Read Mizo Lushai Genesis 20 Bible Online

Genesis 20 - Mizo Lushai bible

Genesis 20

¹Abrahama chu Negeb lamah a kal zêl a, Kades leh Sur inkârah awmhmun a khuar a, Gerar khuaa an awm laiin,

²Abrahama chuan a nupui Sari chu “Ka farnu a ni,” a ti a; tichuan, Abimeleka, Gerar lal chuan, mi a tîr a, Sari chu a inah a hruaitîr a.

³Zan khat chu mumangah Abimeleka hnênah Pathian chu a lo kal a, “He hmeichhia hi mi nupui a ni a, i lâksak vei a, i thi ngei ang,” a rawn ti a.

⁴Abimeleka chuan a kut hmâwr pawh a la dehsak lo va; “LALPA, pawi khawih lo pawh hi i tihlum tho dâwn em ni?

⁵Amah ngeiin, ‘Ka farnu a ni,’ ka hnênah a ti a, a hmeichhia lahin ‘Ka nuṭa a ni,’ a ti bawk si a, rilru thianghlim leh dik tak pua ti ka ni asin,” a ti a.

⁶Pathianin a mangah chuan a chhâng a, “Rilru thianghlim tak pua ti i nih ka hria e, ka laka thil sual i tih loh nân ka vêng tlat che atin alâwm a kut hmâwr i khawih pawh ka phal loh ni.

⁷He mi nupui hi tûnah pe kîr leh rawh, zâwlnei a nih hi. I nun theih nân a dilsak ang che, i pêk kîr leh loh chuan i thi ang, i mi zawng zawngte pawh an thi vek ang tih hre rawh,” a ti a.

⁸A tûk zîngah Abimeleka chuan a ṭhuihruaite a ko khâwm a, a thil hmuh chu a hrilh vek a, an hlau ta êm êm a.

⁹Abimeleka chuan Abrahama chu a ko va, a hnênah, “Kan chungah eng nge i tih tâk le? I pawi eng nge kan sawia, ka chungah leh ka ram chungah hetiang thiam lohna nasa tak hi i rawn thlen? Thil âwm lo tak i ti a nih hi,” a ti a.

¹⁰Abimeleka vêk chuan Abrahama hnênah, “Eng vângin nge kan chungah hetiang thil hi i rawn tih?” a ti leh a.

¹¹Abrahama chuan, “He khuaah hian Pathian ṭih mi tu mah an awm ka ring lo va, ka nupui avâng hian min lo that mai ang tih ka hlau atin a ni.

¹²Ka farnu pawh a ni tak tak asin; nu hrang laka ka pa fanu a ni a, nupuiah ka nei ta a ni.

¹³Pathianin kan pa in leh lo aṭanga min vahvaihtîr tâk hnuah hi chuan, ‘Ka chunga i khawngaihna i lantîr dân tûr chu hmun tinah, ka nuṭa a ni, ti zêl rawh,’ ka ti rêng a ni,” a ti a.

¹⁴Abimeleka chuan berâm te, bâwngpa te, bawihpa te, bawihnu te a thlang chhuak a, Abrahama chu a pe a, a nupui Sari pawh a pe kîr a.

¹⁵Abimeleka chuan, “Hei, ka ram hi a awm duai alâwm, i duh duhnaah awm rawh,” a ti a.

¹⁶Sari hnênah pawh chuan, “Ngai teh, i nuṭa chu tangka sâng ka pêk tâk hi, in zaa tâna zângna dawmna ni rawh se, i fihlîm ta e,” a ti a.

¹⁷Abrahama chuan Pathian hnênah a ngensak a, Pathianin Abimeleka chu, a nupui te leh a chhiahhlawh te nên a tidam leh a, nau an nei thei ta a.

¹⁸Abrahama nupui Sari vâng chuan Abimeleka te chhûngkua chu Pathianin a tiching a ni.