Read Mixtec Apocalipsis (de Juan) 6 Bible Online

Apocalipsis (de Juan) 6 - Mixtec bible

Apocalipsis (de Juan) 6

¹Yūcuán na te ni jito ri jeē Yaā cúu Londe Yaā Dios, ni jehnde yā ɨɨn jeē uxá sello un. Te ni jini sōho ri jeē cahán ɨɨn jnáhan ndɨcúún jeē técu ún, nájnūhun cáhán taja: Nehen te cuni rō.

²Te ni ndacoto ri, te ni jito ri ɨɨn caballo cuijín. Te jeē yosó sɨ́quɨ̄ tɨ̄ un ndáhá ɨɨn arco jeē stáva nduva. Te ni jecūhun ɨɨn corona xinī. Te ni quenda ni jejnáhan, te ni cundeyɨ́ sɨ́quɨ̄ ndɨhɨ.

³Yūcuán na te Londe un ní jehnde yā sello uū. Te ni jini sōho ri jeē cahán ɨnga jnáhan ndɨcúún jeē técu: Nehen te cuni rō.

⁴Te ni quenda ɨɨn caballo cuehé, te jeē yosó sɨ́quɨ̄ tɨ̄ ndíso jníñu jeē snáā jnūhun cáyūcu mánī ñayuu ñayɨ̄vɨ́, te quejéé i cahni jnáhan i. Te ni nihīn ún ɨɨn espada cáhnu.

⁵Yūcuán na te Londe un ní jehnde yā sello unī. Te ni jini sōho ri jeē cahán ɨnga jnáhan ndɨcúún jeē técu: Nehen te cuni rō. Te ni ndacoto ri, te ni jito ri ɨɨn caballo jnuú. Te jeē yosó sɨ́quɨ̄ tɨ̄ ndáhá ɨɨn balanza jeē chícuāha, chi coo jnamā xeēn.

⁶Te mēhñú ndɨcúún jeē técu un ní jini sōho ri ɨɨn jeē cahán: Máá ɨɨn kilo‑ni trigo nihīn i jíín yáhu i jeē sájniñu i ɨɨn quɨvɨ̄. Te núu cebada, te unī‑ni kilo nihīn i jíín yáhu i jeē sájniñu i ɨɨn quɨvɨ̄. Te aceite jiín vino chi ma sáha ró jéē cúmanī. Achí.

⁷Yūcuán na te Londe un ní jehnde yā sello cuūn. Te ni jini sōho ri jeē cahán tucu ɨnga jnáhan ndɨcúún jeē técu: Nehen te cuni rō.

⁸Te ni ndacoto ri, te ni jito ri ɨɨn caballo cuaán yaa, te jeē yosó sɨ́quɨ̄ tɨ̄ cúu máá cuéhyɨ̄ jéhni ñayuu. Te ichi yátá un ndíquín máá jnúhun jeē quɨ́vɨ ñayuu lugar nuū cáyūcu ánuá ndɨ̄yɨ. Te ndɨndúú un cándiso jníñu jeē ndónda sɨquɨ̄ ɨɨn jeē ndɨcúún parte ñayɨ̄vɨ́, te cuu sáha jeē cúū ñayuu jiín guerra, jiín jnámā, jiín cuéhyɨ̄ xeén, jiín táca quɨtɨ xéén jeē iyó ñayɨ̄vɨ́.

⁹Yūcuán na te Londe un ní jehnde yā sello uhūn. Te chīji altar cáhnu ni jito ri anuá ñayuu jeē ní cacandíje jnūhun Yaā Dios te ni canacani ndaā i jnūhun ya, te sɨquɨ̄ yūcuan ní cajehni ñayuu i.

¹⁰Te ni cacana jee ánuá un: Jitoho ná Yaā Dios, maá ní cúu Yaā ndoo te vāha squícu ní jéē ni jéjnūhun ní. ¿Te nasaa ga tiempo coo te sándaā ni jéhē ná, te nacuāha ní jéē ndútahū ñayuu ñayɨ̄vɨ jéē ní cajehni sāñá? áchí.

¹¹Yūcuán na te ni jēhe ya sahma cuijín cuhun i jíjnáhan i, te ni cahān yā jiín i jeē na ndétātú i jecu gā tiempo. Chi íyó gá hermano i jeē cájejníñu nuū yā, jeē suni jíni ñúhún cuu i návāha jīnu número i, áchí yá.

¹²Yūcuán na te Londe un ní jehnde yā sello iñū. Te ni jito ri jeē ni jnáa ndasɨ́. Te ni cujnúú níāndii nájnūhun ɨɨn sahma jnúú. Te nɨ́ɨ́ yóō ni nduu nájnūhun nɨñɨ̄.

¹³Te quɨ̄mɨ andɨvɨ́ ní nɨngoyo nuū ñúhun nájnūhun nɨ́ngoyo ndehē yɨ̄hɨ́ yujnu higo sáha tachī níhin.

¹⁴Te andɨvɨ́ ní cujiyo cuahān nájnūhun jeē nátuu ɨɨn tutu cáhnu. Te tācá yucu jíín táca isla ni cujiyo cuangoo ɨnga lado.

¹⁵Te tāca rey ñayɨ̄vɨ́, jíín jéē cácujéhnu, jíín jéē cucá, jíín táca capitán, jiín jéē cándiso poder, jiín mozo jeē ní cajeen ñayuu, jiín tée cásájniñu cuenta maá, ní cachisāhi máá ini yaū cava jíín méhñu cava chīji yucu.

¹⁶Te ni cacahān i jíín yucu jíín cava: Ndicó cáva sɨquɨ̄ rī, na quɨ́sāhi rí návāha tú coto máá Yaā néne mesa ndácu jniñu, jíín Yaā cúu Londe jeē cuáha ya castigo xeēn ruhū.

¹⁷Chi ni quee maá quɨ́vɨ̄ cáhnu jeē cuáha ya castigo, ¿te ndé ɨɨn canda condichi nuū yā? achí i jíjnáhan i. Ñayuu tāca yúcūn Israel jeē ni jécondee sello jneē