Read Mizo Lushai Genesis 24 Bible Online

Genesis 24 - Mizo Lushai bible

Genesis 24

¹Abrahama chu a kum a lo tam a, a upa ta hle a, LALPA chuan kawng tinrêngah Abrahama chu mal a sâwm a.

²Abrahama chuan a chhiahhlawh min ber, an chhûngkaw enkawltu hnênah, “Ka malpui kârah i kut dah la, LALPA, vân Pathian leh lei Pathian chhâlin chhia ka chhamtîr dâwn che a ni.

³Ka chênna ram, Kanan nula zînga mi, ka fapa Isaka tân nupui i neihsak tûr a ni lo.

⁴Ka pianna ramah i kal ang a, ka laichînte zîngah, ka fapa Isaka nupui i va zawng zâwk tûr a ni,” a ti a.

⁵Chhiahhlawh chuan, “Hmeichhia chuan he ramah hian min rawn zui duh lo sela, i fapa hi i lo kalna ramah chuan ka hruai kîr leh tûr em ni ang?” a ti a.

⁶Abrahama chuan, “Chu ramah chuan ka fapa hi i hruai kîr hauh tûr a ni lo.

⁷LALPA vân Pathian chuan ka pa in leh lo, ka pianna ram aṭangin min hruai chhuak a, ‘He ram hi i thlahte hnênah ka pe ang,’ tiin a tiam tlat a ni. Ani chuan i hmaah Vântirhkoh a tîr ang a, ka fapa nupui tûr i rawn hâwn thei mai ang.

⁸Hmeichhia chuan a zui duh tlat loh che erawh chuan ka hnêna i chhechham lakah i fihlîm ang; eng pawh ni se, ka fapa hi chutah chuan i hruai kîr tûr a ni lo,” a ti a.

⁹Tichuan, chhiahhlawh chuan a pu Abrahama malpui inkârah chuan a kut a dah a, chu thil thu-ah chuan a hmaah chhia a chham ta a.

¹⁰Chhiahhlawh chuan a pu sanghâwngsei sâwm a hruai a, thilpêk tûr chi tinrêng a keng a, Nahora awmna khua Aram-Naharaim lam chu a pan ta a.

¹¹Hmeichhe tuichawi hun, tlai ni nêmah, chu khaw dai kianga tuichhunchhuah bulah chuan a sanghâwngsei chu a bawhtîr a.

¹²Heti hian a ti a: “Aw LALPA, ka pu Abrahama Pathian, ka pu Abrahama chungah ngilneih chhuah la, ka kawng hi tihmuingîl ang che.

¹³Hei tuikhur bulah hian ka lo ding ang a, khuaa nulate chuan tui an rawn chawi ang a;

¹⁴‘Khawngaih takin i tuibêl chu han la thla la, ka lo in teh ang,’ ka ti dâwn a ni. ‘In rawh, i sanghâwngseite pawh tui ka han chawisak ang e,’ tia mi chhângtu chu i chhiahhlawh Isaka nupui tûra i nula ruat chu ni rawh se, chu chu ka pu chungah i ngilneihna i lantîr a ni tih chhinchhiahnaah ka ngai ang,” a ti a.

¹⁵A sawi zawh hma chuan Abrahama nau Nahora fapa Bethuela fanu, Rebeki chu tuibêl kengin a lo kal a.

¹⁶Chu nula chu Milkaii fanu a ni a, nula hmêlṭha tak, nula thianghlim, mipa la khawih loh a ni. Tuikhurah chuan a chhuk a, a bêl chu a thâl khat a, a lo chhuak a.

¹⁷Chhiahhlawh chu a lam pan chuan a va tlân a, “I bela tui kha mi lo intîr teh,” a ti a.

¹⁸“Ka pu, in rawh,” a ti a, a tuibêl put chu a la thla a, a intîr ta a.

¹⁹Duh tâwka a intîr hnu chuan, “I sanghâwngseite pawh an duh tâwka an in tûr tui ka han chawisak ang e,” a ti a.

²⁰A tuibêl chu ran tuikuangah chuan a chhûng thuai a, tuichhunchhuahah chuan a chhuk a, sanghâwngsei zawng zawng duh tâwka in tur a chawisak ta a.

²¹Chutih chhûng chuan a kal chhan LALPA chuan a tihlawhtling a ni nge ni lo ngaihtuah chungin a ding a, a en ta reng a.

²²Sanghâwngseite chuan duh tâwk tui an in hnu chuan, sekel chanvea rit rangkachak hnâr vuah a la chhuak a, a hnârah a vuahsak a; rangkachak ngûn pahnih, sekel sâwma rit a buntîr bawk a.

²³“Tu fanu nge i nih, min hrilh teh, zân kan riahna tûr i pa inah a awm thei ang em?” a ti a.

²⁴“Bethuela fanu ka nih hi, ani chu Milkaiin Nahora a hrinsak kha a ni.

²⁵Buhpâwl leh ran chaw pawh kan ngah asin, riahna tûr pawh kan nei e,” a ti a.

²⁶Chu mi chu a kûn a, LALPA hmaah a bawkkhup a.

²⁷“Ka pu chunga a ngilneihna danglam ngai lo Abrahama Pathian LALPA chu fakin awm rawh se, ka pu chhûngte inah, kei pawh min hruai lût ta a nih hi,” a ti a.

²⁸Chûng thil chu a nute hrilh tûrin nula chu a tlân a,

²⁹Rebeki chuan nuṭa Labana a nei a; ani chu tuichhunchhuah rawn pan tûr chuan a tlân a.

³⁰A farnu hnâr vuah leh ngûn a hmuha, ‘chutiang khatiang chuan min bia,’ tih a sawi a hriat khân chu mi lam pan chuan a tlân a ni. A va thlen chuan tuikhura sanghâwngsei bulah a lo la ding reng a.

³¹Labana chuan, “Nang, LALPA duhsak, lo kal teh, thlenna tûr leh sanghâwngsei awmna tûr ka buatsaih vek tawh asin, pâwnah engati nge i la din reng le?” a ti a.

³²Ani chu Labana chuan inah a zui lût a, sanghâwngsei phurte chu Labana chuan a hlân thlâksak a, buhpâwl leh ran chaw te chu sanghâwngseite pawh a pe a. A kalpuite nêna an ke silna tûr tui a rawn la bawk a.

³³A hmaa chaw an han hlui dâwn lai chuan Abrahama chhiahhlawh chuan, “Ka sawi tûr ka sawi zawh hma chu eng mah ka ei lo vang,” a ti a. “Sawi ta che,” an ti a.

³⁴Ani chuan, “Abrahama chhiahhlawh ka ni a, ka pu chu nasa takin LALPA chuan mal a sâwm a.

³⁵A neinung ta hle a ni. Berâm te, ran te, bawihpa te, bawihnu te, sanghâwngsei leh sabengtung te a pe ṭeuh va, tangkarua leh rangkachak nên.

³⁶Ka pu nupui Sari chuan upa tak a nih hnuin fapa a hrinsak a, ani chu a neih zawng zawng a pe ta a.

³⁷Ka pu chuan chhia min chhamtîr a; ‘Ka awmna ram Kanan mite nula zînga mi hi ka fapa tân nupui neihsak suh.

³⁸Ka laichîn te, ka chhûngte hnênah i kal zâwk ang a, ka fapa tân nupui i zawng tûr a ni,’ min ti a.

³⁹Ka pu hnênah chuan, ‘Hmeichhiain min zui duh lo ta sela engtin nge ni ang?’ ka ti a.

⁴⁰Ani chuan, ‘LALPA duhzâwngin ka awm ṭhîn a, ani ngei chuan a tirhkoh i rualin a kaltîr ang a; i tih tûr chu a tihhlawhtlinsak ang che. Ka chhûngte, ka laichînte zînga mi ngei ka fapa tân nupui i zawng tûr a ni. Ka laichînte hnên i thlen hunah chauh i chhechham aṭangin i thiang ang.

⁴¹Ka laichînte hnêna i kala, nupui tûr an lo pêk duh loh che chuan i fihlîm ang,’ tiin min ti a, chhia ka chham ta a ni.

⁴²“Vawiina tuikhur ka lo thlen khân heti hian ka ti a, ‘Aw LALPA, ka pu Abrahama Pathian, ka thiltih tûrah min tihhlawhtlin takzet dâwn chuan heti hi ni teh se,

⁴³tuikhur bula ka awm lai hian khuaa nula, tuichawi tûrin an lo kal ang a; ‘I bêla tui kha ka lo in teh ang,’ ka ti dâwn a ni.

⁴⁴‘In rawh, i sanghâwngsei in tûr pawh ka han chawisak ang e,’ titu chu ka pu fapa nupui atân LALPA mi ruat chu ni rawh se,’ ka ti a.

⁴⁵Rilrua ka sawi zawh hma chuan Rebeki a lo kal a, tuibêl a rawn pu a. Tuikhura tui chu a thâl zawh chuan, ‘Khawngaih takin i tui chu mi intîr teh,’ ka ti a.

⁴⁶A tuibêl chu a chawi thla a, ‘In rawh, i sanghâwngseite in tûr pawh ka han chawi ang e,’ a ti a. Ka in a, ka sanghâwngseite pawh chuan duh tâwk an in ta a.

⁴⁷A hnênah chuan, ‘Tu fanu nge i nih?’ ka ti a. Ani chuan, ‘Bethuela fanu ka ni, ani chu Nahora fapa a ni, a nu chu Milkaii a ni,’ a ti a. Hnâr vuah ka vuahsak a, ngûn ka buntîr bawk a.

⁴⁸LALPA hmaah chuan ka kûn a, ka pu Abrahama Pathian LALPA chu ka fak a; ka pu fapa nupui atân a laichîn fanu hnêna min hruai vang vang hi ka fak a ni.

⁴⁹Ka pu chu in khawngaih dâwn chuan min hrilh ula, in khawngaih thei lo a nih pawhin min hrilh bawk ula, ka hawi lam lam ka hawi dâwn nia,” a ti a.

⁵⁰Labana leh Bethuela chuan an chhâng a, “He thil hi LALPA tih a nih hi; keini remtih leh tih loh tûr pawh zu ni lo va!

⁵¹Rebeki chu i kuta awm a ni a, hruai la, LALPA thu angin i pu fapa nupuiah nei ang che,” an ti a.

⁵²Abrahama chhiahhlawh chuan an thutlûkna a hriat chuan lei siin LALPA hmaah a kûn a.

⁵³Tangkarua leh rangkachaka siam thil, thawmhnaw te a rawn phawrh chhuak a, Rebeki chu a pe a, a nuṭa leh a nu chu thil hlu tak tak a pe bawk a.

⁵⁴A kalpuite nên chuan an eiin an in ta a. Zânah chuan an mu a, a tûk zînga an thawh veleh, “Ka pu hnênah min kîrtîr rawh u le,” a ti a.

⁵⁵Rebeki nuṭa leh a nu chuan, “Kan nau hi ni sâwm emaw tal la awm rih sela, chutah in kal dâwn nia,” an ti a.

⁵⁶Ani chuan, “Min chelh khawtlai suh u, LALPA chuan ka kawng min tihtluansak ta si a, ka pu hnêna kîr min phal teh u,” a ti a.

⁵⁷“Nula chu ko ila, a ngaih dân amah ngei pawh zâwt ila,” an ti a.

⁵⁸Rebeki chu an ko va, “He mi hi i zui duh mai em?” an ti a. Ani chuan, “Duh e,” a ti a.

⁵⁹Tichuan, an farnu Rebeki chu a awmtu nên Abrahama chhiahhlawh leh a kalpuite nên chuan an kaltîr ta a.

⁶⁰Rebeki chu mal an sâwmsak a: “Kan farnu, a sînga sîng têl nu ni la, I thlahte chuan an hmêlmate kulh kawngkhârah Thu nei rawh se,” an ti a.

⁶¹Tichuan, Rebeki leh a chhiahhlawh nulate chu sanghâwngseiah chuan an chuang a, mi chu an zui ta a. Abrahama chhiahhlawh chuan Rebeki chu a hruai a, an kal ta a.

⁶²An thang hlân chuan Isaka chu Beer-lahai-roi aṭangin a lo kîr a, Negeb lamah awmhmun a khuar a.

⁶³Isaka chu tlaiah daiah a lêng chhuak a, sanghâwngsei lo kalte chu a hmu a.

⁶⁴Rebekin Isaka a han hmuh chuan sanghâwngsei aṭangin a chhuk a.

⁶⁵Abrahama chhiahhlawh hnênah chuan, “Saw, phûla min hmuak tûr lo kal saw tu nge ni?” a ti a. Chhiahhlawh chuan, “Saw saw ka pu chu alâwm,” a ti a. Tichuan, a hmai khuhna chu a phawrh a, a inkhuh ta a.

⁶⁶Chhiahhlawh chuan a thil tawh zawng zawng chu Isaka a hrilh a.

⁶⁷Isaka chuan Rebeki chu a nu Sari puan inah a hruai lût a, an innei a, a nupui a ni ta a. Isaka chuan a duh êm êm a, a nu thi a ngaih pawh chu a nêp thei ta a.