Read Mizo Lushai Genesis 26 Bible Online

Genesis 26 - Mizo Lushai bible

Genesis 26

¹Abrahama dam laia ṭâm tla ni lo, chu ramah chuan ṭâm a lo tla leh a. Gerar khuaah, Filistia lal Abimeleka hnênah Isaka chu a kal ta a.

²LALPA chu a hnênah a rawn inlâr a, “Aigupta ramah chuan chhuk suh, ka kawhhmuh tûr che ramah awm la,

³chu ramah chuan châm reng ang che. Ka awmpui ang che a, mal ka sâwm ang che. Hêng ram zawng zawng hi nang leh i thlahte ka pe dâwn a ni.

⁴I thlahte chu vâna arsi zât khian ka tipung ang a, hêng ram zawng zawng hi i thlahte chu ka pe ang.

⁵Abrahaman ka aw a ngaih pawimawha, ka thu a zâwma, ka thupêkte, ka dânte leh ka zirtîrnate a pawm avâng khân,” a ti a.

⁶Gerar khuaah chuan Isaka chu a awm ta reng a.

⁷Chuta mite chuan Rebeki chu a nupui a nih leh nih loh an hre duh a. “Ka farnu a nih hi,” a ti a. “Ka nupui ka tih chuan Rebeki vâng hian min that mai ang, a hmêl a ṭha hle si a,” a ti a ni.

⁸Chumi khuaa rei tak a awm hnu chuan Filistia lal Abimeleka chu tukverhah a han dâk a, Isakan a nupui Rebeki a chhaih lai chu a phâwk a.

⁹Abimeleka chuan Isaka chu a ko va, a hnênah, “I nupui a lo ni reng a ni maw? Engtiziaa ‘ka farnu a ni,’ ti nge i nih le?” a ti a. Isaka chuan, “Amah avângin min thah mai ka hlau atin a ni,” a ti a.

¹⁰Abimeleka chuan, “I nupui ni si mutpui tumte kan lo awm mai thei asin; tlêmah tlêmah thil sual min tihtîr ṭhelh alâwm le,” a ti a.

¹¹Mi zawng zawng hnênah Abimeleka chuan, “Tu pawh, he mi hi emaw, a nupui hi emaw khawih tawh phawt chu tihhlum an ni ang,” a ti bawk a.

¹²Chu ramah chuan Isaka chuan thlai a chîng a. Chumi kum chuan a lêt za a thar a, LALPA chuan mal a sâwm a ni.

¹³A neinung tial tial a, mi hausa tak a lo ni ta a.

¹⁴Berâm rual te, bâwng rual te, ṭhuihruai te a ngah ta êm êm a. Filistia-ho chuan an îtsîk ta a.

¹⁵Tichuan, a pa Abrahama dam laia, a pa chhiahhlawhte tuichhunchhuah laih zawng zawng chu Filistia-ho chuan an hnawhsak a, lei an chhûng khat ta vek a.

¹⁶Abimeleka chuan Isaka hnênah, “Kan aiin i chak ta hle si a, heta ta hi insawn rawh,” a ti a.

¹⁷Isaka chu chuta ṭang chuan a insawn a, Gerar ruamah awmhmun a khuar ta a.

¹⁸A pa Abrahama dam laia an tuichhunchhuah laih, Abrahama thih hnua Filistia-hovin an hnawhte chu a lai leh a, a pain hming a vuah te kha hmingah a puttîr leh zêl a.

¹⁹Isaka chhiahhlawhten an awmna ruama tuichhunchhuah an laihah chuan tui a lo awm ṭha hle a.

²⁰Gerar berâm vêngtute chuan Isaka berâm vêngtute hnênah, “He tui hi kan ta a ni,” tiin an rawn chuh a. Tichuan, chu tuichhunchhuah hmingah chuan ‘Esek’ a vuah a, an rawn chuh buai avânga vuah a ni.

²¹Tuichhunchhuah dang an lai leh a, an rawn chuh leh a, a hmingah Sitna a vuah a.

²²Chuta ṭang chuan a insawn a, tuichhunchhuah dang a lai leh a, chu zawng an rawn chuh ta lo va, a hmingah Rehobot a vuah a, “Tûnah zawng LALPA chuan kan inzârzauna tûr hmun min pe ta,” a tihna a ni.

²³Chuta ṭang chuan Beer-seba-ah a chho va.

²⁴Chumi zân chuan a hnênah LALPA a rawn inlâr a: “Kei hi i pa Abrahama Pathian ka ni, Thlaphâng suh, ka awmpui che alâwm. Mal ka sâwm ang che a, Ka chhiahhlawh Abrahama avângin i thlahte ka tipung ang,” a rawn ti a.

²⁵Chutah chuan maichâm a siam a, LALPA hming a lam a. Tah chuan bûk a khuar a, Isaka chhiahhlawhte chuan tuichhunchhuah an lai leh a.

²⁶Chutih lai chuan Gerar aṭangin Abimeleka chu a ṭhian Ahuzatha leh a sipai hotu Fikola nên an lo kal a.

²⁷Isaka chuan, “Min ngaithei lo va, in zîng ata min hnawt chhuak a, eng nge in duha in lo kal tâk le?” a lo ti a.

²⁸“LALPA chuan a awmpui che tih kan hre ta a, sa-ui tan ho ila kan ti a ni, kan inkârah inremna thu i thlung teh ang,

²⁹kan tibuai ngai lo che a, kan khawngaih hle ṭhîn che a, i insawn dâwn pawh khân ṭha takin kan kaltîr che a, nang pawhin kan pawi khawih bîk suh ang che,” an ti a.

³⁰Ruai a ṭhehsak a, an ei a, an in a.

³¹A tûk zîngah chuan chhia an chham dûn ta a. Isaka chuan a thlah a, ṭha takin an inṭhen ta a.

³²Chumi ni chuan Isaka chhiahhlawhte chu an lo kal a, an tuichhunchhuah laihah tui ‘kan hmu ta e,’ an rawn ti a.

³³A hmingah Seba a vuah a, tûn thlengin chu khua chu Beer-seba an la ti a ni.

³⁴Hit mi, Beeria fanu Judithi leh Hit mi Elena fanu Basemathi chu kum sawmli-a upa a nihin Esauva chuan nupuiah a nei a.

³⁵Chûng mite chu Isaka leh Rebeki thin tina rengtute an ni.