Read Mizo Lushai Genesis 32 Bible Online

Genesis 32 - Mizo Lushai bible

Genesis 32

¹Jakoba chu a kal zêl a, Pathian Vântirhkohte chuan an lo tâwk a.

²Anni chu a hmuhin Jakoba chuan, “He lai hi Pathian sipaite ṭanhmun a ni phawt mai,” a ti a, chu hmun chu Mahanaim a vuah a.

³A u Esauva chu Edom mite chênna Seir ramah a awm a, Jakoba chuan mi a tîr a, hetiang hian a hrilhtîr a:

⁴“Ka Lalpa Esauva hnênah chuan ‘I chhiahhlawh Jakoba chuan heti hian a ti: Labana hnênah ka han awm a, tûn thlengin min lo chelh reng a ni.

⁵Bâwng leh sabengtung, berâm pawh, chhiahhlawh mipa leh hmeichhia nên ka nei ve ta. Min lo lawm beiseiin ka LALPA hnênah ka chanchin hi ka rawn than lâwk a ni,” tiin.

⁶A mi tirhte chu an lo haw leh a, Jakoba hnênah, “I u Esauva chu kan va hmu a, hmuak tûr chein amah ngei pawh a lo kal e, mi zali a rawn hruai,” an ti a.

⁷Jakoba chuan a hlau ta hle a, a thlaphâng mangang chuan a mi hruai te, a ran te, a bâwng te leh sanghâwngsei te chu pâwl hnihah a ṭhen a.

⁸Esauvan pâwl khat hi rawn nangchîngin bei mah se, pâwl khat hi an la insaseng thei ang,” a ti rilru a ni.

⁹Jakoba chu a ṭawngṭai a, “Aw LALPA, ka pu Abrahama Pathian, ka pa Isaka Pathian, ‘in ramah, i laichînte hnênah haw tawh rawh, i chungah ṭhat ka chhuah zêl dâwn,’ min ti a.

¹⁰I chhiahhlawh chungah ngil i nei tlat zêl ṭhîn hi ka phu loh a ni. Jordan lui ka kân khân ka tiang chauh lo chu eng mah ka nei lo va; tûnah zawng, pâwl hniha ṭhen tham hial ka lo nih tâk hi.

¹¹Ka u Esauva lakah hian min hum teh, ka ngên a che; chutilo zawng, nunau lamin mi a rawn sâm dah ang e.

¹²Nang chuan, ‘I chungah ṭhat ka chhuah ngei ang a, tuipui kama ṭiau chhiar sên loh angin i thlahte ka tipung ang,’ i tih kha,” a ti a.

¹³Chumi hmunah chuan a riak a, a ran kawl zîng ata a u Esauva pêk tûr a thlang chhuak a.

¹⁴Kêlpui zahnih leh a pa sawmhnih, berâmpui zahnih leh a pa sawmhnih,

¹⁵sanghâwngsei sâwr lai sawmthum an notê nên; bâwngpui sawmli leh a pa sâwm; sabengtungpui sawmli leh a pa sâwm a dah hrang a.

¹⁶Chûng chu a pâwl zêlin a chhiahhlawhte a khalhtîr a, an hnênah chuan, “Lo kal hmasa rawh u, kâr nei deuhvin kal ang che u,” a ti a.

¹⁷A pâwl hmasa ber khalhtu hnênah chuan, “Ka u Esauvan a lo hmuh che-a, ‘Tu mi leh sa nge i nih, khaw nge i kal dâwn? I ran khalh zozai kha tu ta nge?’ a tih che chuan,

¹⁸‘I nau Jakoba mi ka ni a, ka lalpa Esauva pêk tûr min khalhtîr a ni, amah Jakoba pawh kan hnung lawkah sâwn a lo kal,’ ti ang che,” a ti a.

¹⁹Chutiang bawkin pâwl hnihna khalhtu chu a hrilh a, a pâwl dang dang pawh a hrilh vek a, “Chutiang tak chuan Esauva hnên in thlen hunah sawi ang che u.

²⁰‘I chhiahhlawh Jakoba pawh hnung lawkah sâwn a lo kal e,’ ti tel ngei ngei ang che u,” a ti a. “Thilpêktea ka tihlungawi hmasak chuan amah ka hmuh hunah mi ngaidam ngei ang,” a ti rilru a ni.

²¹A thilpêkte chu lui an khalh kai hmasa a, chumi zânah chuan Jakoba chu bûkah chuan a riak a.

²²Chumi zân chuan a tho va, a nupui pahnihte leh a chhiahhlawhnu pahnihte chu, a fa sâwm leh pakhatte nên a hruai a, Jabok lui kaiah chuan a kaipui a.

²³A kaipui hnu chuan a thil neih zawng zawng pawh a thiar kai vek a.

²⁴Jakoba chu amah chauhvin a awm ta a; khawvâr hma chu mi pakhat hian a buan a.

²⁵Jakoba chu a hneh tâk loh avângin a khêl a khawihsak a, a khêlruh chu an inbuanna lamah chuan a pelh ta a.

²⁶“Ni a chhuak dâwn, mi thlah rawh,” a ti a. Jakoba chuan, “Mal mi sâwm hma chu ka thlah lo vang che,” a ti a.

²⁷Ani chuan, “Tu nge i hming?” a ti a. “Jakoba,” a ti a.

²⁸“Jakoba an ti tawh lo vang che, Israela i ni tawh zâwk ang. Pathian leh mihring i buan a, i hneh tâk zâwk avângin,” a ti a.

²⁹Jakoba chuan, “Khawngaih takin i hming min hrilh teh,” a ti a. “Engati nge ka hming min zawh?” a ti a, mal a sâwm a, a kalsan ta a.

³⁰Jakoba chuan chumi hmun chu Peniel a vuah a, “A hmai chhanah Pathian ka hmu a; mahse, nungdamin ka la awm a nih hi,” a ti a.

³¹Peniel a kalsan chuan ni a chhuak a, a khêl avâng chuan a bai ta suih suih a.

³²Chuvângin, tûn thlengin Israela thlahte chuan khêlruh inzawmna lai tha hi an ei duh lo, Jakoba khêl tha thlung a khawihsak avângin.