Read Mizo Lushai Genesis 28 Bible Online

Genesis 28 - Mizo Lushai bible

Genesis 28

¹Tichuan, Jakoba chu Isakan a ko va, chibai a lo bûk a, hetiang hian a hrilh a: ‘Kanan nula nupuiah i nei tûr a ni lo.

²Tho la, Padan-aram-ah, i nu pa Bethuela inah kal la, i nu nuṭa Labana fanute zînga mi nupui va nei ang che.

³El-Sadaia chuan malsâwm che sela, i chi tiṭhain tipung che sela, tihtham tak hnam thlahtu ni ang che.

⁴Abrahama ang khân nang leh i thlahte chu malsâwm sela, Pathianin Abrahama a pêk, i mikhualna ram hi nei ang che,” a ti a.

⁵Isaka chuan Jakoba chu a kaltîr a, Padan-aram-a Suria mi Bethuela fapa, Jakoba leh Esauva nu nuṭa, Labana hnênah chuan a kal ta a.

⁶Jakoba chu Padan-aram lama nupui zawng tûra Isakan a tirh khân mal a sâwmsak a, mal a sâwmsak pah khân, “Kanan nula nupuiah i nei tûr a ni lo,” tiin a hrilh a,

⁷a nu leh pa thu awihin Jakoba chu Padan-aram lamah chuan a kal ta a.

⁸Chuvâng chuan, Kanan hmeichhiate chu Isaka chuan a ning hle ṭhîn a lo ni tih Esauva chuan a hre ta a.

⁹Chuvângin, Esauva chu Abrahama fapa Ismaela hnênah a kal a, a nupui neih sa bâkah Abrahama fapa Ismaela fanu Mahalathi, Nabaiotha farnu chu nupuiah a neih belh ta a.

¹⁰Jakoba chu Beer-seba ata chu Haran khuaa kal tûrin a chhuak ta a.

¹¹Ni a tlâk chuan hmun pakhat chu a va thleng a, riah zai a rêl ta a. Lung pakhat hi a la a, a lukham a, a mu ta a.

¹²Mumang a nei a, lei aṭanga vân thleng kailâwn lo awm zur chu a hmu a. Pathian Vântirhkoh rual an lo chhovin an lo chhuk zut zut a.

¹³LALPA chuan a lo dinchilh reng a, “Kei LALPA hi, i pa Abrahama Pathian, Isaka Pathian ka ni. I mutna lei hi nang leh i thlahte ka pe dâwn a ni.

¹⁴I thlahte chu leia vaivut zât an ni ang a, chhak leh thlang, chhim leh hmârah an inzâr darh ang, leia hnam tinrêngin nang leh i thlahte chu induhsakna ṭawngkam takah an hmang ang che.

¹⁵Ngai rawh, ka awmpui a che, i kalna apiangah ka vêng ang che a, he ramah hian ka hruai kîr leh ang che, ka thutiam ka tihhlawhtlin hma chu ka thlahthlam lo vang che,” a ti a.

¹⁶Jakoba chu a lo ṭhangharh a, “Hetah hian LALPA a lo awm a nih hi, ka lo hre si lo va,” a ti a.

¹⁷Hlauvin a khûr a, “He hmun hi hmun ṭihbaiawm tak a nih hi, Pathian in a lo ni reng mai, vân lama chhohna kawngka chu,” a ti bawk a.

¹⁸Zîngah chuan Jakoba chuan lung a lukham chu a la a, a phun a, a chhîpah hriak a leih a.

¹⁹Chu hmun hmingah chuan Bethel a vuah a, tûn hma chuan chu hmuna khaw awm hming chu Luz a ni.

²⁰Jakoba chuan thu a tiam a, “Pathianin min awmpui a, ka khualzinna lama min vên zêla, ei tûr leh sin tûr min pêk zêla,

²¹ka pa ina him taka ka lo kîr leh chuan LALPA hi ka Pathian a ni ang a.

²²He ka lungphun pawh hi Pathian in a ni ang, i thil min pêk zawng zawng aṭangin sâwma pakhat ka pe ngei ngei ang,” a ti a.