Read Mizo Lushai Genesis 22 Bible Online

Genesis 22 - Mizo Lushai bible

Genesis 22

¹Chûng thil hnuah chuan Pathianin Abrahama chu a fiah a, “Abraham,” a ti a. Ani chuan, “Eng nge ni?” a ti a.

²“I fapa mal, i duh êm êm Isaka hi hruai la, Moria ramah kalpui teh; ka hrilh tûr che tlângah hâlral thilhlan atân hlân rawh,” a ti a.

³Tin, Abrahama chu zîng takah a tho va; sabengtung a siam a, a naute zînga tlangvâl pahnih leh a fapa Isaka chu a ko va; hâlral thilhlana hman tûr thing a ek a; a tho va, Pathian hrilh hmun lam pan chuan an chhuak ta a.

⁴Ni thum ni chuan Abrahama chuan a han thlîr a, hla fe aṭang chuan chu hmun chu a hmu ta a.

⁵Abrahama chuan a naute hnênah, “Hetah hian sabengtung hi lo awmpui ula, sawtah sâwn naupang nên hian kan kal ang a, Pathian chibai kan va bûk ang a, kan lo kîr leh mai ang,” a ti a.

⁶Abrahama chuan hâlral thilhlan thing chu a la a, a fapa Isaka chu a puttîr a, ani chuan mei leh chem chu a keng a, an kal dûn ta a.

⁷Isaka chuan a pa Abrahama chu a bia a, “Ka pa,” a ti a. Ani chuan, “Eng nge ni, ka fapa?” a ti a. “En teh, mei leh thing chu kan keng a, hâl ral tûr berâmno chu khaw nge?” a ti a.

⁸Abrahama chuan a chhâng a, “Ka fapa, Pathianin hâl ral tûr berâmno chu a hmu mai dâwn alâwm,” a ti a. Tichuan, an kal dûn ta zêl a.

⁹Pathianin hmun a hrilh chu an thleng a; chutah chuan Abrahaman maichâm a siam a, thing chu a chhep a, a fapa Isaka chu a phuar a, maichâm thing chungah chuan a mut a.

¹⁰Abrahama chuan a ban a, chem chu a la a, a fa chu tihhlum a tum ta a.

¹¹Vân aṭangin LALPA tirhkohvin a rawn au va, “Abraham, Abraham,” a rawn ti a. Ani chuan, “Eng nge ni?” a ti a.

¹²“Naupang chungah i kut thlâk suh, eng mah tih hek suh. Pathian i ṭihzia ka hre ta, i fapa neih chhun meuh pawh ka tân i ui loh hi,” a rawn ti a.

¹³Abrahama chu a han hawi vêl a, a hnung lamah chuan berâmpa a hmu a, thingbukah a ki a lo tâng a. Abrahama chuan berâm chu a man a, a fapa aiah hâlral thilhlan atân a hlân ta hlauh a.

¹⁴Abrahama chuan chu hmun hmingah chuan, “LALPA Jireh” a sa a, tûn thlengin “LALPA tlângah chuan hmuh a ni,” tih a ni ta a.

¹⁵ LALPA tirhkoh chuan Abrahama chu vân aṭangin a rawn be nawn leh a.

¹⁶“I fapa neih chhun chu ka tân ui lovin he thil hi i ti a.

¹⁷Mal ka sâwm ang che a, i thlahte chu chunga arsi zât leh hnuaia ṭiauvaivut zâtin ka tipung ang tih mahni inchhâlin thu ka tiam e. I thlahte chuan an hmêlmate kulh kawngkaah thu an nei ang.

¹⁸Khawvêla hnam tinrêngin i thlahte chhâlin mal an insâwmsak ang, ka thu i awih avângin chûng chu tihsak che ka tiam a ni,” a ti a.

¹⁹Abrahama chu a naute hnênah chuan a kîr a, Beer-seba-ah an haw ta a. Abrahama chu Beer-seba-ah chuan a awm ta rih a.

²⁰Chûng thil hnuah chuan, “Milkaii chuan i nau Nahora chu fate a hrinsak ṭeuh asin,” tiin Abrahama chu an rawn hrilh a.

²¹A fa tîr chu Uza a ni a, a naute chu Buza leh Kemuela, Arama pa chu an ni.

²²Kheseda te, Hazoa te, Pildasa te, Jidlafa te, Bethuela te a hring bawk a.

²³Bethuela chu Rebeki pa a ni. Hêng mi pasarihte hi Milkaii chuan Abrahama nau Nahora chu a hrinsak a ni.

²⁴Tin, a hmei Reumi pawhin Teba te, Gahama te, Tahasa te, Maaka te a hrinsak bawk a.