Read Mizo Lushai Genesis 31 Bible Online

Genesis 31 - Mizo Lushai bible

Genesis 31

¹Labana faten, “Jakoban kan pa thil neih zawng zawng a lâksak zêl a, kan pa ta tûrin a intihausa a ni,” an tih thâwm chu Jakoba chuan a lo hria a.

²Labanan a en dân pawh ni dang a ang ta lo tih a hmu bawk a.

³LALPA chuan Jakoba hnênah, “I pianna, i pate ramah kîr leh tawh rawh, ka awmpui zêl ang che,” a ti bawk a.

⁴Jakoba chuan Rakili leh Leaii chu ran tlatna phûla lo kal tûrin a chah a;

⁵an hnênah, “In pa mi en dân hi tûn hma a ang ta lo tih ka hmu thei a ni; mahse, ka pa Pathian chuan min awmpui zêl a.

⁶In pa tân theihtâwp chhuahin ka thawk ṭhîn tih in hria e.

⁷Nimahsela, in pa hian a duh duhin min chawkzân a, ka hlawh tûr lah a nawm a mâkin a tidanglam a. Ka chhiat dêr erawh chu Pathianin a phal lo a ni.

⁸‘A ṭial ṭhik ṭhek i hlawh dâwn nia,’ a tih leh ran rualte chuan a ṭial thik thek hlîr no an nei a; ‘a vâr phoh phoh i hlawh dâwn nia,’ tia a thu a thlâk leh pawhin ran rual chuan a vâr phoh phoh hlîr an nei a.

⁹Chutiangin Pathianin in pa ran chi ṭha chu a chhuhsak a, min pe zêl a ni.

¹⁰“Vawi khat ran rual hur laiin mumang ka nei a, a bawhtu kêlpa zawng zawng chu a ṭial ṭhik ṭhek te, a vâr phoh phoh te, a vâr kah zeuh zeuh te vek an lo ni a.

¹¹Ka mumangah chuan Pathian Vântirhkohvin min lo bia a, ‘Jakob,’ a ti a. Kei chuan, ‘Eng nge ni?’ ka ti a.

¹²‘Dâk la, en chiang teh, ran rual bawhtu, a pa zawng zawng saw, a ṭial ṭhik ṭhek te, a vâr phoh phoh te leh a vâr kah zeuh zeuhte an nih vek saw. Labanan i chunga thil a tih dân ka hmuh ve reng avângin sawtiang sâwn thil a awm a ni.

¹³Bethel-ah i lungphun hriak i hnawih a, thu i tiam a, khata i hnêna inlâr Pathian kha ka nih hi. Tho la, he ram hi chhuahsan la, i pianna ramah kîr leh tawh rawh,’ min ti a ni,” a ti a.

¹⁴Rakili leh Leaii chuan an chhâng a, “Kan pa ro kan chan ve tûr eng mah a awm tawh lo;

¹⁵mikhual ang lekah min ngai tawh a ni lâwm ni? Min hralh a, kan man te lah a ei zo vek tawh bawk si.

¹⁶Kan pa sum, Pathianin a chhuhsak zawng zawng hi kan chan tûr rêng a ni asin, Pathianin a hrilh che ang chuan ti zêl mai rawh,” an ti a.

¹⁷Tichuan, a fate leh a nupui te chu sanghâwngsei chungah a chuantîr a.

¹⁸A ran rualte chu a khalh a, a thil neih zawng zawng, Padan-aram-a a awm chhûnga a thil neih thar zawng zawng chu a keng a, Kanan ram, Isaka awmna ram chu pan tûr chuan a chhuak ta a.

¹⁹Chutih lai chu Labana, berâm hmul mêt tûra a thang bo hlân a ni a, Rakili chuan a pa chhûngkaw pathian milimte chu a rûksak a.

²⁰Jakoba pawh chuan Suria mi Labana chu a thlim a, eng mah hrilh lovin ngaihngam takin a awmtîr a ni.

²¹Chutiang chuan a neih zawng zawng nên a kal ta a, Eufretis lui chu a kân sawk sawk a, Gilead tlângram chu a pan ta vang vang a.

²²A ni thum ni chuan Jakoba tlânchhiat thu chu Labana an hrilh a.

²³A ṭhuihruaite a khâwm a, a ûm ta a. Ni sarih a kal hnu chuan Gilead tlângramah a va ûmpha a.

²⁴Suria mi Labana chuan zâna a mumangah Pathian a hmu a, “A chhia a ṭha Jakoba hnênah fîmkhur takin thu sawi rawh,” a rawn ti a.

²⁵Labanan a ûmphâk khân Jakoba chuan tlâng sâng laiah puan in a lo zâr tawh a, Labana leh a ṭhuihruaite chuan Gilead tlângah bâwk an zâr ve ta a.

²⁶Labana chuan Jakoba hnênah, “Ngaihngam takin min awmtîr a, min bum a, ka fanute hi engtizia nge râl man ang hrima i lâk daih le?

²⁷Min hrilh duh lo va, min thlim a, a rûka i tlân bo mai hi engtizia nge? Benchhek te leh perhkhuangte tumin hlim takin kan thlah tûr che alâwm.

²⁸Ka tu leh fate thlahin a fawh takngial pawh min fawhtîr phal lo va. I thil tih dân hi a âtthlâk lutuk a ni.

²⁹Tichhe vek thei che ka ni asin; mahse, nizâna ka mumangah i pa Pathian ka hmu a, ‘Jakoba hnênah a chhia emaw, a ṭha emaw, fîmkhur takin thu sawi rawh,’ min rawn ti a.

³⁰I pa in lam i ngai a, i haw châk êm a nih pawhin kan chhûngkaw pathian leh zêl engati nge min rûksak?” a ti a.

³¹Jakoba chuan a chhâng a, “I fanute hi min chhuhsak mai ang tih ka hlau êm a ni.

³²In chhûngkaw pathian erawh chu kan zînga lo la an awm a niha, i hmuh chhuah chuan thah ni rawh se. Hêng kan unaute hmaah ngei hian, eng pawh i ta i hmuh chuan la zêl ang che,” a ti a. Jakoba chuan Rakilin a lo ru tih a hre si lo.

³³Jakoba puan in chu Labana chuan a dap hmasa a, Leaii puan in leh an chhiahhlawhte puan in chu a dap zêl a, a hmu zo lo va. Leaii puan in ata a lo chhuak a, Rakili puan inah chuan a lût a.

³⁴Rakili chuan milimte chu sanghâwngsei zângdam zîngah a lo thukru hman a, a ṭhut hnan a. Labanan puan in chhûng chu a dap vek a, eng mah a hmu lo va.

³⁵Rakili chuan a pa hnênah, “Ka lalpa chuan a hmaa ka tho lo hi ngaih loh lamah ngai teh suh se, hmeichhe dân angin ka fel loh lai a ni atin a ni,” a ti a. A dap ngun hle na a, milimte chu a hmu lo.

³⁶Jakoba chu Labana chungah chuan a thinur a, a âng ve ta thung a. “Eng nge ka bawhchhiata, thil eng nge ka tih suala min rawn ûm hi?

³⁷Ka neih zawng zawng i dap chhuak a, in chhûngkaw thil pakhat tê pawh i hmu em ni? I hmu a nih chuan han phawrh teh; hêng kan unaute hian kan inkâr thu rêl mai teh se.

³⁸“Kum sawmhnih i hnuaia ka thawh chhûng khân i berâm leh kêlpuite chuan no an chhiat ngai lo va, i berâmpa lah ka talh ngai hek lo.

³⁹Ramsa seh ka sawi ngai lo, keiman ka rûl zêl a. A bo rêng rêng, zâna bo emaw, chhûna bo emaw, min rulhtîr zêl a.

⁴⁰Chhûn nisain min em chau fo va, zân vûr tla khaw vawtin min hmet khawng fo bawk a, mutmu pawh ka tuah thei ṭhîn lo a ni.

⁴¹Kum sawmhnih i hnêna ka awm chhûng khân i fanute pahnih hlawh tûrin kum sâwm leh pali min chhawr a. Kum ruk, i ran hlawh tûra i ran ka vên chhûngin ka hlawh vawi sâwm i tidanglam a.

⁴²Ka pa Pathian, Abrahama Pathian, Isaka Ṭiha chu ka lamah ṭang lo se kut bêngin min kaltîr dâwn a nih hi. Amaherawhchu, Pathianin ka hahzia te, ka thawhrimzia te a hmu a, nizân khân i hriat tûrin ka thu a lo rêl fel a nih chu,” a ti a.

⁴³Labana chuan Jakoba chu a chhâng a, “Hêng hmeichhiate hi ka fanute an ni a, an fate pawh ka ta an ni, ran rual chen hian ka ta a ni, dân ang chuan i hmuh apiang hi ka ta a la ni. Ka fanute leh an fa hrinte hi vawiin hian eng nge ka tihsak tâk ang?

⁴⁴Ti teh, keini pahnih hi, kan inkârah thu i thlung teh ang; lung rem vûm ila, chu chu a chhinchhiahna ni rawh se,” a ti a.

⁴⁵Jakoba chuan lung a la a, a phun ta a.

⁴⁶Jakoba chuan a ṭhuihruaite chu, “Lung pu khâwm teh u,” a ti a. Lung a la khâwm a, an rem vûm a, chutah chuan chaw an ei ho ta a.

⁴⁷Labana chuan chu chu Jegarsahadutha a vuah a; Jakoba erawh chuan Galeed a vuah a.

⁴⁸Labana chuan, “He lung rem vûm hi vawiin aṭangin kan inkâra thuthlung chhinchhiahna ni rawh se,” a ti a.

⁴⁹Chuvâng chuan a ni, a hmingah Galeed an vuah tâk ni. Mizpa an ti bawk, Labana chuan, “Hmêl kan inhmuh loh chhûngin LALPA chuan min vêng tawn rawh se.

⁵⁰Ka fanute hi i tihnawmnah emaw, nupui dang i neihsan emaw a nih chuan tu dangin min hre lo mah se, kan inkâra thuhretu chu Pathian a ni tih hre reng ang che,” a ti a.

⁵¹Labana chuan Jakoba hnênah, “Hei, lung vawm vûm leh kan inkâra lungphuna ṭang tûr ka phun hi.

⁵²Ka lung rem vûm leh lungphun hi ka pawi khawih tûrin i rawn pêl tûr a ni lo tih hriatna ni rawh se.

⁵³Abrahama Pathian, Nahora Pathian, an pahniha Pathian chuan kan inkâr thuthlung hi vawng him rawh se,” a ti a. Jakoba chuan a pa Isaka Ṭiha chhâlin chhia a chham a.

⁵⁴Tlâng sângah chuan Jakoban ran a hlân a, a sa ei tûrin a ṭhiante chu a sâwm a. An ei zawh chuan tlâng sângah chuan an riak a.

⁵⁵A tûk zîngah chuan a fanute leh a tute chu Labana chuan a fâwp a, “Dam takin,” a ti a, a awmna lamah a haw ta a.