Read Mixtec Hebreos 2 Bible Online

Hebreos 2 - Mixtec bible

Hebreos 2

¹Núu súcuan te cánuú jéē váha ga chuhun ni yō tāca jnúhun ya jeē ní cajini yó, chi núu tuú te sanaa te scuíta yó.

²Chi nde jenahán ní jejníñu ya ndajéhé yā ni cacastūhun jnúhun ya, te ni cajini ñayuu jeē iyó ndáā. Te ñayuu nīhni ni jiín ñáyuu tu ní cájendetū jnūhun ún, vetū‑ni ni canihīn i castigo.

³Te núu súcuan ni cuu, te yóhó, ¿ndese cācu yó núu ma chúhun ni yō jnūhun cánuú gá jeē jnáma ya yohó? Chi xīhna gā maá Jítoho yō ni nacani ya jnūhun yáha, te sáá te tēe jeē ní cajini nahín ni canacani ndaā tucu máá de nuū yō.

⁴Te Yaā Dios suni ni chindéé ñáhán yá de jeē ní canacani de jnūhun ya. Chi ni sáha ya jiín de jeē ní casáha de sɨ́ɨn sɨ́ɨn jniñu jéhnu jeē nahán náā ni yō jíto yó poder yā. Te suni ni jēhe ya Espíritu Santo yā nuū ɨ́ɨn ɨɨn yó, ndese ni nujnahan ni maá yá sáha yó. Jeē ní nduu Jesús jnáhan ñayuu

⁵Te Yaā Dios nasūu núū ndajéhé yā ni jéhe ya jnūhun jeē condiso jníñu sɨquɨ̄ ñayɨ̄vɨ jéē quíji, chi sa suhva nuū Séhe ya Cristo ni jēhe ya. Te sɨquɨ̄ ñayɨ̄vɨ́ un cúu jeē cahán rī yāhá.

⁶Chi suhva yósó núū tútu jeē ni cáhān David jiín yá:¿Na vé cúu ñayuu jeē ñúhun ni ní i?Te ndɨ́hvɨ́ ni ni sɨ́quɨ̄ i, te máá ñáyuu cúu i.

⁷Chi jecu‑ni tiempo ni sáha ní jeē núu i nuū tācá ndajéhé ni.Yūcuán na te sajéhnu ní i te squéndōo yɨ́ñúhún ní i,te cani ní i jeē ndacu i jniñu nuū tāca jéē ni sáha ní.

⁸Te ndɨhɨ jeē iyó chi sáha ní jéē cujéhnu i sɨquɨ̄. Achí tutu. Te jeē ni sáha Yaā Dios jeē cujéhnu i sɨquɨ̄ ndɨhɨ, núu súcuan te ma quéndōo ni ɨɨn jeē ma cújéhnu i sɨquɨ̄. Te vēsú súcuan te vijna te ná tu coto yó jéē cujéhnu i sɨquɨ̄ ndɨhɨ jeē iyó.

⁹Te jeē jiní yō vijna cúu Jesús, Yaā jeē ní nduu núu jecu‑ni tiempo nuū tācá ndajéhé yā. Chi ni ndoho ya jeē ni jíhī yā jehē yō, te jeē yúcuan ní ndujéhnu luu tucu ya, te ndɨhɨ cáhīyo yɨ́ñúhún núū yā. Chi jeē váha ni Yaā Dios jiín yó, jeē yúcuan ní jihī Jesús jehē yō.

¹⁰Te ndɨhɨ jeē iyó chi cuenta Yaā Dios cúu, chi máá yá ni sáha. Te suni ndéca ya cuehē ndasɨ́ séhe ya jeē quihín i andɨvɨ́ núū luu cujéhnu i jíín yá. Te vāha níhín jníñu jeē ni jéhe ya jnūndóho nuū Jesús, chi jeē ní ndoho ya súcuan te cuu condeca vāha ya ñayuu ní jnama ya.

¹¹Chi Jesús jeē ni sándoo ya i te máá i jeē ní candundoo i, chi ɨɨn‑ni Tátá i jíín yá. Te jeē yúcuan tu cúcanu Jesús jeē cahán yā hermano yā jiín i, vēsú ndasɨ́ núu i.

¹²Chi yósó núū tútu jeē ni cáhān yā jiín Tátá yā:Cachi na jnúhun ní núū tācá hermano na,te mēhñu núū cándutútú i cata ná ndese cújéhnu ní.

¹³Te suni cáhán yā nájnūhun cácahān hermano yā:Ruhū chi cándíje ri yā. Te cáhán tucu yā:Yāha íne ri jiín táca gá sēhe Yaā Dios jeē ni jéhe ya nuū rī. Achí Jesús.

¹⁴Te nájnūhun cácacu ñayuu jeē cúu i yɨquɨ cúñu, suni súcuan ni cacu Jesús, návāha cuu yā jehē yō. Te súcuan ni snáā yā poder jexeén jeē squɨ́vɨ ñayuu nuū cuéchi te jíhí i.

¹⁵Te ni cacu ya súcuan návāha cuu quenehen ya tāca ñáyuu chīji jnūhun jeē yuhú i cuu i. Chi nɨ́ɨ́ vida i ndóho i sáha ún.

¹⁶Te jendaá tu ní quíji ya jeē chindéé ñáhán yá tācá ndajéhé yā, chi sa suhva jeē chindéé ñáhán yá ñayuu cácandíje jeē ní nduu yucūn Abraham.

¹⁷Jeē yúcuan ní jini ñúhún nduu ɨnuú yá jiín táca hermano yā, návāha cuu ya sutū cujéhnu jeē squícu vāha ya tācá jniñu jehē i nuū Yaā Dios. Chi ni cundáhú ni yā i, te ni ndahva yā cuēchi i jeē ni sócō yā maá yá jehē i.

¹⁸Chi suni máá yá ni ndoho ya jeē ní jito ndee jnūndóho ya, te jeē yúcuan cuu chindéé ñáhán yá ñayuu jeē jíto ndee jnūndóho i. Cújéhnu ga Jesús vēsú Moisés