Read Mizo Lushai Genesis 16 Bible Online

Genesis 16 - Mizo Lushai bible

Genesis 16

¹Abrama chu a nupui Saraii chuan fa a hrinsak lo va. Saraii chuan Aigupta mi, Hagari, bawih nula a nei a.

²Abrama hnênah Saraii chuan, “Ngai teh, LALPA chuan fa neih min phalsak si lo va, ka bawihnu hi mutpui mai teh; ka fa ve tûr min hrinsak dâwn nia,” a ti a. Abrama chuan Saraii thu chu a zâwm a.

³Tichuan, Abrama chu kum sâwm Kanan rama a awm hnu chuan a nupui Saraii chuan a bawihnu Hagari, Aigupta mi chu, hmei atân a pasal chu a neihtîr ta a.

⁴A lo mutpui a, nau a pai ta a. Nau a pai tih a inhriat hnu chuan a pi chu a ngainêp ta a.

⁵Tichuan, Saraii chuan Abrama hnênah, “Heti taka min thamlo ta hi i thiam loh a ni. Ka bawihnu hi keimah ngeiin hmeiah ka neihtîr che a nih kha; nau a pai tih a inhriat aṭangin min ngainêp ta hle si a; chuvângin, LALPA chuan nang nêna kan inkâr thu hi tifel teh se,” a ti a.

⁶Mahse, Abrama chuan Saraii chu a chhâng a, “I bawihnu chu i kuta awm alâwm, ṭha i tih ang angin ti rawh,” a ti a. Saraii chuan a tiduhdah ta a, a tlân bo phah ta hial a.

⁷ LALPA Vântirhkohvin Hagari chu thlalêrah Sur kawnga tuikhur kiangah a lo hmu a.

⁸A hnênah, “Saraii bawihnu Hagar, khawi aṭanga lo kal nge i niha, khawiah nge i kal dâwn?” a ti a. Ani chuan, “Ka pi Saraii ka tlân bosan a ni,” a ti a.

⁹LALPA Vântirhkoh chuan, “I pi hnênah kîr leh rawh, a hau che pawhin tuar hrâm hrâm rawh,” a ti a.

¹⁰LALPA Vântirhkoh chuan a sawi zêl a, “I thlahte ka tihpunsak ṭeuh dâwn che asin, tu man an chhiar sêng lo vang,” a ti a.

¹¹LALPA Vântirhkoh vêk chuan a sawi leh a, “Ngai teh, nau i pai hi; fapa i hring ang a, LALPA chuan i manganzia a hre si a, a hmingah Ismaela sa ang che.

¹²Ani chu ram sabengtung ang a ni ang a, mi tu pawh a bei zêl ang a, anni pawhin an lo bei ang. A unaute tu mah a ngeih lo vang,” a ti a.

¹³A hnêna thusawitu LALPA hmingah chuan, “El-roi’ a vuah a. “Min hmutu chu ka hmu ve ta a nih hi,” a ti a.

¹⁴Chuvâng chuan, chu tuikhur chu ‘Beer-lahai-roi’ tih a ni ta a, Kades leh Bered inkâra awm a ni.

¹⁵Hagari chuan Abrama chu fapa a hrinsak a, Abrama chuan Hagari fa hmingah chuan, ‘Ismaela’ a sa a.

¹⁶Abrama chu Hagarin Ismaela a hrinsak khân kum sawmriat leh paruka upa a ni.