Read Mizo Lushai Genesis 34 Bible Online

Genesis 34 - Mizo Lushai bible

Genesis 34

¹Leaiin Jakoba a hrinsak Dinaii chu, chu ram nulate tlawh tûrin a lêng a.

²Chu lai mite hotupa chu Hiv mi, Hamora a ni. A fapa Sekeman ani chu a lo man a, a mutpui lui a.

³Jakoba fanu Dinaii chu a ngaizâwng êm êm a, tihlâwm a tum ta a.

⁴Sekema chuan a pa hnênah, “Nula hi mi neihsak rawh,” a ti ta tlut tlut a.

⁵Jakoba chuan a fanu Dinaii chu Sekeman a lo tibawrhbâng tih a lo hria a, a fate kha ramhnuaiah ran rual nên an awm lai a ni a; an lo haw hma chu a ngawi mai a.

⁶Jakoba fanu dîl tûr chuan Sekema pa Hamora chu a lo kal a.

⁷Chutih lai chuan Jakoba fate chu ram aṭangin an lo haw a, chanchin an han hriat chuan an so sa phut a, an thin a ur ta êm êm a. Sekeman Jakoba fanu a lo pâwngsual mai chu Israel-te zîngah tih thiang lo a ni a, ngawihpui mai mai chi a ni lo.

⁸Hamora chuan an hnênah, “Ka fapa Sekema chuan in fanu hi duh tak têin a duh tlat a ni. Khawngaih takin neihtîr hrâm teh u.

⁹Inneih pawlh ila a ṭha ang. In fanute min neihtîr ula, kan fanute nei bawk ang che u.

¹⁰Tichuan, kan awm ho thei ang a, in duhna lai laiah in awm thei ang a, in duh angin in khawsa ang a, rante in nei thei dâwn nia,” a ti a.

¹¹Nula pa leh a nuṭate hnênah Sekema chuan, “Min khawngaih teh u, in phût ang ang ka ti ang e.

¹²A man chu eng zât pawh min dîl ula, ka pe zêl ang che u, min neihtîr hrâm teh u,” a ti a.

¹³Jakoba fate chuan an farnu a tihbawrhbân avâng chuan Sekema leh a pa chu fing takin an chhâng a.

¹⁴“Kan remti thei lo; serh tan loh kan farnu kan neihtîr chuan kan tan thil zahthlâk a ni ang.

¹⁵Keimahni anga mipa zawng zawng serh in tan ve vek erawh chuan kan neihtîr thei ang che u.

¹⁶Tichuan, kan fanute in nei thei ang a, in fanute kan nei thei bawk ang a, in zîngah awmin laichîn unau kan ni thei ang.

¹⁷Serh in tan duh loh chuan kan farnu chu kan hruai ang a, kan kal daih ang,” an ti a.

¹⁸Hamora leh a fapa chuan an thil phût chu âwm an ti hle a.

¹⁹Jakoba fanu chu a duh êm kher a, tlangvâl chuan an thu chu a bawh zui ta chung chung a; a chipuite chuan ani chu an ngaisâng hle a ni.

²⁰Hamora leh a fapa Sekema chu kulh kawngkaa khaw hotute hnênah chuan an kal a, an khaw mite hnênah chuan,

²¹“Hêngho hi nêlawm tak an ni. Ram hi kan thâwl bawk a, awm ve sela, an duh duhin sumdâwng teh se. An fanute nupuiah kan nei ang a, kan fanute pawh nupuiah nei ve rawh se.

²²Hêng mite hian kan zînga awmin laichîn unau kan nih theih nân thil pakhat chauh an tih anga kan mipa zawng zawng serh tan an phût tlat a ni.

²³An ran neih zozai, an sum leh pai, an sate nên hian kan ta a ni mai dâwn asin. Kan zînga an awm ve duh nân an phût ang chu i ti mai ang u,” an ti a.

²⁴Hamora leh a fapa Sekema thu chu mi pangngai chin chuan rem an ti a, an zînga mipa pangngai chin chuan serh an tan ta vek a.

²⁵A ni thum ni, a nat zual lai tak chuan Dinaii nuṭa Simeona leh Levia, Jakoba fapa pahnih chuan an khandaih an keng a, tu ma lo dan lohvin khuaah chuan an lût a, mipa zawng zawng chu an râwt ta vek a.

²⁶Hamora leh a fapa Sekema pawh an sât hlum a, Sekema in aṭang chuan Dinaii chu an la chhuak a, an hâwn ta a.

²⁷Jakoba fa dangte chuan an mi thahte an va hmuh chuan khua chu an suam ta a, an farnu tihbawrhbân man phuba an la a.

²⁸An berâm te, bâwng te, sabengtung te, khaw chhûng leh pâwna an thil neih zawng zawng,

²⁹an sum leh pai zawng zawng chu, an fate leh an nupuite nên an man a, an in chhûnga awm zawng zawng pawh an lâksak a.

³⁰Jakoba chuan Simeona leh Levia hnênah, “He rama chêng Kanan mite leh Periz mite tana hnawksakah min siam a, mi timangang hle a ni. Kan tlêm si a, min rawn bei sela kan mi zawng zawngte nên hian min nuai bo ang asin,” a ti a.

³¹Anni chuan, “Kan farnu hi mihur anga lo sawisak tûr em ni?” tiin an chhâng a.