Read Mizo Lushai Genesis 14 Bible Online

Genesis 14 - Mizo Lushai bible

Genesis 14

¹Sinar lal Amrafela te, Elasar lal Arioka te, Elam lal Kedorlaomera te, Goim lal Tidala te pali chuan,

²Sodom lal Bera te, Gomora lal Birsa te, Adma lal Sinaba te, Zeboim lal Semebera te leh Zoar an tih tâk Bela lalte an rawn rûn a.

³Hêng lal pangate hi Sidim ruam, Tuipui Thi ruamah an lo ṭang tlâng a.

⁴Kum sâwm leh pahnih chhûng chu Kedorlaomera hnuaiah an awm a, a kum sâwm leh pathum kum chuan an hel a.

⁵Kum sâwm leh pali kum chuan Kedorlaomera leh a thurualpui lalte chu an lo thawk a, Asterot-Karnaim rama Refa-hote, Ham rama Zuzim-ho te, Seva-kiriathaim rama Enim-ho te leh

⁶thlalêr depa awm El-paran lui, Seir tlângrama awm Hor-ho te thleng chuan an rawn hneh a.

⁷An hawn pah chuan Kades an tih tâk En-mispat lamah an kual a, Amalek-ho ram zawng zawng leh Zazon-tamar rama Amor-ho te an tudawl bawk a.

⁸Chûng avâng chuan Sodom lal te, Gomora lal te, Adma lal te, Zeboim lal te, Zoar an tih tâk Bela lalte chu an lo thawk a, Sidim ruamah ṭan an lo khawh tlâng a.

⁹Tichuan, Elam lal Kedorlaomera te, Goim lal Tidala te, Sinar lal Amrafela te, Elasar lal Arioka te pali chu hêng lal pangate hian an lo bei a.

¹⁰Sidim ruamah chuan alkatra khur a awm thluah a, Sodom leh Gomora lal tlânchhia chu chûngah chuan an biru a; mi dang pawh an tlânchhia a, tlângramah an biru a.

¹¹Sodom leh Gomora mite thil neih zawng zawng, an buh te nên an mansak a, an ṭinsan ta a.

¹²Abrama nau fapa Lota, Sodom khuaa awm pawh kha, a neih zawng zawng nên an man bawk a.

¹³Indonaa tlânchhia pakhat chuan chûng thu chu Hebrai-pa Abrama chu a rawn hrilh a. Chutih lai chuan Eskola leh Anera laichîn Amor mi Mamre-a sasaw kûng bulah Abrama chu a awm a.

¹⁴Abrama chuan a nau fapa Lota chu salah an man tih a hriat chuan a ina piang râlkai tawh mi zathum leh sâwm leh pariat a hruai a, Dan thlengin a ûmzui a.

¹⁵Zâna hmêlma bei tûra ruat, ama hote chuan an hneh a, Damaska hmâr lam Hoba khaw thlengin an ûm a.

¹⁶An sum lâk zawng zawng chu an chhuhsak a, a nau fa Lota leh a neih zawng zawng chu hmeichhia leh mi dangte nên a hruai haw leh ta a.

¹⁷Kedorlaomera leh a thurualpui lalte hneha a lo haw chu Sodom lal chuan Save ruamah a lo hmuak a, chu hmun chu ‘lal ruam’ an ti bawk.

¹⁸Salem lal Melkisedeka pawhin chhang leh uain kengin a rawn hmuak bawk a, ani chu Pathian Chungnungbera puithiam a ni.

¹⁹Mal a lo sâwmsak a, “Pathian Chungnungbera, lei leh vân neitu chuan Abrama hi malsâwm rawh se.

²⁰A hmêlmate ngamtîrtu Pathian Chungnungbera chu Fakin awm rawh se,” a ti a. Abrama chuan a râllâk engkim aṭang chuan ani chu sâwma pakhat a pe a.

²¹Sodom lal chuan Abrama hnênah, “Thil dang chu nei la, ka mite kha erawh chu mi pe kîr rawh,” a ti a.

²²Abrama chuan Sodom lal chu a chhâng a, “LALPA Pathian Chungnungbera, lei leh vân neitu hnênah

²³‘La zai khat tê pawh, pheikhawk hrui khat tê pawh, i ta rêng rêng pakhat mah ka la lo vang,’ tiin thu ka lo tiam tawh a ni; chutilo chu, ‘Abrama chu ka tihhausak alâwm,’ I ti dah ang e.

²⁴Ka miten an eiral tawh chu ei ral ni sela, a dang chu eng mah ka la lo vang; ka thurualpui Anera mite, Eskola mite leh Mamre-a mite erawh chuan an chanvo tûr chu la rawh se,” a ti a.