Read Mixtec Apocalipsis (de Juan) 5 Bible Online

Apocalipsis (de Juan) 5 - Mixtec bible

Apocalipsis (de Juan) 5

¹Yūcuán na te ni jito ri jeē Yaā néne mesa jeē ndácu jniñu, ndaváha ya jnɨ́ɨ ya ɨɨn tutu cáni jeē ní tuu. Te yósó jnúhun ndɨndúú lado tutu ún, te ndíhyú jiín úxā sello.

²Te ni jito ri ɨɨn ndajéhé yā jeē ndíso poder, te ni cahān jee: ¿Ndé ɨɨn cúu tēe vāha ndasɨ́ jeē cóndiso jníñu cahnde sello te nune tutu yáha? áchí ndajéhé yā.

³Te ni andɨvɨ́ ni ñayɨ̄vɨ́ ni jeē iyó chíji ñayɨ̄vɨ́, tu ní íyo ni ɨɨn jeē cóndiso jníñu nune tutu ún, ni jeē cóto nuū.

⁴Te ni ndahyū ndasɨ́ rí, chi tu ní íyo ni ɨɨn jeē cóndiso jníñu nune te cahu tutu ún, ni jeē cóto nuū.

⁵Yūcuán na te ni cahān ɨɨn tēe jéhnu un jíín rí: Ma ndahyú rō, chi íyó ɨɨn Yaā ndíso jníñu jeē cahnde yā ndɨhúxá sello ndihyú tutu, te nune ya. Te máá yá chi íyó cuéhē poder yā, nájnūhun jeē iyó cuéhē fuerza ɨɨn ndɨcaha. Te ni cacu ya chīji yucūn Judá, jeē cúu yucūn rey David. Te ni snáā yā poder tāca jéneé.

⁶Yūcuán na te ni jito ri Yaā jeē cúu Londe Yaā Dios jeē ní cajehni i te ni natecu. Te Londe un íin ya nuū íin mesa Yaā Dios, mēhñú ndɨcúún jeē técu, jiín tée jéhnu cándiso jníñu. Te íyó úxā ndɨquɨ jíín úxā tɨnūú Londe ún. Te tɨnūú un cúu ndɨhúxá Espíritu Yaā Dios jeē ní tají yá ni jengoo nɨ́ɨ́ cáhnu ñayɨ̄vɨ́.

⁷Te Londe un ní jequīhin ya tutu jeē jnɨ́ɨ ndaváha Yaā jeē néne nuū mesa.

⁸Te ná ni quihin ya tutu ún, te ndɨcúún jeē técu jiín ndɨhócó cuūn tēe jéhnu cándiso jníñu, ni cajecuɨñɨ̄ yɨtɨ́ núū yā. Te ná ɨɨn ná ɨɨn tēe jéhnu un cándaha yaa jeē naní arpa, jíín cóhō cūu oro jeē ñúhun chitú súje cutú. Te sūje cutú un cúu máá táca jnúhun jeē cájicān tahú ñayuu yɨ́hɨ ndaha Yaā Dios.

⁹Te ni cajita de ɨɨn yaa jeé, te suhva cáhán:Vāha ndasɨ́ Yaā cúu ní jéē quihin ní tutu te cahnde ni sello jeē ndihyú.Chi ni cajehni i níhín, te jíín nɨ́ñɨ̄ ni ní nacuaan ní ñayuumēhñu táca raza, tācá yuhu, tācá ñuu, tācá nación, návāha cuu i ñayuu Yaā Dios.

¹⁰Te ni sáha ní jéē cuu i rey jiín sútū nuū Yaā Dios,te ndacu i jniñu ini ñayɨ̄vɨ́. Achí de cájita de.

¹¹Te ni jito ga rī, te ni jini sōho ri jeē cácahān cuehē ndajéhé yā jeē ní cajicó ndúū xiin mesa yā, jiín xiin ndɨcúún jeē técu, jiín xiin tēe jéhnu cándiso jníñu. Te íyó cuéhē ndasɨ́ millón ndajéhé un.

¹²Te suhva ni cacahān jee ya:Vāha ndasɨ́ Yaā cúu Londe jeē ní cajehni i.Te jeē yúcuan jnɨ́ɨ ya poder, te yōhyo cúcá yá,te yōhyo ndíchí yá, te ndíso ya cuehē fuerza,te cáhīyo yɨ́ñúhún ndɨhɨ nuū yā, te luu cújéhnu ya,te cácahān i jeē váha ndasɨ́ Yaā cúu ya. Achí.

¹³Te suni ni jini sōho ri jeē cácahān ndɨhɨ jeē ni sáha Yaā Dios jeē iyó ini andɨvɨ́ jíín ini ñayɨ̄vɨ jíín chīji ñayɨ̄vɨ jíín ini mar. Te ndɨvii un ní cacahān:Cúsɨɨ̄ ni yō cahán yō jeē yóhyo vāha Yaā cúu máá Yaā néne mesa nuū ndácu ya jniñu,jíín Yaā cúu Londe Yaā Dios.Te na cóo yɨ́ñúhún yó núū yā, chi cújéhnu luu ya,te jnɨ́ɨ ya poder nɨɨ́ cáni cuɨtɨ. Achí.

¹⁴Te ni cacahān ndɨcúún jeē técu: Súcuan na cóo, áchí. Te ndɨhócó cuūn tēe jéhnu cándiso jníñu ni cajecuɨñɨ̄ yɨtɨ́ de, te ni cachiñúhún de nuū Yaā jeē técu nɨɨ́ cáni cuɨtɨ. Sɨquɨ̄ ndɨhúxá sello