Read Mizo Lushai Genesis 30 Bible Online

Genesis 30 - Mizo Lushai bible

Genesis 30

¹Rakilin Jakoba chu fa rêng a hrinsak loh avâng chuan a laizâwnnu Leaii chu a îtsîk hle a.

²Jakoba hnênah Rakili chuan, “Fa min pe ve rawh; chutilo chu, ka thi mai ang,” a ti a. Jakoba chu Rakili chungah chuan a thinur a, “Fa nei thei lova siamtu che Pathian em ka nih?” a ti a.

³Rakili chuan, “Hei, ka chhiahhlawhnu Bilhaii hi mutpui teh, mal chunga ka chawi ve tûr fa min hrinsak dâwn nia,” a ti a.

⁴Hmei atân a chhiahhlawh Bilhaii chu Jakoba a neihtîr ta a.

⁵Bilhaii chuan nau a pai a, Jakoba chu fapa a hrinsak a.

⁶Rakili chuan, “Pathianin ro min rêlsak a, ka dîl angin fapa min pêk tâk hi,” a ti a, a hmingah Dana a sa a.

⁷Rakili chhiahhlawh Bilhaii chuan nau a pai leh a, Jakoba chu fa a hrinsak a.

⁸Rakili chuan, “Ka laizâwnnu nên namên lovin inchuh kan nei a, ka chan a ṭhat tâk hi,” a ti a, a hmingah Naftalia a sa a.

⁹Leaii chuan nau a pai thei ta lo tih a inhriat chuan a chhiahhlawh Zilpaii chu hmeiah Jakoba chu a neihtîr a.

¹⁰Leaii chhiahhlawh Zilpaii chuan Jakoba chu fapa a hrinsak a,

¹¹Leaii chuan, “A va nihlawhthlâk êm!” a ti a, a hmingah Gada a sa a.

¹²Leaii chhiahhlawh Zilpaii chuan Jakoba chu fa dang a hrinsak leh a.

¹³Leaii chuan “Nihlawh min va ti dâwn e,” a ti a, a hmingah Asera a sa a.

¹⁴Ni khat chu huit seng laiin Reubena chu lovah a kal a, zâwlaidi a hmu a, a nu Leaii a hawnsak a. Rakili chuan Leaii hnênah, “I fapa zâwlaidi chu a ṭhen min pe ve hrâm teh,” a ti a.

¹⁵Leaii chuan, “Ka pasal min chhuh mah tihin ka fapa zâwlaidi leh zêl pawh min lâksak i tum em ni?” a ti a. Rakili chuan, “I fapa zâwlaidi min pe la, zâninah i bulah a mu dâwn nia,” a ti a.

¹⁶Tichuan, tlaia Jakoba feh haw chu Leaii chuan a lo hmuak a, “Zânin chuan ka hnênah i awm tûr a ni, ka fapa zâwlaidiin ka thleng tawh che a ni,” a ti a. Chumi zân chuan a bulah a awm ta a.

¹⁷Pathian chuan Leaii dilna chu a ngaithla a, nau a pai a, Jakoba chu a pangana tûr fapa a hrinsak ta a.

¹⁸Leaii chuan, “Pathianin ka pasal hmeia ka chhiahhlawh ka neihtîr man min pe ta a nih hi,” a ti a, a hmingah Isakara a sa a.

¹⁹Leaii chuan nau a pai leh a, Jakoba chu a parukna atân fapa a hrinsak leh a;

²⁰“Pathianin thil hlu tak min pe a nih hi. Tûn ṭum hi chuan ka pasal fapa paruk ka hrinsak tâk avângin thilpêk hlu tak min pe ngei ang,” a ti a, a hmingah Zebuluna a sa a.

²¹A tâwp berah chuan fanu a hring a, a hmingah Dinaii a sa a.

²²Pathianin Rakili chu a hre reng a, Pathianin a khawngaih a, a chhûl a hawnsak a.

²³Nau a pai a, fapa a hring a. “Pathianin ka hmingchhia min chhilhsak ta,” a ti a.

²⁴A hmingah Josefa a sa a. “LALPA chuan fapa min pêk belh ta a nih hi,” a ti a.

²⁵Rakilin Josefa a hrin hnu chuan Jakoban Labana hnênah, “Kan ram, kan in leh lo lamah min hawtîr tawh rawh le.

²⁶Ka thawh hlawh, ka nupui leh ka fate hi min pe la, ka kal chhuak dâwn nia, ka thawhsak nasatzia che i hria alâwm,” a ti a.

²⁷Labana chuan, “Ngawi hrâm teh rih. Nangmah avângin LALPA chuan min tihmuingîl a ni tih hriatna ka nei a ni.

²⁸Chuvângin, hlawh i duh zât zât min dîl rawh, ka pe mai ang che,” a ti a.

²⁹“Ka tha i hlâwkpuizia i hria a, ka enkawl chhûngin i ran lo pun tâkziate pawh i hria.

³⁰Ka lo kal hmaa tlêm tê kha tûnah chuan a tam tâk êm hi; ka thawhna lam apiangah LALPA chuan mal a sâwm zui zêl che a ni. Ka puala eng emaw ka tih chu a hun ta hle a ni e,” a ti a.

³¹“Eng nge ka pêk ang che?” a ti a. Jakoba chuan, “A hrana hlawh min pêk a ngai lo, hetiang hi i remtih theih chuan i rante hi ka thlah ang a, ka enkawl leh ang.

³²Vawiin hian i ran rual va en chhuak ila, berâm zînga a dum te, kêl zînga a vâr pheuh pheuh leh a ṭiala vâr ṭhik ṭhek te la chhuak la, ka hlawh atân dah hran ni rawh se.

³³Ka hlawh i rawn enfiah leh hunah ka rinawm leh awm loh chu rang takin i hre mai thei ang. Ka ran zîngah berâm dum ni lo, kêl pawh a vâr pheuh pheuh leh a ṭial ṭhik ṭhek ni lo i hmuh chuan ka rûkah ngai zêl ang che,” a ti a.

³⁴Labana chuan, “Ni e maw le, i sawi ang chu ni rawh se,” a ti a.

³⁵Nimahsela, chumi ni chuan kêlpa ṭial leh vâr pheuh pheuh, kêlpui vâr phoh phoh leh ṭial ṭhik ṭhek, a vâr kahte leh berâm dumte chu a la hrang a, a fate a enkawltîr a.

³⁶Jakoba awmna aṭanga ni thum kalah a awmtîr a; Jakoba chuan Labana ran la awmte chu a khalh a, a enkawl zui ta a.

³⁷Jakoba chuan chawngtlai ṭang te, theite ṭang te, sehawr ṭang te a la a, a pil a khawk ṭial thluah thluah hlawm a.

³⁸Chûng thingṭang ṭial chu ran tui inna kuang bulah, an hmuh theih tûrin a dah a, tui in tûra an lo kal chu an inbawh ṭhîn a ni.

³⁹Kêl chuan tiang ṭial en chunga an rai chuan ṭial phoh phoh te, ṭial ṭhik ṭhek te, a vâr kah te an hring a.

⁴⁰Jakoba chuan berâm leh kêl chu a dah hrang a, tiang ṭial chu Labana kêl dumte hmuh tûrin a dah a. Chutiang chuan ama ta tûr chu a tipung a, Labana ta nên chuan a dah hrang zêl a.

⁴¹Ran hrisêl deuh chu an inbawh dâwnin tiang ṭial chu an hmuh tûrin tui kuang bulah chuan a dah zêl a.

⁴²Ran sawngnawi deuhte hmaah chuan tiang ṭial chu a dah ve duh lo. Tichuan, a sawngnawi deuhte chu Labana chuan a nei ta zêl a, Jakoba chuan a pianṭha deuhte chu a nei ta zêl a.

⁴³Ani chu a neinung ta hle a, ran a ngah ta êm êm a, chhiahhlawh, mipa leh hmeichhia pawh a ngah a, sanghâwngsei te leh sabengtung te pawh a nei a.