Read Mizo Lushai Genesis 21 Bible Online

Genesis 21 - Mizo Lushai bible

Genesis 21

¹ LALPA chuan Sari chu a zu kan a. LALPA chuan a tiam tawh ang khân Sari chu a tihsak ta a.

²Sari chuan nau a pai ta a, Pathianin a sawi hun takah khân Abrahama chu, pa upa tak a nih hnuin, fapa a hrinsak ta a.

³Abrahaman Sarin fapa a hrinsak hmingah chuan Isaka a sa a.

⁴Pathianin thu a pêk angin a ni riat ni chuan Abrahama chuan a fapa Isaka serh chu a tansak ta a.

⁵A fapa Isaka a pian chuan Abrahama chu kum zaa upa a ni.

⁶Sari chuan: “Pathianin min nuihtîr tâk hi, A hria apiangin min nuihpui ang,” a ti a.

⁷“Abrahama hnênah, ‘Sarin nau hnute a pe ang,’ tu nge tih nachâng hria ang? Mahse, a tar hnuin fapa ka hrinsak hi,” a ti bawk a.

⁸Nau chu a ṭhang lian a, hnute hnêk bântîr a lo hun ta a. Chumi ni chuan Abrahaman ruai ropui tak a ṭheh a.

⁹Aigupta mi Hagarin Abrahama fapa a hrinsak khân a fapa Isaka chu a chhaih lai Sari chuan a hmuhin,

¹⁰Abrahama hnênah, “He bawihnu hi, a fapa nên hnawt chhuak rawh. He bawih fa hian ka fapa Isaka hi ro a luahpui tûr a ni lo,” a ti a.

¹¹Chu chuan Abrahama rilru a tihrehawm hle a, a fapa a ni ve bawk si.

¹²Mahse, Pathian chuan Abrahama hnênah, “Naupang chungchâng leh i bawihnu chungchâng hi lunglovah la suh. Sari sawi ang chu zâwm rawh, Isaka-ah hian a ni i thlahte chhui a nih dâwn.

¹³Bawihnu fapa pawh nangma thlah ngei a nih avângin hnam ropui takah ka din tho dâwn a ni,” a ti a.

¹⁴A tûk zîngah Abrahama chuan Hagari pêk tûr chhang leh savun tuithâwl tuia khat a la a, a phurhtîr a, a fapa nên chuan a tîr bo ta a, Beer-seba thlalêrah chuan kalna chin tûr hre lovin a vâk a vâk a.

¹⁵Savun tuithâwla tui chu an in zawh chuan naupang chu hnimbuk hnuaiah a dah a, hla fe, thal kah phâk tâwkah a kal a, a ṭhu a,

¹⁶“Naupang thi lai ka hmu ngam lo,” a ti a ni. Hla takah chuan a ṭhu a, a ṭap a.

¹⁷Naupang au râwl chu Pathianin a lo hria a, Pathian Vântirhkoh chuan vân aṭangin Hagari chu a au va, ‘Hagar, eng i ti nge ni? Thlaphâng suh, a awmna hmuna naupang râwl chu Pathianin a hria asin,

¹⁸ti rawh, naupang chu kaitho la, thlêm rawh, hnam ropui takah ka din dâwn a ni,” a ti a.

¹⁹Pathian chuan a mit a tihvârsak a, tuichhunchhuah a hmu ta a. A va pan a, tuithâwl chu a thâl khat a, naupang chu a intîr a.

²⁰Naupang chu a lo ṭhang lian a, Pathianin a awmpui zêl a, thal kah a thiam êm êm a.

²¹Paran thlalêrah awmhmun a khuar a, Aigupta ram aṭangin a nu chuan nupui a neihsak a.

²²Chutih hun vêl chuan Abimeleka chu a sipai hotu Fikola nên Abrahama hnênah an lo kal a, “I thiltih apiangah Pathianin a awmpui che hi.

²³Chuvângin, ka tu leh fate chungah emaw, ka chungah emaw thil ṭha lo ti lo tûrin Pathian hming chhâlin chhia chham rawh. I chunga ka ṭhat ang bawkin ka chungah leh i chênna ram chungah hian ṭhat chhuah tiam rawh,” a ti a.

²⁴Abrahama chuan, “Tiam e a,” a ti a.

²⁵Abimeleka chhiahhlawhte chuan Abrahama tuichhunchhuah an chhuhsak a; chumi chungchângah chuan Abimeleka chu a khak a.

²⁶Abimeleka chuan, “Chu, tu tih nge ka hre ve hlei nêm; min va hrilh lo ve, tûnah chauh a ni ka hriat,” a ti a.

²⁷Abrahama chuan berâm leh bâwngpa a la a, Abimeleka chu a pe a, an pahnih chuan thu an thlung ta a.

²⁸Abrahama chuan, berâm rual zînga mi berâmla pasarih pawh a dah hrang a.

²⁹Abimeleka chuan, “Engtizia nge berâmla pasarih hi i dah hran le?” a ti a.

³⁰“He tuichhunchhuah hi ka laih ngei a ni tih hriat nân hêng berâmla pasarih hi nei ang che,” a ti a.

³¹Chuvâng chuan, chu hmun chuan Beer-seba hming a pu ta a ni, an pahnihin thu an intiam tâk avângin.

³²Thu an thlun zawh chuan Abimeleka chu a sipai hotu Fikola nên, an chhuak a, Filistia ramah an haw ta a.

³³Abrahama chuan Beer-seba-ah chuan Esel thing a phun a, LALPA chatuan Pathian hming chu a lam a.

³⁴Abrahama chu Filistia ramah kum tam fe a awm ta a.