Read Mizo Lushai Genesis 12 Bible Online

Genesis 12 - Mizo Lushai bible

Genesis 12

¹ LALPA chuan Abrama hnênah “In ram hi i laichînte leh i pa inte nên chhuahsan la, ka kawhhmuh tûr che ramah chuan kal rawh.

²Hnam ropui takah ka siam ang che: mal ka sâwm ang che a, i hming ka tithang ang a, malsâwmna i ni ang.

³Malsâwmsaktu che chu mal ka sâwm ang a, ânchhe lawhtu che chu ânchhia ka lawh ang; khawvêla hnam tinrêng i zârah an nihlawh ang,” a ti a.

⁴ LALPA thu ang chuan Abrama chu a thawk chhuak a, Lota pawh a rual chuan a kal ve a. Haran a chhuahsan khân Abrama chu kum sawmsarih leh pangaa upa a ni.

⁵Abrama chuan a nupui Saraii leh a nau fapa Lota chu a hruai a, Haran khuaa an awm chhûnga an sum deh chhuah zawng zawng kengin, ṭhuihruai an neih belh tâk zawng zawng nên Kanan ram an pan a, an va thleng ta a.

⁶Chu ramah chuan Abrama chu a kal zêl a, Sekem hmun More sasaw thing awmna chu a thleng a. Chutih lai chuan Kanan mite chu chu ramah chuan an la awm a ni.

⁷Abrama hnênah LALPA chu a inlâr a, “He ram hi a ni i thlahte ka pêk tûr ram chu,” a rawn ti a. Chutah chuan a hnêna lo lang LALPA tân maichâm a siam a.

⁸Chuta ṭangin Bethel chhak lam tlângah a insawn a; tah chuan bûk a khuar a, khawthlang lamah Bethel a awm a, khawchhak lamah Ai khua. Chutah chuan LALPA tân maichâm a siam leh a, LALPA hming chu a lam ta a.

⁹Negeb ram panin zawi zawiin a insawn zêl a.

¹⁰Chu ramah chuan ṭâm a tla a, ṭâm chu a nat êm avângin Abrama chuan ṭâm tlân tûrin Aigupta ram a pan a.

¹¹Aigupta ram a thlen dâwn chuan a nupui Saraii hnênah, “Ngawi teh, i hmêlṭhatzia ka hria e.

¹²Aigupta miten an hmuh che chuan, ‘A nupui a ni,’ an ti ang a, min that mai ang a, nang an zuah si ang che; ‘A farnu ka ni,’ ti mai teh.

¹³Tichuan, nangmah avângin min ti ṭha ang a, min zuah dâwn nia,” a ti a.

¹⁴Abraman Aigupta ram a zu thleng a. Aigupta mite chuan a nupui chu hmêlṭha an ti êm êm a.

¹⁵Farawa khâwnbâwlte chuan an han hmu ve a, Farawa hriata an fak tâk êm avâng chuan Farawa inah chuan an la lût ta a.

¹⁶Amah avâng chuan Abrama chu an ti ṭha hle a; berâm te, ran te, sabengtung te, chhiahhlawh nula leh tlangvâl te, sabengtungpui te, sanghâwngsei te an pe a.

¹⁷ LALPA chuan Abrama nupui Saraii vâng chuan Farawa leh a chhûngte chu hri na tak a veitîr a.

¹⁸Farawa chuan Abrama chu a ko va, “Ka chunga i thiltih dân hi engtizia nge? I nupui a nih engtizia nge min hrilh loh?

¹⁹‘Ka farnu a ni,’ i ti a, nupuiah ka la lût mai a ni lâwm ni? I nupui hi hruai la, hawpui daih rawh,” a ti a.

²⁰Farawa chuan mi a tîr a, Abrama chu a nupui leh a neih zawng zawng nên an hnawt chhuak ta a.