Read Mizo Lushai Genesis 25 Bible Online

Genesis 25 - Mizo Lushai bible

Genesis 25

¹Abrahama chuan nupui a nei leh a, a hming chu Keturi a ni.

²Fapa Zimrana te, Joksana te, Medana te, Midiana te, Isbaka te, Suaha te a hrinsak a.

³Joksana chuan fapa - Seba te, Dedana te a nei a. Dedana thlahte chu Asur-ho te, Letus-ho te, Leum-ho te an ni.

⁴Midiana fate chu Efa te, Efera te, Hanoka te, Abida te, Elda te an ni; hêngho hi Keturi thlahte chu an ni.

⁵Abrahama chuan Isaka chu a neih zawng zawng a rochuntîr a.

⁶A hmei fate erawh chu a dam lai ngeiin thilpêk a pe ṭeuh va, Isaka chîm buai lo tûrin khawchhak ram lamah a kaltîr a.

⁷Abrahama dam chhûng chu kum za leh sawmsarih leh panga a ni. Tarkûn khûp bihin a dam a, a hnuk a chat a,

⁸a thi ta a ni; a laichînte hnênah hruai a ni ve ta a.

⁹A fapa Isaka leh Ismaela chuan Makpela pûk, Hit mi Zohara fapa Efrona ram, Mamre depah chuan an phûm a.

¹⁰Chu ram chu Hit mite hnên aṭanga Abrahama ram lei kha a ni. Chutah chuan Abrahama leh a nupui Sari chu an phûm a ni.

¹¹Abrahama thih hnu chuan Pathianin a fapa Isaka chu mal a sâwm a, Beer-lahai-roi bulah Isaka chuan awmhmun a khuar a.

¹²Hêng hi Abrahama fapa, Ismaela, Sari bawihnu, Aigupta mi Hagarin Abrahama a hrinsak thlahte chu an ni.

¹³Ismaela fate chu an indawt dân ang zêlin hêngte hi an ni: A fa tîr chu Nebaiota a ni a; Kedara te, Adbeela te, Mibsama te,

¹⁴Misma te, Duma te, Masa te,

¹⁵Hadada te, Tema te, Jetura te, Nafisa te, Kedema te an ni.

¹⁶Khîng khi Ismaela fate hming leh an chênna ram leh awmna bîk hming an put tâk chu a ni. Khîng hnam sâwm leh pahnih thlahtute khi an ni.

¹⁷Ismaela chu kum za leh sawmthum leh pasarih a dam a; a hnuk a chat a, a thi ta a; a chipuite hnêna hruai a ni ta a.

¹⁸Havila aṭangin Asur pan zâwngin Aigupta thlen hma lawk, Sur thlengin a fate chu an inzâr a, an unau dangte tu mah an ngeih lo.

¹⁹Hei hi Abrahama fapa Isaka chanchin chu a ni: Abrahaman fapa Isaka a nei a.

²⁰Kum sawmli-a upa a nihin Isaka chuan Padanaram-a awm, Suria mi, Bethuela fanu Rebeki, Suria mi Labana farnu chu nupuiah a nei ta a.

²¹A chin avângin Isaka chuan a nupui tân LALPA a dîlsak a. LALPA chuan a aw chu a lo ngaithla a, Rebeki chuan nau a pai ta a.

²²A pum chhûngah chuan nautête chu an insual nasa hle a, “Hetiang hi a nih chuan ka dam zo dâwn em ni?” a ti a. LALPA râwn tûrin a kal a.

²³ LALPA chuan a chhâng a, “I chhûlah hnam hnih an awm a, I kawchhûngah chi hnih inngeih lo an awm; Pakhat chuan pakhat chu a khûm ang a, A u zâwk chuan a nau rawng a bâwl ang,” a lo ti a.

²⁴A hrin a lo hun chuan phîr a pai a lo ni a.

²⁵A lo piang hmasa zâwk chu sahmul puan anga hmul sen thur a lo ni a, a hmingah ‘Esauva’ an sa a.

²⁶Pakhat chu a lo chhuak ve a, Esauva keartui chu a vuan chial a, a hmingah ‘Jakoba’ an sa a. An lo pian chuan Isaka chu kum sawmruk mi a ni.

²⁷Naupangte chu an lo ṭhang lian a, Esauva chu sa kâp thei, ramvachal tak a ni a; Jakoba erawh chu pa ti chet chawt, in lam ngaihsak mi tak a ni.

²⁸Isaka chuan Esauva chu sa a kah theih êm avângin a duh hle a, Rebeki erawh chuan Jakoba chu a ngaina zâwk a.

²⁹Vawi khat chu Jakoba chuan englo a chhûm a, ram aṭangin Esauva chu chau zetin a lo haw a.

³⁰Jakoba hnênah chuan, “I thil sen chhum kha khawngaih takin mi lo eitîr teh, ka ṭâmchhâwl a ni e,” a ti a. Hemi avâng hian a hmingah Edoma an vuah bawk a ni.

³¹Jakoba chuan, “Fa tîr nihnain lei rawh,” a ti a.

³²Esauva chuan, “Rilṭâmin ka thi mai dâwn alâwm, fa tîr nihna chu eng nge ka sâwtpui ang?” a ti a.

³³Jakoba chuan, “Chhia chham rawh,” a ti a, chhia a chham ta a, a fa tîr nihna chu Jakoba hnênah chuan a hralh ta mai a.

³⁴Jakoba chuan chhang leh a dailuah chhum chu a pe a, a ei a, a in a, a tho va, a kal ta a. Chutiangin, Esauva chuan a fa tîr nihna chu a ngainêp a ni.