. Chi ma cúu jinūcoo ró núū cóndee rī. Achí yá.

³⁵Yūcuán na te máá tée un ní cacajnūhun jnáhan de: ¿Te ndé nuū quihín tēe yáha jeē ma nánihīn yō de? ¿A quíhīn de nuū jnáhan yó hebreo jeē ní cajitē núu cáyūcu ndé nación Grecia? ¿Te á stéén de jnūhun nuū ñáyuu Grecia, chí naún?

³⁶¿Te na jnūhun cúu jeē ni cáhān de jíín yó jeē nanducú yó de te ma nánihīn yō de, chi ma cúu jinūcoo yó núū cóndee de? Achí tée un jíjnáhan de. Sɨquɨ̄ ndute jeē cótecu yō nɨɨ́ cáni sáha

³⁷Te quɨvɨ̄ sándɨ̄hɨ́ vico ún te cúu vico cáhnu ga. Te quɨvɨ̄ un ní ndocuɨñɨ̄ Jesús, te ni cahān jee ya: Núu ndé ñáyuu jnáa ndasɨ́ i tāca jéē váha jeē sáha ri jehē i, nájnūhun jeē jichí i ndute, núu súcuan te na quɨ́vɨ i ndaha ri te coho i ndute, cúu jeē nihín i jeē váha ún.

³⁸Te ñayuu jeē candíje jeē jnáma ri i, chi ini anuá i condee Espíritu Santo, te cuu ya nájnūhun yūte cáne ñuhún jeē sáha ya jeē cótecu i nɨ́ɨ́ cáni, nájnūhun cáhán tutu iī. Achí yá.

³⁹Te súcuan ni cahān yā jeē ñáyuu candíje jeē jnáma ya i, nihīn i Espíritu Santo. Chi ná tu quee Espíritu ún, chi ná tu ndaa Jesús quinuhun yā nuū ndujéhnu ya. Jeē ní cacusɨ́ɨn ñayuu sɨquɨ̄ yā

⁴⁰Te sava ñayuu cuehē ún, ná ni cajini sōho i jnūhun yáha, te ni cacahān i: Jendaá jeē tée yáha cúu jeē achí tutu jeē quiji de nacani de jnūhun Yaā Dios, achí i.

⁴¹Te sava ga i ni cacahān: Tēe yáha cúu Cristo, Yaā ní tají Yaā Dios. Te sava ga i chi ni cacahān i: Tuú chi nasūú Galilea quiji Cristo.

⁴²Chi cáhán tutu iī jeē ndé yucūn rey David cacu Cristo, te cacu ya ñuu Belén, ñuu nuū ní cacu máá David. Achí i.

⁴³Te súcuan te ni cacusɨ́ɨn ñayuu jeē sɨquɨ́ yā.

⁴⁴Te sava i cácuni i jnɨɨ i ya, te ni ɨɨn i tu ní jnɨ́ɨ i ya. Jeē tu ní cácandíje tēe cácujéhnu

⁴⁵Yūcuán na te policía cándito templo tu ní cájnɨɨ de Jesús, te cuanungoo de nuū tāca tée fariseo jiín núū sutú cácujéhnu. Te tēe ún ni cacajnūhún de policía: ¿Najehē tu ní quécoo ró jíín de? áchí.

⁴⁶Te ni cacahān policía un: Tú cuɨtɨ ni ɨɨn tēe cáhán vāha ndasɨ́ nájnūhun cáhán tēe yúcuan, áchí.

⁴⁷Te ni cacahān tēe fariseo: ¿Te á suni nde máá ró jijnáhan ró ní stáhú de naún?

⁴⁸Ni ɨɨn jnáhan ruhū tēe cácujéhnu jíín tée fariseo, tu cácandíje ri jnūhun cáhán tēe ún, ¿te naun cácandíje máá ró?

⁴⁹Te ñayuu cuehē yāhá jéē tu cájecūhun ni i ley Moisés, chi jnahnū ndetū i jeē cácandíje i tēe ún, áchí de jíjnáhan de.

⁵⁰Te ni cahān Nicodemo, tēe ni jéhēn nuū yā ɨɨn jecuáā, te suni ɨɨn tēe fariseo cúu de:

⁵¹Cáhán ley yō jeē ma cúu tee yó cuéchi sɨquɨ̄ ɨɨn tēe, te núu tú xīhna gā cuni sōho yó ndese cáhán de, návāha cucáhnu ni yō na cuēchi ni sáha de. Achí de.

⁵²Te ni cacahān jiín de: Te róhó, ¿á suni nde Galilea vēji ró jéē cahán rō jehē tēe ún? Nanducú váha ró núū tútu iī te cuni rō jeē ndé Galilea tu quénda cuɨtɨ ni ɨɨn tēe nácani jnūhun Yaā Dios. Achí jíín de.

⁵³Te cuanungoo de ná vehe ná vehe de. Jnūhun ñahan ní casɨ́quɨ́ ndéē jnáhan