Read Mizo Lushai Genesis 27 Bible Online

Genesis 27 - Mizo Lushai bible

Genesis 27

¹Isaka chu a upa ta hle a, a mit a thim a, khua a hmu thei ta lo hial a. A fapa upa zâwk Esauva chu a ko va, “Ka fapa,” a ti a. Ani chuan, “Eng nge ni?” a ti a.

²“Ka upa ta êm a, engtikah nge ka thih ang sawi theih a nih loh hi.

³I thal leh thalngul, i hriamhrei chu la la, va ramkal la, sakhi min va kahsak teh.

⁴Ka duhzâwng tak, hmui tui deuhvin siam la, mi han lâk ang che. Ka lo ei ang a, ka thih hma ngeiin ka malsâwmna i dawng dâwn nia,” a ti a.

⁵Isakan Esauva a bia chu Rebeki chuan a lo ngaithla reng a.

⁶Ramvâka a pa tân sakhi kâp tûra Esauva a chhuah veleh Rebeki chuan a fapa Jakoba hnênah, “I pain i u Esauva hnênah,

⁷‘Sa kâp la, hmui tui takin min han siam teh, ka lo ei ang e; ka thih hma ngeiin LALPA remtih zâwng angin mal ka lo sâwmsak ang che,’ a tih ka hre ru a ni.

⁸Chutichuan, ka hrilh ang che hian ti vat teh.

⁹Ran rual zîngah va kal la, kel no ṭha thlan chhuah pahnih han la ang che, i pa duhzâwng takin hmui tui deuhvin ka lo siam ang e.

¹⁰I pe ang a, a ei ang a, a thih hma ngeiin mal a sâwmsak dâwn che nia,” a ti a.

¹¹Jakoba chuan a nu Rebeki hnênah, “Ka u Esauva chu mi hmulphurh chhe tak a ni a, kei lah hmul nei lo, sa mâm tak ka ni si a.

¹²Ka pa chuan min han dap hlauh se amah ka tiduhdah emaw a ti ang a, mal sâwmsak ahnêkin ânchhia min lawh ngei ang,” a ti a.

¹³A nu chuan, “Ka fapa, ânchhia i dawn leh ka chungah tla rawh se, ka sawi ang chuan ti phawt mai rawh. Kal la, va la thuai tawh,” a ti a.

¹⁴Tichuan, a chhuak a, a va man a, a nu hnênah chuan a rawn la a, a nu chuan a pa duhzâwng takin a lo siam a.

¹⁵Rebeki chuan ina a kawl, a fa u zâwk thawmhnaw ṭha chu, a la a, a fa naupang zâwk Jakoba chu a hâktîr a.

¹⁶A bân leh a nghâwng sam awm lo laite chu, berâmno vun chuan a tuamsak a.

¹⁷Sa leh a chhang siam chu Jakoba hnênah chuan a pe a.

¹⁸A pa hnênah chuan a va kal a, “Ka pa,” a ti a. “Eng nge ni? Ka fapa tu zâwk nge i nih?” a lo ti a.

¹⁹Jakoba chuan a pa chu a chhâng a, “Esauva, i fa tîr kha ka ni. Min tirh angin ka ti a, lo tho la, ṭhu kâng teh, ka sakhi sa hi ei rawh le; tichuan, i malsâwmsakna ka dawng dâwn nia,” a ti a.

²⁰Isaka chuan a fapa hnênah, “Ka fapa, engtizia nge i va hlawhtling hma teh thut ve?” a ti a. “LALPA i Pathian chuan min tihmuingîl a ni,” a ti a.

²¹Isaka chuan Jakoba hnênah, “Ka fapa Esauva i ni nameuh emaw; ka lo dap teh ang che, lo kal hnai teh,” a ti hrâm a.

²²Jakoba chuan a va hnaih a, a lo dap vêl a. “A aw chu Jakoba aw a ni a, a kutte erawh chu Esauva kut zawng a nih si hi,” a ti a.

²³A bân chu a u Esauva bân angin a lo hmul si a, a hre hrang thei lo a ni. Mal a sâwmsak dâwn ṭêpah pawh chuan,

²⁴“Ka fapa Esauva i ni ngei maw?” a ti a. “Ni e,” tiin a chhâng a.

²⁵“Han la teh, ka fapa sakhi kah sa chu ka lo ei teh ang; tichuan, mal ka sâwmsak dâwn che nia,” a ti a. A hmaah chuan a hlui a, a ei a, uain a rawn lâk chu a in a.

²⁶A pa Isaka chuan, “Ka fapa, lo kal hnai la, mi han fâwp teh,” a ti a.

²⁷A va hnaih a, a fâwp a, a kawr rim chu a han hria a, mal a sâwmsak ta nge nge a: A! Ka fapa rim chu LALPA malsâwm ram rim ang veng veng a ni,

²⁸Vân daifîm chu Pathianin pe che sela, Lei hausaknate chu pe che rawh se. Buh leh uain nei thûr thûr bawk ang che,

²⁹Hnam dangte chuan i rawng bâwl se, Hnam tinrêngten chibai bûk che rawh se. I unaute chungah lal la, I nu fate chu i hmaah kûn rawh se. Ânchhe lawhtu che chu ânchhia lawh a ni ang a, Mal sâwmsaktu che chu duhsak an ni ve ang,” a ti a.

³⁰Isakan Jakoba mal a sâwmsak zo va, Jakoba chuan a pa a chhuahsan chiah tih chuan Esauva ramvâk chu a lo haw a.

³¹Ani pawh chuan hmui tui takin a siam a, a pa chu a rawn pe a, a pa hnênah chuan, “Ka pa chuan a fapa sakhi sa hi ei teh se; tichuan, mal a sâwmsak dâwn nia,” a ti a.

³²A pa Isaka chuan, “Tu nge i nih?” a ti a. “I fa tîr Esauva,” a ti a.

³³Isaka chu a khûr ta hlawk hlawk a, “Sa kâpa mi rawn petu kha tu nge ni ta ang le? I lo haw hma chiah khân ka lo ei zo hman a, mal ka sâwmsak tâk kha! Malsâwmna chu a chang hlen tho dâwn,” a ti a.

³⁴A pa thu a han hriat chuan Esauva chu lungngai takin a ṭap ta zawih zawih a, “Ka pa, kei hi, mal min sâwmsak ve ta hrâm che,” a ti a.

³⁵“I nau a lo kal a, min bum a ni, i dawn tûr malsâwmna chu a kalpui ta,” a ti a.

³⁶“A hming Jakoba a ni rêng a, vawi hnih tlawng min bum tâk hi. Ka fa tîr nihna min neihsak a, malsâwmna ka dawn tûr pawh min dawn khalh ta a nih hi. Malsâwmna tlêm tal i la nei lâwm ni?” tiin a ngên a.

³⁷Isaka chuan Esauva chu a chhâng a, “I chunga lal tûrin ka lo ti diam tawh, a laichîn zawng zawngte a bawih atân ka pe a, buh leh uain nei ṭeuh tûrin ka lo ti tawh bawk a. Chuvângin, ka fapa, eng nge maw tihsak tûr che ka la neih ang le?” a ti a.

³⁸Esauva chuan, “Malsâwmna pakhat mai em ni i neih? Ka pa, kei hi, mal min sâwmsak ve hrâm teh,” a ti a. Esauva chu a ṭap chiam a.

³⁹Isaka chuan a hnênah heti hian a ti leh a: I chênna chu ram ṭha aṭanga hla tak a ni ang a, Vân daifîmte chu i dawng lo vang.

⁴⁰I khandaih hmangin i nung ang a. I nau rawng i bâwl ang. Tharum i thawh hunah chuan A nghâwngkawl i bah chu i thing thla ang,” a ti a.

⁴¹A pain mal a sâwmsak tâk avângin Jakoba chungah Esauva chu a lungnilo hle a. Esauva chuan, “Ka pa kan sûn ni chuan ka nau Jakoba chu ka that ve ngei ang,” a ti a.

⁴²Chutiang chuan a fapa upa zâwk Esauva chu a ṭawng tih Rebeki an hrilh a, a fa naupang zâwk Jakoba chu a ko va, “Ngai teh, i u Esauva hian thah che tumin a inhnêm a ni.

⁴³Chuvângin, ka thu hi ngaithla teh. Haran khuaah ka nuṭa Labana hnênah tlânchhe daih la,

⁴⁴a hnênah chuan eng chen emaw va awm ang che. I u thinrim a daiha,

⁴⁵i thiltih avânga i chunga a thin na chu a dam hma chu va awm ang che, chutih hunah chuan mi ka rawn tîr ang a, a rawn hruai kîr dâwn che nia. Tichuan, in pahnihin ni khatah ka sûn dâwn lo che u nia,” a ti a.

⁴⁶Rebeki chuan Isaka hnênah, “Hêng Hit hmeichheho vâng hian dam pawh manhla ka ti ta lo; Jakoba hian hêng lai mi, Hit nula a neih ve lek phei chuan ka tân nun thlâkhlelh tlâk em ni ang?” a ti a.