Read Mixtec 1 Timoteo 4 Bible Online

1 Timoteo 4 - Mixtec bible

1 Timoteo 4

¹Te cájí stéén Espíritu Yaā Dios jeē quɨvɨ̄ cuándɨhɨ te coo sava ñayuu caca yátá i nuū jnúhun cácandíje yó. Te cuatáhú i tāca jéē cácahān jnūhun stáhú jíín jnúhun ní castéén tachī.

²Chi cuni nahín i jnūhun cástéén tēe cástáhú‑ni, jeē tu cácahān ndaā de. Chi tēe un ní cahije ndasɨ́ ni de jíín jnúhun stáhú, te tuá sáha jíín ánuá de jeē nácani ni de.

³Te cahān de jeē cuēchi cúu jeē coo ñasɨhɨ́ tée, te suni súcuan núu caji ñayuu sava ndeyu. Te ndeyu ún chi ni sáha Yaā Dios jeē cúu ñayuu cácandíje jeē jiní jnūhun ndaā, návāha caji i te nacuatáhú i nuū yā.

⁴Chi ndɨhɨ jeē ni sáha Yaā Dios, íyó váha, te ma squexícó yō ni ɨɨn, chi sa nacuatáhú yó te caji yō.

⁵Chi jíín jéē cáhu yó jnúhun Yaā Dios jiín jéē nácuatáhú yó nuū yā, te íyó ndoo ndɨhɨ‑ni. Tēe jéjníñu vāha nuū Jesucristo

⁶Te núu stéén rō jnūhun yáha núū tācá hermano, núu súcuan te cuu ró tée jéjníñu vāha nuū Jesucristo, te ije ró jíín jnúhun vāha ya jeē candíje ró, chi ni cutūhva ró te ndíquín rō.

⁷Te ma quɨ́vɨ nduu rō jiín táca jnúhun jeē cúu cuento‑ni jeē cájeni cāhá ni ñayuu. Chi níní na scuáha ró ndese chiñúhún váha ró Yaā Dios.

⁸Chi jeē scuáha yó ejercicio jeē cóo ndacuī yɨquɨ cúñu yō, jecu‑ni níhín jníñu. Te jeē scuáha yó chiñúhún váha yó yá, suu yūcuan cúu jeē váha níhín jníñu sɨquɨ̄ tācá‑ni, jeē cúu vida yáha jíín vida quiji.

⁹Te ndaā ndije cúu jnūhun yáha, te jeē cánuú candíje ndɨhɨ ñayuu cúu.

¹⁰Te jeē sɨquɨ́ yáha cúu jeē sájniñu nīhin yó sɨ́quɨ̄ jnúhun ya te ndóho yó jéē cácahān ndevāha i nuū yō. Chi ñúhún ni yō jeē coto yó núū maá Yaā Dios, Yaā técu. Te máá yá cúu Yaā jnáma tāca ñáyuu, te ñayuu cácandíje jnūhun cúndáhú ni yā i, máá i cúu jeē jnáma ya.

¹¹Tāca jnúhun yáha cánuú jéē ndacu ró núū i te stéén rō.

¹²Ma cuáha ro jnúhun jeē cujéē ni ni ɨɨn i nuū rō sɨquɨ̄ jeē suchí ró. Chi sa coo ró ɨɨn ejemplo nuū ñáyuu cácandíje, jeē cúni i ndese vāha cáhán rō, ndese vāha sáha ró, ndese cúndáhú ni rō jnáhan ró, ndese cándíje ró, ndese íyó ndoo ánuá rō.

¹³Te níní ndé ná tu jinū rī nuū rō, te condɨhvɨ̄ ni rō jeē cáhu ró tutu iī nuū hermano cándutútú, jíín jéē stɨhvɨ́ ni rō i, jíín jéē steén rō nuū i.

¹⁴Ma cúhuun ni rō jiín táhū jeē ni jéhe Yaā Dios nuū rō jeē nácani ró jnúhun ya. Chi tāca tée jéhnu cándiso jníñu nuū ñáyuu cácandíje, ni casóó de ndaha de xinī rō, te ni sáha Yaā Dios jeē ní cacahān de jeē súcuan condiso jníñu ró.

¹⁵Núu súcuan te cocuu ró jíín táca jniñu yáha, te condɨhvɨ̄ ni rō jiín, návāha cuni tāca ñáyuu jeē váha íje ró cuáhān rō jiín.

¹⁶Coo cuidado rō jeē caca ndaā rō jiín jéē steén vāha ró jnúhun ya, te cuɨñɨ nīhin ró jíín ndɨhɨ. Chi núu súcuan sáha ró te quendōo vāha ánuá maá ró jiín ñáyuu chuhun ni jnūhun cáhán rō. Ndese sáha vāha yó jíín ñáyuu cácandíje