Read Mizo Lushai Genesis 15 Bible Online

Genesis 15 - Mizo Lushai bible

Genesis 15

¹Chûng thil hnuah chuan Abrama chu zêlin a awm a, LALPA chuan a rawn bia a. “Abram, thlaphâng suh, I tân phaw ka nih hi, I dawn tûr hi a ropui a ni,” a rawn ti a.

²Abrama chuan, “Aw LALPA Pathian, fa ka nei lo hlen mai dâwn a, ka rokhâwmtu tûr lah Damaska mi Eliezara daih a ni ang a, eng nge mi dawntîr ang?” a ti a.

³Abrama chuan a sawi zêl a, “Ngai teh, fa min pe si lo va, ka ina piang ka chhiahhlawhin ka ro a luah ngei dâwn mai,” a ti a.

⁴ LALPA chuan a rawn chhâng a, “Chu mi chu i roluahtu tûr a ni lo, nangma fa ngeiin i ro a luah ang,” a ti a.

⁵Pâwnah a hruai chhuak a, “Vân lam khi thlîr teh, arsite khi i chhiar sêng em?” a ti a. “Khiti zât khi i thlahte an la ni dâwn” a ti a.

⁶LALPA chu a ring a, chu chu a diknaah a lo pawmsak ta a.

⁷A hnênah chuan heti hian a ti ta a: “He ram hi neihtîr tûr chein Kaldai ram Ur khua aṭanga ko chhuaktu che LALPA kha ka ni,” a ti a.

⁸Ani chuan, “Aw LALPA Pathian, ka ta tûr a nih engtin nge ka hriat ang?” tiin a chhâng a.

⁹“Bâwngpa kum thum mi te, kêlpui kum thum mi te, berâmpa kum thum mi te, ṭhuro leh pârva no nên mi han lâk teh,” a ti a.

¹⁰Chûng chu a rawn lâksak a, a laiah a phel a, a phel chu inepin a tlarin a dah a; savate erawh chu a phel lo.

¹¹Sa ruangahte chuan mu an lo ṭum ṭhîn a, Abrama chuan a lo hnawt zêl a.

¹²Ni a tlâk dâwn suar suar chuan a muhîl ta sulh a, hlauhawm thim takin a rawn bawh ta a.

¹³Abrama hnênah chuan, “I thlahte chu an hriat ngai loh ramah mikhual an ni dâwn; bawihah an tâng ang a, kum zali chhûng chu an tiduhdah ang tih hre rawh.

¹⁴Rawng an bâwlsak hnamte chu ka hrem ang a, chumi hnuah chu ram chu muk ṭânin an chhuahsan ang.

¹⁵Nang erawh chu, thlamuang takin i pi leh pute hnênah i châwl ve ang a, tarkûna damin an phûm ang che.

¹⁶Mi dang erawh chu chhuan li a ral hunah hetah hian an lo kîr leh ang, Amor mite suahsualna vâwrtâwp a thlen hunah chuan,” a ti a.

¹⁷Ni a tlâka, khua a thim tâk hle hnuin thuk, khu lût lût leh meichher alh hluah hluah chu sa ruang kârah chuan a vei a vei a.

¹⁸Chumi zân chuan LALPAN Abrama hnênah thu a thlung ta a, “He ram hi i thlahte hnênah ka pe ta. Aigupta ram lui aṭanga Eufretis luipui inkâr ram,

¹⁹Ken mi te, Kenis mi te, Kadmon mi te,

²⁰Hit mi te, Periz mi te, Refaim te,

²¹Amor mi te, Kanan mi te, Girgas leh Jebus mi te ram hi,” a ti a.