Read Mizo Lushai Genesis 3 Bible Online

Genesis 3 - Mizo Lushai bible

Genesis 3

¹ LALPA Pathian siam ramsa zîngah rûl hi a fing vervêk ber a, hmeichhe hnênah chuan, “Huana thei rah rêng rêng hi Pathianin in ei a khap che u elo maw?” a ti a.

²Hmeichhia chuan rûl hnênah, “Huana thei rahte hi kan ei thei asin.

³Huan laia awm thing rah hi erawh chu Pathian chuan, ‘Ei suh u, tawh pawh tawk suh u, in thi mai ang,’ min ti a ni,” a ti a.

⁴Rûl chuan hmeichhe hnênah, “Thi teh suh e!

⁵In ei veleh in mit a lo vâr ang a, Pathian angin a chhia a ṭha in thlei ve tawh dâwn tih Pathian chuan a hria atin alâwm,” a ti a.

⁶Hmeichhia chuan thei tuihnai, tui âwm tak, fin theihna tûra thei îtawm tak a ni tih a hmuh chuan a lo va, a ei ta a; a ṭhen chu a pasal a pe ve a, ani pawh chuan a ei ta a.

⁷An pahnih chuan an mit a lo vâr a, saruak an nih an hrechhuak ta a; tichuan, theipui hnah an chilh khâwm a, fên tûr an insiam a.

⁸Tlai ni nêm chuan huana LALPA lo lêng thâwm chu an hria a, mipa leh a nupui chuan thing zîngah Pathian chu an bihrûksan ta a.

⁹ LALPA Pathian chuan mihring chu a ko va, a hnênah, “Khawiah nge i awm tâk?” a ti a.

¹⁰“Huana i thâwm ka hria a, saruak ka nih avângin ka hlau che a, ka biru a ni,” tiin a chhâng a.

¹¹“Saruak i nih tu nge hrilh che? Ei loh tûr ka tih thei kha i lo ei a ni maw?” a ti a.

¹²Mipa chuan, “Mi awmpui tûra i tih hmeichhia khân thei rah chu mi pe a, ka ei ta a ni,” a ti a.

¹³LALPA Pathian chuan hmeichhe hnênah, “Engtiziaa hetiang thil hi ti nge i nih?” a ti a. Hmeichhia chuan, “Rûlin min tihder a, ka ei ta mai a ni,” a ti a.

¹⁴ LALPA Pathian chuan rûl hnênah, “He thil hi i tih tâk avângin ran zawng zawng leh ramsa tinrêng dawn aia nasa zâwk ânchhia i dawng dâwn a ni; leiah i tleng ang a, i dam chhûng zawng chu vaivut i ei ṭhîn ang.

¹⁵“Nang leh hmeichhia hi ka inhmêlmâktîr ang che u a, i thlahte leh a thlahte pawh an inhmêlmâk zêl ang. I luruh a vaw keh ang a, nangin a keartui i chuk ang,” a ti a.

¹⁶Hmeichhe hnênah chuan, “I nau vei na ka tizual ang a, na ti takin fa i hring dâwn a ni; mahse, i thlâkhlelh chu i pasal a ni ang a, ani chuan i chungah thu a nei ang,” a ti a.

¹⁷Adama hnênah chuan, ‘I nupui thu i zâwm a, ei loh tûr ka tih thei kha i ei a, i tân lei hi ânchhia ka lawh ta. I dam chhûng zawng hah takin ei tûr i thawk chhuak ang.

¹⁸Hnimhlîngnei te, hlohar te a ṭo vang a, chuta thlai chu i ei ang.

¹⁹I lo pian chhuahna leia i kîr leh hma chu thlansaphûlkaiin ei i zawng ang. Vaivut i ni a, vaivutah bawk i kîr leh tûr a ni,” a ti a.

²⁰Mipa chuan a nupui chu mi zawng zawng nu a nih avângin a hmingah Evi a sa a.

²¹LALPA Pathian chuan mipa leh a nupui tân savun puan a siam a, a sintîr a.

²² LALPA Pathian chuan, “Mihring chuan keimahni angin a chhia a ṭha a thlei ve ta si a, nunna thing rah chu lovin a ei ang a, a nung reng thei mai ang a!” a ti a.

²³Tichuan, LALPA, Pathian chuan a pian chhuahna ram chu lova nei tûrin Eden huan aṭang chuan a hnawt chhuak ta a.

²⁴Mihring a hnawh chhuah hnu chuan Eden huan chhak lamah cherub-te leh khandaih vir tawn, huan vêng tûr chuan a dah a.