Read Mizo Lushai Genesis 1 Bible Online

Genesis 1 - Mizo Lushai bible

Genesis 1

¹A tîra Pathianin lei leh vân a siam khân

²khawvêl chuan mu leh mal a la nei lo va, tuithûkpui chung pawh a thim mup a, Pathian Thlarau chuan tui chung chu a vil reng a.

³Pathian chuan, “Êng lo awm rawh se,” a ti a, êng a lo awm ta mai a.

⁴Pathianin êng a hmuh chuan ṭha a ti hle a, êng leh thim chu a ṭhen hrang a.

⁵Pathianin êng chu ‘chhûn’ a vuah a, thim chu ‘zân’ a vuah a. Tlai a lo ni a, zîng a lo ni leh a: a ni khatna chu.

⁶Pathian chuan, “Tui leh tui ṭhen tûrin boruak zau tak vân kumkulh awm rawh se,” a ti a.

⁷Pathian chuan vân kumkulh chu a siam a, kumkulh chunga tui awm leh a hnuaia tui chu a ṭhen ta a; chutiang chu a ni ta mai a.

⁸Pathianin kumkulh chu ‘vân’ a vuah a, tlai a lo ni a, zîng a lo ni leh a: a ni hnihna chu.

⁹Pathian chuan, “Vân hnuaia tui chu hmun khatah tling khâwm sela, khawmual lo lang rawh se,” a ti a. Chutiang chu a ni ta mai a.

¹⁰Pathianin khawmual chu ‘lei’ a vuah a, tui tling khâwm chu ‘tuifinriat’ a vuah a. Pathianin a han en a, ṭha a ti hle a.

¹¹Pathian chuan, “Leiah thlai, a fang neia rah chi tinrêng te, thei, a mu neia rah chi hrang hrang ṭo ṭeuh rawh se,” a ti a. Chutiang chu a ni ta mai a.

¹²Lei aṭang chuan thlai tinrêng, fang neia rah chi tinrêng te, thei, mu neia rah hrang hrang te a lo ṭo ta a.

¹³Pathianin a han en chian chuan ṭha a ti hle a. Tlai a lo ni a, zîng a lo ni leh a: a ni thumna chu.

¹⁴Pathian chuan, “Chhûn leh zân awmtîr tûrin vân kumkulhah êntute awm teh se, chûng chu hun bi, ni te leh kum chhiar nân te ni sela,

¹⁵lei tiêng tûrin êntute chu vân kumkulhah chuan awm rawh se,” a ti a. Chutiang chu a ni ta mai a.

¹⁶Pathian chuan êntu lian pui pahnih leh arsite a siam a; êntu lian zâwk chu chhûna êng tûrin a ti a, a tê zâwk chu zâna êng tûrin.

¹⁷Lei ên tûr chuan Pathianin vân kumkulhah chuan êntute chu a dah a,

¹⁸thim leh êng ṭhena, chhûna êng tûr leh zâna êng tûrin. Pathian chuan a han en a, ṭha a ti hle a.

¹⁹Tlai a lo ni a, zîng a lo ni leh a: a ni lina chu.

²⁰Pathian chuan, “Tuiah nungcha awm noh noh sela, vân kumkulh hnuaia lei chungah sava thlâwk sup sup bawk rawh se,” a ti a. Chutiang chu a ni ta mai a.

²¹Pathian chuan tuifinriata sa hlauhawm pui pui te, a ruala lêng dûl dûl tinrêng te leh sava thla nei chi hrang hrangte chu a siam a. Pathianin a han en a, ṭha a ti hle a.

²²Pathian chuan mal a sâwm a, “Inthlah pung zêl ula, pung duah duah rawh u, tuifinriatah khat ula; leia savate pawh pung chiam rawh se,” a ti a.

²³Tlai a lo ni a, zîng a lo ni leh a: a ni ngana chu.

²⁴“Leian thil nung tinrêng, ran te, ramsa te, leia vâk chi te lo awm noh noh rawh se,” a ti a. Chutiang chu a ni ta mai a.

²⁵Pathian chuan ramsa te, ran te leh leia vâk chi te, thil nung tinrêng te chu a siam a. Pathianin a han en chuan ṭha a ti hle a.

²⁶Tin, Pathian chuan, “Keimahni ang, kan anpuiin mihring siam ila, tuifinriata sangha te, chunglêng sava te, ran te, ramsa te leh leia vâk chi zawng zawng chungah te thu nei teh se,” a ti a.

²⁷Pathian chuan amah angin mihring, mipa leh hmeichhia a siam a, Pathian anpui ngeiin a siam a ni.

²⁸Pathian chuan anni chu mal a sâwm a, an hnênah, “Fanau neiin lo pung deuh deuh rawh u; lei hi luah khat ula, nei vek rawh u; tuifinriata sangha te, chunglêng sava te leh leia thil nung awm zawng zawng chungah thu nei bawk rawh u,” a ti a.

²⁹Pathian chuan heti hian a ti bawk: “Ngai teh u, in ei atân leia thlai, a fanga rah te; thei, a mu neia rah te ka pe a che u;

³⁰leia ran zawng zawng te, chunglêng sava te leh nungcha lei chunga vâk chi te ei atân hnimhring ka pe bawk a ni,” tiin. Chutiang chu a ni ta mai a.

³¹Pathian chuan a thilsiam zawng zawng chu a hmuhin ṭha a ti êm êm a. Tlai a lo ni a, zîng a lo ni leh a: a ni rukna chu.