Read Mizo Lushai Genesis 13 Bible Online

Genesis 13 - Mizo Lushai bible

Genesis 13

¹Aigupta ram aṭang chuan Abrama chu Negeb-ah, a nupui leh a neih zawng zawng nên, an chho va, Lota pawh a tel zêl a.

²Abrama chuan tangkarua leh rangkachak te leh ran rualte a ngah êm êm a.

³Negeb aṭang chuan a bûk khuarna hmun Bethel leh Ai inkâr panin Bethel lamah a inchhawp chho va.

⁴A hmaa maichâm a siamna hmun kha a thleng a; tah chuan, LALPA hming a lam a.

⁵Abrama kalpui Lota pawh chuan berâm te, bâwng te a ngah hle a, chhûng hung tak an ni ve tawh a.

⁶Ran vulh an ngah êm a, awm dûn tûr chuan ramin a daih ta lo va; an awm ho hlei thei ta lo va ni.

⁷Abrama ran pute leh Lota ran pute inkârah innghirnghona a chhuak ta a. Chutih laiin chu ramah chuan Kanan mi leh Periz mite pawh an la awm si a.

⁸Abrama chuan Lota hnênah, “Nang leh kei, kan inkârah innghirnghona awm lul suh se, pafa kan nih hi.

⁹Ram lah hei a awm duai a, awm hran zai rêl mai teh; vei lam hi i duh zâwk leh ding lamah ka kal ang a, ding lam i duh zâwk leh vei lam ka pan mai ang,” a ti a.

¹⁰Lota chuan a han thlîr vêl a, Jordan lui ruam chu Zoar thlengin LALPA huan ang mai, Aigupta ram anga ram ṭha, tui ṭhatna ram a ni tih a hmu a, Sodom leh Gomora pawh LALPA chuan a la tichhe si lo va.

¹¹Lota chuan Jordan lui ruam chu awmna atân a thlang a, khawchhak lam chu a pan a, an awm hrang ta a.

¹²Abrama chu Kanan ramah chuan a awm ta zêl a, Lota chuan phai ram khawpui zîngah, Sodom khaw bulah awmhmun a khuar ta a.

¹³Sodom mite chu LALPA ngaiha mi sual buru tak an ni.

¹⁴Lota a awm hran tâk hnu chuan LALPA chuan Abrama hnênah, “Han hawi kual la, chhim leh hmâr lam te, chhak leh thlang lam te thlîr vêl teh.

¹⁵I hmuh phâk ram zawng zawng hi i thlahte pawhin an neih kumkhua atân ka pe ang che.

¹⁶Leia vaivut anga tamin i thlahte ka tipung ang a, vaivut chhiar sên loh ang hian chhiar sên an ni lo vang.

¹⁷Tho la, ram dung leh vâng hi fang chhuak teh, ka pêk tawh che hi,” a ti a.

¹⁸Abrama chuan a puan in a sawn a, Mamre sasaw bul, Hebron kiangah awmhmun a khuar ta a. Chutah chuan LALPA tân maichâm a siam a.