Read Mizo Lushai Genesis 33 Bible Online

Genesis 33 - Mizo Lushai bible

Genesis 33

¹Jakoba chu a han dâk a, Esauva leh a mi hruai zali chu a hmu a. A fate chu an nute ṭheuh, Leaii te, Rakili te leh a hmeite bulah chuan a awmtîr a.

²A hmeite leh an fate chu an kal hmasa a, Leaii leh a fate chuan an dawt a, Rakili leh Josefa chu a hnuhnûng berah an kal a.

³Amah Jakoba chuan hma a hruai a, a u bul a thlen dâwn chuan vawi sarih lei si-a kûnin a u chu chibai a bûk a.

⁴Amah tâwk tûrin Esauva chu a lo tlân a, bek insiin an inpawm a, an infâwp a, an ṭap dûn ta a.

⁵Esauva chuan a han en vêl a, hmeichhiate leh naupangte chu a hmu a, “Hêng i mi hruaite hi tute nge ni?” a ti a. “Naupangte hi Pathianin i chhiahhlawh a khawngaih a, a pêkte an ni,” a ti a.

⁶Chhiahhlawhte chu an fate nên an lo kal a, Esauva hmaah chuan an kûn a, chibai an bûk a.

⁷Leaii leh a fate an lo kal a, a hmaah chuan an kûn a, a tâwp berah Josefa leh Rakili chu an lo kal a, an rawn kûn bawk a.

⁸Esauva chuan, “I hmaa ran i rawn khalhtîr zozai kha engtizia nge ni?” a ti a. “Min lo khawngaih theih nân ka ti a ni,” a ti a.

⁹Esauva chuan, “E, Mama, kei pawhin ka ngah asin, i ta chu nei zêl zâwk rawh,” a ti a.

¹⁰Jakoba chuan, “Ni lo ve, khawngaih takin ka thilpêk theih chhun che kha pawm hrâm teh, min lo lâwma, i hmêl ka hmu ngawt pawh hi Pathian hmu ang ka ni alâwm.

¹¹Thilpêk ka rawn kensak che hi pawm hrâm teh. Pathianin min khawngaih a, ka la ngah alâwm,” a ti a. A tih tlat avâng chuan Esauva chuan a la ta a.

¹²Esauva chuan, “Ti rawh, i kal zêl ang, hma ka han hruaisak ang che,” a ti a.

¹³Ani chuan a chhâng a, “Naupangte hi an la tê hle a, berâm leh ran dangte pawh no hruai an ni tih ka lalpa chuan i hria, ni khat pawh khalh chak lui ila an thi mai ang.

¹⁴Chuvângin, ka lalpa chuan i chhiahhlawh hi lo kal hmasaksan la, kei chu zawi awiin naupang leh ran rual zai ngaiin Seir-ah ka lo kal ve ang e,” a ti a.

¹⁵Esauva chuan, “Ka rawn kalpui, mi ṭhenkhat hi ka hnutchhiah ang che,” a ti a. Ani chuan, “Engah nge ka tihhah ang che, a ṭûlna a awm lo ve,” a ti a.

¹⁶Esauva chu Seir lam pan chuan a haw ta a.

¹⁷Jakoba chu Sukot-ah a kal a, bâwk a khawh a, a rante awmna tûr a siam bawk a. Chumi avâng chuan chu hmun hming chu ‘Sukoth’ tih a ni ta a.

¹⁸Padan-aram aṭang chuan Jakoba chu Kanan ram Sekem khua chu dam takin a lo thleng a. Chu khaw bulah chuan awmhmun a khuar a.

¹⁹Chu hmun chu tangka sekel za-in Sekema pa Hamora thlahte hnên aṭangin a lei a.

²⁰Tah chuan maichâm a siam a, a hmun hmingah chuan El-Elohe-Israel a vuah a.