Read Mizo Lushai Genesis 18 Bible Online

Genesis 18 - Mizo Lushai bible

Genesis 18

¹Mamre-a sasaw bula a puan in kawngkaah, chhûn ni sat lai takin Abrahama chu a ṭhu a, a hnênah LALPA chu a rawn inlâr a.

²A han en chuan a bul maiah mi pathum an lo ding reng a; a han hmuh veleh chuan anni chu lâwm tûrin puan in kawngka ata chu a tlân chhuak a. Kûnin chibai a bûk a,

³“Ka pu, min khawngaih la, i chhiahhlawh hi min kal pêl lo hrâm teh.

⁴Tui tlêm han la ila, in kete sil ula, thing hlimah hian châwl rih teh u.

⁵In chhiahhlawh in rawn tlawh ta sa sa, chhâng tlêm ka han lâk ang che u a, in intiharh dâwn nia; chumi zawhah chuan in kal zêl a ni ang chu,” a ti a. “Chuti chu, i sawi ang chuan ti ta che,” an ti a.

⁶Abrahama chu puan inah a tlân lût a, Sari chu a ko va, “Chhangphut ṭha chi ṭîn khat la chhuak la, hmet la, chhangpêr siam thuai teh” a ti a.

⁷Abrahama chu bâwng rual awmnaah a tlân a, bâwngno chum thau tak a man a, chhiahhlawh a talhtîr a, a kang hmin ta thuai a.

⁸Bâwngsa kan chu bâwnghnute leh a dak nên a rawn la a, an hmaah a hlui a; an ei a, ani pawh chu an bulah, thing hlimah chuan a ding reng a.

⁹Anni chuan a hnênah, “Khawnge i nupui Sari a awm?” an ti a. “Puan in chhûngah hian,” a ti a.

¹⁰Pakhat chuan, “Thla kua a ral hunah ka lo kal leh ang a, i nupui Sari hian fapa a hring ang,” a ti a. A hnung maiah, puan in luhna phênah Sari chuan a lo ngaithla reng a.

¹¹Abrahama leh Sari chu tar tawh tak, upa tak an ni; Sari pawh hmeichhe dân pangngaiin a awm tawh lo.

¹²Sari chu a nuih a za a, “Kei tarzûr tawh hian ka pasal ka la thlahlel ang maw, ani pawh a upa hle tawh si?” a ti rilru a.

¹³LALPA chuan Abrahama hnênah, “Engtizia nge Sari nuih a zata, ‘Ka tar tawh vei nên fa ka la nei tak tak ang maw?’ a tih?

¹⁴LALPA tân tih theih loh a awm em ni? Thla kaw ral hnuah ka lo kal leh ang a, Sari hian fapa a lo hring tawh ang,” a ti a.

¹⁵Sari chuan a hlau va, a pha chung a, “Ka nuih a za lo ve,” a ti a. Ani chuan, “I nuih a zat kha le!” a ti a.

¹⁶Chûng mite chu chuta ta chu an tho va, Sodom khaw lam chu an zu thlîr a. Thlah tûrin Abrahama pawh an rualin a kal ve a.

¹⁷LALPA chuan, “Ka thiltih tum hi Abrahama lakah ka zêp ang em aw?

¹⁸Abrahama hi hnam lian, hnam ropui tak a la ni ngei dâwn a, khawvêl hnam zawng zawngin mal insâwmsak nân tak ani hi an lam dâwn a.

¹⁹A fate leh a thlah zêlte LALPA duhzâwnga awma, thil ṭha leh thil dik zirtîr tûrin ani hi ka thlan chhuah a ni si a. LALPA chuan Abrahama hnêna a thutiam chu a tihlawhtling ngei dâwn si a,” a ti a ni.

²⁰Tin, LALPA chuan, “Sodom leh Gomora khaw sual thu leh an thiltih râpthlâk thu ka beng a lo thleng hi a dik tak tak em tih en tûrin

²¹ka chhuk dâwn a ni, ka zu hre chiang teh ang,” a ti a.

²²Mite chu Sodom khuaa kal tûrin an chhuk ta a. Abrahama erawh chu LALPA bulah a ding khawtlai a.

²³Abrahama chuan a hnaih a, “Mi sualte zînga awm mi ṭhate pawh chu i tiboral tel dâwn em ni?

²⁴Khuaah chuan mi ṭha, mi pawi khawih lo sawmnga awm sela, chûng mi ṭha sawmngate avângin khawpui chu zuah lovin i tichhia ang maw?

²⁵Mi ṭhate leh ṭha lote tuar inang rengin mi ṭhate chu mi sualte nên i tiboral êm lo vang chu! Lei chung zawng zawnga thuneitu, nang meuh chuan dik lo takin thil i ti âwm si lo va,” a ti a.

²⁶“Sodom khuaah mi ṭha sawmnga ka hmuh chuan anmahni avângin khua chu ka zuah ang,” a ti a.

²⁷Abrahama chuan a sawi leh a, “Kei vaivut leh meivâp mai hian LALPA chu ka be pawp ta sa sa si che a,

²⁸mi ṭha pangain sawmnga tling lo ta sela? Pangaa an tlin loh avângin khaw pum chu i tichhia ang maw?” a ti a. “Mi sawmli leh panga ka hmuh chuan ka tichhe lo vang,” a ti a.

²⁹A la zâwt ta zêl a, “Mi sawmli chauh awm sela?” a ti a. “Mi sawmli avâng pawhin ka tichhe lo vang,” a ti a.

³⁰“Ka sawi zêl pawhin LALPA chuan ninawm ti teh suh se, mi sawmthum chauh lo awm sela?” a ti a. Ani chuan, “Mi sawmthum chauh pawh hmu ila ka tichhe lo vang,” a ti a.

³¹“LALPA chu ka zâwt ta law law che a, sawmhnih chauh awm sela?” a ti a.

³²Ani chuan, “Mi sawmhnih avâng pawh chuan ka tichhe lo vang,” a ti a, a chhâng a. “LALPA chuan lung lovah neih teh suh se, hei bâk hi chu ka zâwt tawh lo vang che, mi sâwm chauh awm ta sela?” a ti a. “Chûng mi sâwmte avâng pawh chuan ka tichhe lo vang,” a ti a.

³³Abrahama nên an inbiak zawh chuan LALPA chu a kal ta a. Abrahama pawh a in lamah a kîr leh ta a.