Read Mixtec Apocalipsis (de Juan) 11 Bible Online

Apocalipsis (de Juan) 11 - Mixtec bible

Apocalipsis (de Juan) 11

¹Yūcuán na te ni cajēhe ɨɨn yujnu nuū rī, jeē cúu ɨɨn cūhva jeē chícuāha. Te ni cacahān jiín rí: Ndocuɨñɨ̄ te chicuāha ró templo cáhnu Yaā Dios jiín altar, te cahu ró nasaa ñayuu cúu jeē cáchiñúhún núū yā yūcuán.

²Te ma chícuāha ró patio yatā templo. Chi je ni jēhe ya nuū ñáyuu tācá ñuu jicá. Te coyūcú i ini ñuu iī yāhá, te uū xico uū yoō cueñū i sɨquɨ̄ ñuu.

³Te tají rí uū testigo rī jeē nácani jnūhun ri mil uū ciento unī xico quɨvɨ̄. Te cuhun de sahma ndáyɨ́ jéē cácucuíhyá ni de sɨquɨ̄ cuéchi ñayuu, achí yá.

⁴Te ndɨndúú testigo un cúu nájnūhun ndɨndúú yujnu olivo jiín ndɨndúú candelero jeē íin nuū Yaā Dios, Yaā chií ñayɨ̄vɨ́.

⁵Te na‑ni ñayuu núu nducú sáha ndevāha jíín ndɨndúú testigo un, te quenda ñuhūn yuhu ndɨndúú de, te cayū ndɨhɨ ñayuu cájito uhū i de. Te súcuan cuu tāca ñáyuu jeē nducú sáha ndevāha jíín de.

⁶Te íyó poder ndɨndúú testigo un jéē cásɨ de jeē ma cúun saū nɨɨ́ tiempo jeē nácani de jnūhun ya. Te suni íyó poder de sáha de jeē nduu nɨñɨ̄ tācá ndute. Te cuu stɨ́vɨ de ñayɨ̄vɨ jíín ndɨnuū jnūndóho, núu nasaa jínu cácuni de.

⁷Te ná ni jīnu ni canacani de jnūhun ya, yūcuán na te quenda quɨtɨ xéén jeē néne tūhnchi ún. Te cuajnáhan jíín ndɨndúú de, te cundeyɨ́ jíín de, te cahni de.

⁸Te ndɨ̄yɨ ún cava nuū yáhu ñuu cáhnu nuū ní cajehni i máá Jítoho yō jicā cruz. Te ñuu un cácahān yatá i jeē ñuu Sodoma jiín Egipto cúu, sɨquɨ̄ jeē xeēn cuēchi íyó ñuu ún.

⁹Te ñayuu tācá ñuu, tāca yúcūn, tācá yuhu, tācá nación, chi coto i jeē cáva ndɨndúú ndɨ́yɨ un únī quɨvɨ̄ yosáva, te ma cuáha i jnūhun jeē quíndūji.

¹⁰Te ñayuu nɨɨ́ cáhnu ñayɨ̄vɨ́ cusɨɨ̄ ndasɨ́ ni i jeē ní cajihī de, te sáha i vico, te cuāha i regalo nuū jnáhan i. Chi ndɨndúú tée ni canacani jnūhun ya ún, ní casáha de jeē ní candoho ndasɨ́ ñáyuu ñayɨ̄vɨ́.

¹¹Te jeē yáha unī quɨvɨ̄ yosáva ún, te Yaā Dios sáha ya jeē nastáa tachī de, te ndonda‑ni de. Te yūhú ndasɨ́ ñáyuu coto i jeē ní canatecu de.

¹²Yūcuán na te cuni sōho de jeē cána jee ichi ándɨvɨ́: Caa ró quijicoo ró ndé yāhá, áchí. Te ndaa de mēhñu vícō quingoo de andɨvɨ́, cuni ñayuu cájito uhū i de.

¹³Te máá hora un jnáa ndasɨ́, te ndicó cáva naa ɨɨn jeē uxí parte ñuu ún. Te jíín ñujnáa ún cuu uxā mil ñayuu. Te tāca gá ñayuu jeē ndóo, yūhú ndasɨ́ i, te cahān i jeē cujéhnu Yaā Dios jeē ndeé andɨvɨ́.

¹⁴Súcuan yāha jnūndóho uū, te yachī coo jnūndóho unī. Sɨquɨ̄ trompeta uxā

¹⁵Te ndajéhé uxā ni tɨvɨ yā trompeta. Te ni jini sōho ri ni cacahān jee ichi ándɨvɨ́. Te súcuan ni cacahān:Tācá nación ñayɨ̄vɨ́ je ni nuquɨhɨ ndaha máá Jítoho yō Yaā Diosjiín Cristo jeē ní tají yá.Te ndacu ya jniñu nɨ́ɨ́ cáni cuɨtɨ. Achí.

¹⁶Yūcuán na te ndɨhócó cuūn tēe jéhnu cándiso jníñu jeē cánene de mesa de ichi núú Yaā Dios, ni cajecuɨñɨ̄ yɨtɨ́ de, ni cachiñúhún de ya.

¹⁷Te ni cacahān de:Na cútahū na núū ní, Tátā Yaā Dios,chi máá ní jnɨ́ɨ ndɨhɨ poder,te cúu ní Yaā iyó vijna, te ni īyo ní nɨ́ɨ́ cáni, te coo ní nɨ́ɨ́ cáni.Te ni najnɨɨ ní ndɨvii jeē iyó,te jíín poder ni ní quejéé ní ndácu ní jniñu nuū.

¹⁸Ñayuu tācá nación ni caquɨtɨ̄ ni i sɨquɨ̄ ní.Te vijna chi ni quee quɨvɨ̄ jeē cuáha ní castigo i,jíín jéē sándaā ní jniñu tāca ndɨ́yɨ.Te cuāha ni táhū nuū tāca mozo ni jéē ní canacani jnūhun ní,jíín núū tāca ñáyuu cájejníñu nuū ní, jíín ñáyuu cáchiñúhún núū ní,cúu ñayuu cácujéhnu jíín jéē tuú.Te vijna te snáhnú ndetū ni ñáyuu castɨ́vɨ ñayɨ̄vɨ́. Achí de jíjnáhan de.

¹⁹Yūcuán na te ni nune templo Yaā Dios jeē iyó andɨvɨ́. Te ni cajito ñayuu jeē yúcuan íne yejnū jeē ñúhun contrato yā. Te ni ndindēé taja, te nɨ́hɨn, te cáhán taja, te ni jnāa, te ni cuun xeēn ñɨñɨ́. Jnūhun ñahan jíín cóō cáhnu