Read Mizo Lushai Genesis 29 Bible Online

Genesis 29 - Mizo Lushai bible

Genesis 29

¹Jakoba chu a kal ta zêl a, khawchhak mite ram chu a thleng ta a.

²Chutah chuan tuichhunchhuah a va hmu a, a bulah chuan berâm rual pâwl thum an lo bawk chu a va hmu a. Chu tuichhunchhuah tui chu an intîr ṭhîn a ni.

³Tuichhunchhuah chhinna lung chu a lian hle a, berâm rual an rawn khalh thlen kim hunah chauh a chhîn chu an lum sawn thei a, tui an intîr ṭhîn a ni; an in zawhah an chhîn ṭha leh ṭhîn.

⁴Jakoba chuan berâm vêngtute hnênah, “Ṭhiante u, khawii khua nge in nih?” a ti a. Anni chuan, “Haran khua kan ni,” an ti a.

⁵“Nahora fapa Labana kha in hria em?” a ti a. Anni chuan, “Hria e,” an ti a.

⁶Ani chuan, “An dam lai em ni?” a ti a. “Dam e, a fanu Rakili pawh, saw, a berâm rual nên a lo kal saw,” an ti a.

⁷“Ni a la sâng hle si a, engati nge berâmte chu tui in intîr loh, an la tla leh hman alâwm,” a ti a.

⁸“Berâm rual zawng zawng an lo thlen kim vek hunah tui kan intîr thei chauh ṭhîn a ni,” a ti a.

⁹An inbiak lai chuan Rakili pawh chu, a pa berâm rual nên a lo thleng a, berâm a vêng ve rêng ṭhîn a ni.

¹⁰A nu nuṭa Labana fanu Rakili chu, a nu nuṭa Labana berâmte nên a hmuh chuan tuichhunchhuah chu a hnaih a, a chhinna lung chu a lum sawn a, a nu nuṭa Labana berâm rual chu tui a intîr ta a.

¹¹Jakoba chuan Rakili chu a fâwp a, aw chhuahin a ṭap ta a.

¹²“I pa tupa, Rebeki fapa ka nih hi,” Rakili hnênah chuan Jakoba chuan a ti a. Ani chu a pa hrilh tûr chuan a tlân hâwng ta a.

¹³Labanan a farnu fapa Jakoba chanchin a hriat chuan lâwm tûrin a tlân chhuak a, a pawm a, a fâwp a, a inah a hruai lût ta a. Chanchin engkim Labana chu a hrilh a.

¹⁴Labana chuan a hnênah, “Ka thisen zawmpui ngei i ni alâwm,” a ti a. Jakoba chu Labana inah thla khat a awm ta a.

¹⁵Labana chuan a hnênah, “Ka tupa i nih avângin a thlâwna ka chhawr reng thu che a awm lo, eng nge hlawh i duh, min hrilh rawh,” a ti a.

¹⁶Labana chuan fanu pahnih a nei a, a upa zâwk hming chu Leaii a ni a, a naupang zâwk hming chu Rakili a ni.

¹⁷Leaii chu a meng mawi hle a; Rakili phei chu tituai ṭha deuh, hmêlṭha tak a ni.

¹⁸Jakoba chuan Rakili chu a ngaizâwng a. “Kum sarih min chhawr la, i fanu naupang zâwk Rakili hi ka hlawh ang e,” a ti a.

¹⁹Labana chuan, “Mi dang daih neihtîr ai chuan nang neihtîr che chu a ṭha zâwk ang,” a ti a.

²⁰Jakoba chuan Rakili hlawh tûrin kum sarih a thawk a, a ngaihzâwn êm avângin ni rei lo tê lek niin a hria.

²¹Jakoba chuan Labana hnênah, “Ka hun ka tlâk ta bawk a, ka nupui tûr chu min neihtîr tawh rawh le,” a ti a.

²²Labana chuan khuaa mite chu a sâwm a, ruai a ṭheh a.

²³Zân thimah chuan a fanu Leaii chu a kai a, Jakoba hnênah chuan a hruai a, a lo mutpui a.

²⁴Labana chuan a bawih nula Zilpaii chu Leaii a chhawmtîr a.

²⁵Zîng a lo nih chuan Leaii a lo ni reng mai si a. Jakoba chuan Labana hnênah, “Min tih dân hi engtizia nge? Rakili hlawhah min chhawr a ni lâwm ni? Engati nge min bum?” a ti a.

²⁶Ani chuan, “Fanu upa zâwk aiin a naupang zâwk kaltîr hmasak hi hêng lai ram dân a ni hlei nêm.

²⁷Mo lawm hapta chhûng hmang tlingtla zet la, a nau zâwk pawh i nei mai dâwn nia; kum sarih dang ka chhawr leh ang che,” a ti a.

²⁸Jakoba chuan a nupui hmasa zâwk lawmna hapta khat chu a tlingtla a, Labana chuan Rakili pawh chu nupuiah a neihtîr ta a.

²⁹Labana chuan a chhiahhlawh nula Bilhaii chu a fanu Rakili a chhawmtîr a.

³⁰Jakoba chuan a lo nei ta a, Leaii ai chuan a duh zâwk a. Labana chuan Jakoba chu kum sarih dang a chhawr zui ta a.

³¹ LALPA chuan Leaii chu a chuang hle tih a hriat chuan a chhûl a hawnsak a, Rakili erawh chuan nau a nei thei lo.

³²Leaii chuan nau a nei a, fapa a hring a, a hmingah Reubena a sa a. “Tûnah chuan ka manganna a hmu” tihna a ni. “Ka pasal pawhin min duh deuh tawh ang,” a ti bawk a.

³³Nau a nei leh a, fapa a hring a, “LALPA chuan hmangaih ka hlawh lo tih a hria a, hei pawh hi min pe a nih hi,” a ti a, a hmingah Simeona a sa a.

³⁴Nau a pai leh a, fapa a hring a, “Tûnah zawng ka pasal fapa pathum ka hrinsak ta a, min lungrualpui tawh ang,” a ti a, a hmingah Levia a sa a.

³⁵Nau a pai leh a, fapa a hring leh a, “Tûn ṭum chu LALPA ka chawimawi dâwn e,” a ti a, a hmingah Juda a sa ta a ni. Nau a pai nawn leh ta lo va.