Read Mizo Lushai Genesis 11 Bible Online

Genesis 11 - Mizo Lushai bible

Genesis 11

¹Khawvêl pum puiah ṭawng khat an hmang a, an awphawi pawh a inang vek a.

²Khawchhak lam aṭangin mi an lo pêm a, Sinar phai

³“Hawh u, leirawhchan siam ila, chang takin i rawh ang u,” an ti a. Lung aiah leirawhchan chu an hmang a, hlum banin an châr a.

⁴“Hawh u, khawpui i din ang, in sâng tak, vân tawng sa ila, hmingṭha i chher ang u; chutilo chu, khawvêlah kan awm darh zo dah ang e,” an ti a.

⁵Lei miten khawpui an siam leh in sâng an sa chu en tûrin LALPA chu a lo chhuk a.

⁶“Ṭawng khat hmang, hnam pumkhat thiltih duh dân heti hi a nih si chuan an tum ang ang tih theih loh an nei lo mai ang a!

⁷An thu sawi inhre tawn lo tûrin hawh u, an ṭawng i zu tihhransak ang u,” a ti a.

⁸LALPA chuan chuta ṭang chuan khawvêl pum puiah a hnawt darh a, khua chu an sa thei ta lo va.

⁹Chuvâng chuan, chu hmun chu ‘Babel’ tih a ni ta a; khawvêl pum pui mite ṭawng chu inhre tawn thei lovin LALPA chuan a tihrang ta a; chuta ṭang chuan ram tinah a hnawt darh ta a.

¹⁰Hei hi Sema thlah chhâwng zêlte chanchin chu a ni: Tuilêt zawh kum hnih hnua a fapa Arpaksada a pian khân Sema chu kum za a ni tawh a.

¹¹Arpaksada pian hnuin Sema chu kum zanga chhûng a dam a, fanu fapa dangte a nei a.

¹²Kum sawmthum leh panga a nihin Arpaksada chuan fapa Sela a nei a,

¹³Sela a pian hnu chuan Arpaksada chu kum zali leh pathum chhûng a la dam a, fanu fapa dangte a nei a.

¹⁴Kum sawmthum a nihin Sela chuan fapa Ebera a nei a,

¹⁵Ebera pian hnu chuan Sela chu kum zali leh pathum chhûng a dam a, fanu fapa dangte a nei a.

¹⁶Kum sawmthum leh pali a nihin Ebera chuan fapa Pelega a nei a.

¹⁷Pelega pian hnu chuan Ebera chu kum zali leh sawmthum chhûng a dam a, fanu fapa dangte a nei a.

¹⁸Kum sawmthum a nihin Pelega chuan fapa Reua a nei a.

¹⁹Reua pian hnu chuan Pelega chu kum zahnih leh pakaw chhûng a dam a, fanu fapa dangte a nei a.

²⁰Kum sawmthum leh pahnih a nihin Reua chuan fapa Seruga a nei a,

²¹Seruga a pian hnu chuan Reua chu kum zahnih leh pasarih a dam a, fanu fapa dangte a nei a.

²²Kum sawmthum a nihin Seruga chuan fapa Nahora a nei a,

²³Nahora pian hnu chuan Seruga chu kum zahnih chhûng a dam a, fanu fapa dangte a nei a.

²⁴Kum sawmhnih leh pakua a nihin Nahora chuan fapa Tera a nei a.

²⁵Tera pian hnu chuan Nahora chu kum za leh sâwm pakaw chhûng a dam a, fanu fapa dangte a nei a.

²⁶Abrama te, Nahora te, Harana te an pian chuan Tera chu kum sawmsarih a tling tawh a.

²⁷Tera thlah zêlte chanchin chu hetiang hi a ni: Tera chuan fapa Abrama te, Nahora te, Harana te a nei a, Harana chuan fapa Lota a nei a.

²⁸Harana chu Kaldai ram Ur khuaah, a pianna ramah chuan, a pa Tera a la dam laiin a thi a.

²⁹Abrama leh Nahora chuan nupui an nei a: Abrama nupui hming chu Saraii a ni a, Nahora nupui hming chu Milkaii a ni. Milkaii leh Iskaii chu Harana fanu an ni.

³⁰Saraii chu a ching a, fa a nei lo.

³¹Tera chuan a fapa Abrama te, a tupa Lota, Harana fapa te, a monu Saraii, a fapa Abrama nupuite chu a hruai a, Kaldai ram Ur khua chu an chhuahsan a. Kanan rama kal tûrin an chhuak a; mahse, Haran khua an thlen chuan awmhmun an khuar ta a.

³²Tera chu kum zahnih leh panga chhûng a dam a, Haran-ah chuan Tera chu a thi ta a.