Read Mizo Lushai Genesis 23 Bible Online

Genesis 23 - Mizo Lushai bible

Genesis 23

¹Sari chu kum za leh sawmhnih leh pasariha upa a ni. Sari dam chhûng kum zât chu chuti chu a ni.

²Kiriat-Arba khuaah, tûna Hebron khua an tih tâk, Kanan ramah chuan a thi a. Abrahama chu a sûn tûr leh ṭah tûrin a lo kal a.

³A nupui ruang bul aṭang chuan a tho va, Hit mite chu a bia a,

⁴“In zînga lo pêm mikhual mai ka la ni a, in ramah inphûmna tûr hmun min pe ve rawh u,” a ti a.

⁵Hit mite chuan Abrahama chu an chhâng a,

⁶“Ka pu, kan thu hi ngaithla teh, kan zîngah Pathian mi thlan i ni a, i duhna lai ber, kan thlân hmunah hian inphûm mai rawh u, tu man in inphûmna thlân hmun atân ram kan ui lo vang,” an ti a.

⁷Abrahama chu a tho va, chu ram hotute leh Hit mite hmaah chuan a kûn a, an hnênah,

⁸“Kan inphûmna tûr hmun min duhsak takzet a nih chuan Zohara fapa, Efrona ram, Makpela biala pûk awmna, a ram kila ram awm hi,

⁹a man tâwk a chhiar zâtin thlân hmuna ka neih atân min leitîr teh se, khawngaih takin min sawipui rawh u,” a ti a.

¹⁰Efrona chu Hit mite zîngah chuan a ṭhu ve reng a. Hit mite hriatah, Hit mi Efrona chuan, khaw kulh kawngkaa hotu ṭhute hmaah ngei chuan Abrahama hnênah,

¹¹“Hralh lo ve, ka pu, ka thu hi ngaithla teh, pûk leh a awmna ram chu ka pe a che, ka laichînte hriat ngeiah ka pêk che hi, inphûm nân hmang mai rawh,” a ti a.

¹²Chûng mite hmaah chuan Abrahama chu a kûn a,

¹³an hriatah chuan Efrona hnênah, “Ngai teh, rem i tih chuan ram man chu ka pe zâwk ang che. La hrâm la; tichuan, inphûm nân ka nei dâwn nia,” a ti a.

¹⁴Efrona chuan Abrahama chu a chhâng a,

¹⁵“Ka pu, ka thu hi ngaithla hrâm teh. He ram hi tangka sekel zali bûk man lek a ni a, chu chu nang leh kei, kan inkârah sawi tham a ni hlei nêm, inphûmna thlân atân chuan nei rawh,” a ti a.

¹⁶Abrahama chuan Hit mite hriata Efrona sawi zât tangkarua chu a bûk chhuahsak ta a; an tangka hman lai, sekel bûk zali chu a pe ta a.

¹⁷Makpela-a Efrona ram, Mamre dep pûk awmna chu, a ri chhûnga thing awm zawng zawng nên,

¹⁸Abrahama chuan a nei ta a; Hit mite leh khaw kulh kawngkaa ṭhute hmaah chuan tihngheh a ni ta a.

¹⁹Makpela rama pûkah chuan Abrahama chuan a nupui Sari chu a phûm ta a. Chu hmun chu Hebron an tih tâk Mamre dep, Kanan rama awm a ni.

²⁰Chu ram chu Hit mite kut aṭangin thlân hmun atân Abrahama chuan a nei hlen ta a.