Read Mizo Lushai Genesis 17 Bible Online

Genesis 17 - Mizo Lushai bible

Genesis 17

¹Abrama chu kum sawmkua leh pakua a nihin a hnênah LALPA chu a rawn inlâr a, “El-Sadaia ka nih hi, ka duhzâwng angin nung la, sawisêlbovin awm rawh.

²Nang nêna kan inkârah thu ka thlung ang a, nasa takin ka tipung ang che,” a ti a.

³Abrama chu hmai lei siin a kûn a, a Pathian chuan a be zêl a.

⁴“Hei hi i tâna ka thuthlung chu a ni: Hnam tam tak thlahtu i ni ang a,

⁵i hming hi Abrama ni tawh lovin Abrahama a ni tawh zâwk ang; hnam tam tak paah ka siam tâk che hi.

⁶I chi ka tiṭha ang a, hnam tam tak thlahtu i ni ang a, lalte pawh i hring ang.

⁷Kan inkâra ka thuthlung chu i thlah lo awm zêlte thlengin ka tinghet tlat ang; i tân leh i thlah zêlte tân kumkhaw Pathian ka ni ang.

⁸“I thlah lo la awm tûrte rochun atân kumkhuaa an neih tûrin i mikhualna Kanan ram pum pui hi ka pe a che, an Pathian ka ni zêl bawk ang,” a ti a.

⁹Pathian chuan Abrahama hnênah thu a sawi zêl a, “Nang pawhin ka thuthlung hi i vawng reng tûr a ni, i thlah lo awm tûrte pawhin an zâwm zêl tûr a ni.

¹⁰Nang leh i thlahte nêna ka thuthlung, in zawm zêl tûr chu hei hi a ni: in zînga mipa tawh phawt chu an serh tan tûr a ni.

¹¹In serh vun hmâwr in tan tûr a ni; chu chu kan inkâra thuthlung chhinchhiahna a ni ang.

¹²Kumkhuain in zînga mipa naupang chu ni riat a tlinah a serh in tan tûr a ni; in chhûng zînga piang, bawihte leh in chipui ni lo tangkaa in leite pawh an serh in tan tûr a ni.

¹³In ina piang bawih pawh in lei bawih pawh, an serh in tan ngei tûr a ni. In taksaah ka thuthlung chhinchhiahna chu kumkhuain a awm tûr a ni.

¹⁴Mipa tawh phawt, serh tan loh, a vun hmâwr tan loh chu a laichînte zîng ata tuithlâr tûr a ni, ka thuthlung a bawhchhiat avângin,” a ti a.

¹⁵Pathian chuan Abrahama hnênah heti hian a ti bawk: “I nupui Saraii pawh hi Saraii ti tawh suh, a hmingah Sari a ni tawh zâwk ang.

¹⁶Mal ka sâwm ang a, mal ka sâwm hnuah fapa a hrinsak ang che. Hnam tam tak nu a ni ang a, mi tam tak chunga lal tûrte pawh a thlah aṭangin an lo piang ang,” a ti a.

¹⁷Abrahama chu lei siin a kûn a, a nuih a za a, “Kum za mi hian fa ka nei ang a, kum sawmkaw mi Sari hian nau a pai ang maw?” a ti rilru a.

¹⁸Abrahama chuan Pathian hnênah, “Ṭha i tih chuan Ismaela hi dam zêl teh phawt se,” a ti a.

¹⁹Pathian erawh chuan a chhâng a, “I nupui Sari hian fa a hrinsak dâwn che alâwm, a hmingah Isaka i sa dâwn nia; ka thuthlung hi kumkhua atân amah leh a thlah zêlte tân ka vawng tlat dâwn a ni.

²⁰Ismaela thu i sawi pawh ka hria e; ngai teh, ani pawh mal ka sâwm a, a chi ka tiṭha ang a, nasa takin ka tipung ang. Lal sâwm leh pahnih a hring ang a, hnam lian takah ka din dâwn a ni.

²¹Ka thuthlung erawh hi chu nakkum hetih huna Sarin a hrin tûr Isaka tân ka vawng ang,” a ti a.

²²A sawi zawh chuan Pathian chuan Abrahama chu a chhohsan ta a.

²³Tin, Abrahama chuan a fapa Ismaela leh a bawih, a ina piang leh a lei pawh, a ina awm mipa zawng zawng chu a hruai a, chumi ni chuan Pathianin a hrilh ang chuan an serh vun hmâwr chu a tansak ta a.

²⁴A serh vun a tan chuan Abrahama chu kum sawmkua leh pakaw mi a ni.

²⁵Ismaela pawh serh a tansak ni chuan kum sâwm leh kum thum mi a ni.

²⁶Chumi ni ngei chuan Abrahama te, a fapa Ismaela te,

²⁷a ṭhuihruai zawng zawng, a ina piang bawihte leh hnam dang, bawiha a leite chu an serh a tansak ta a.