Read Mizo Lushai Genesis 2 Bible Online

Genesis 2 - Mizo Lushai bible

Genesis 2

¹Lei leh vân leh thil engkim siam chu zawh a ni ta a.

²A ni sarihna ni-ah Pathianin a thilsiam hna chu a zawh fel tâk avângin a ni sarih ni chuan a châwl ta a.

³A thilsiam hna zawng zawng a tih zawha a chawlhsan tâk avângin Pathian chuan a ni sarih ni chu mal a sâwm a, a serh ta a.

⁴Chu chu lei leh vân siam dân chanchin chu a ni.

⁵ LALPA Pathianin lei leh vân a siam lai khân thlai rêng rêng leiah a la ṭo lo va, hnim pawh a la chawr hek lo; Pathianin ruah a sûrtîr rih lo va, lo neitu tûr mihring pawh an la awm lo.

⁶Lei aṭangin tuihu a lo chhuak a, chu chuan lei chu a tihnâwng ṭhîn a ni.

⁷LALPA Pathian chuan lei vaivutin mihring a siam a, a hnârah chuan nunna thaw a thaw lût a, mihring chu mi nung a lo ni ta a.

⁸ LALPA Pathian chuan khawchhak ram, Eden-ah huan a siam a; tah chuan a mihring siam chu a dah a.

⁹LALPA Pathian chuan thing mawi tak tak leh rah tui tak huanah chuan a ṭotîr a, huan lai takah chuan nunna thing leh a chhia a ṭha thleina thing a ṭotîr bawk a.

¹⁰Huan tihnâwng tûr chuan lui pakhat a luang tlang a, huan pâwnah chuan pêng liin a pêng darh a.

¹¹Pêng khat hming chu Pison a ni a, rangkachak tamna Havila ramah a luang a.

¹²Chu rama rangkachak chu a ṭha bîk a, lungmantam Bidela leh Soham pawh a awm.

¹³Lui pakhat hming chu Gihon a ni a, Kus ramah a luang tlang a.

¹⁴Lui pathumna chu Hidekal a ni a, Asuria chhak lamah a luang a. A palina chu Eufretis lui hi a ni.

¹⁵ LALPA Pathian chuan mihring chu a hruai a, huan enkawla vêng tûrin huanah chuan a dah a.

¹⁶LALPA Pathian chuan mihring chu a hrilh a, “Huana thing rah hi i duh duh i ei thei ang.

¹⁷A chhia a ṭha thleina thei erawh hi chu ei tûr a ni lo, i ei phawt chuan i ei niin i thi ngei ang,” a ti a.

¹⁸ LALPA Pathian chuan, “Mihring, amah maia a awm hi a ṭha lo ve, ṭanpuitu tûr, a kawppui âwm tak ka siamsak teh ang,” a ti a.

¹⁹LALPA Pathian chuan leiin ramsa tinrêng leh chunglêng sava tinrêng a han siam a. Mihring chuan engtin nge a lo koh dâwn hriat nân a hnênah a rawn hruai zêl a; mihringin a lo koh dân ang zêl chu thil nung tinrêng chuan hmingah an pu ta a.

²⁰Mihring chuan ran te, chunglêng sava te leh ramsa tinrêng te chu hming a neihtîr a; mahse, mihring chuan amah ṭanpuitu tûr, kawppui âwm a hmu lo.

²¹ LALPA Pathian chuan mihring chu tui takin a muttîr a, a muthilh hlân chuan a nâkruh pakhat a lâksak a, tisain a tiping leh a.

²²Mipa nâkruh a lâk aṭang chuan LALPA Pathian chuan hmeichhia a siam a, mipa hnênah chuan a rawn hruai ve a.

²³Ani chuan, “Hei zet zawng, ka ruh ang ruh nei, ka tisa ang tisa pu zu nia le! Mipa aṭanga lâk chhuah a nih avângin ‘hmeichhia’ tih tûr a ni,” a ti a.

²⁴Hei vâng hian mipain a nu leh a pa a thlah a, a nupui a vuan a, tisa pumkhat an lo ni ta a ni.

²⁵Mipa leh hmeichhia chu saruakin an awm a; mahse, an zak lêm lo.