Read Mizo Lushai Genesis 35 Bible Online

Genesis 35 - Mizo Lushai bible

Genesis 35

¹Pathianin Jakoba hnênah, “Bethel-ah kal la, han awm rawh. I u Esauva i tlânbosan laia i hnêna inlâr Pathian kha maichâm siamsak ang che,” a ti a.

²Jakoba chuan a chhûngte leh an zînga awm zawng zawng chu a hrilh a. “Pathian dang lim in kawlte chu paih bo rawh u. Inthian thianghlim ula, silhfên thar inbel ang che u.

³Bethel-ah kan kal dâwn a, ka mangan laia min ngaihventu Pathian tân maichâm ka siam dâwn a ni; ani chuan ka kalna apiangah min awmpui ṭhîn,” a ti a.

⁴An zînga pathian dang lim awm zawng zawng chu Jakoba an pe a, an bengbehte pawh an pe a; Sekem sasaw thing hnuaiah an phûm a.

⁵An chhuak ta a, chûng lai hmuna awmte chu hlauhna nasa takin a man a, Jakoba hote chu an ûmzui ngam lo.

⁶Jakoba chuan Kanan ram Luz khua tih ṭhin Bethel chu a mite nên chuan an thleng ta a.

⁷Tah chuan maichâm a siam a, a u a tlân bosan laia chumi hmuna a hnêna Pathian a rawn inlâr avângin chu hmun chu El-bethel a vuah a.

⁸Tin, Rakili awmtu Debori chu a thi a, Bethel chuan hnuai sasaw bulah an phûm a, chu hmun chu Alon-bakut an vuah a.

⁹Padan-aram aṭanga Jakoba a lo hâwn khân a hnênah Pathian a inlâr a, mal a sâwm a.

¹⁰Pathian chuan a hnênah: “I hming Jakoba a ni a, Jakoba ka ti tawh lo vang che, I hming chu Israela a ni tawh ang,” a ti a. Chuvângin, Israela tih a ni ta a.

¹¹Pathian chuan a hnênah: “El-Sadaia ka ni, I chi ṭha sela, pung duah duah ang che, Hnam, pung khâwm tih tham zet I thlah dâwn a ni. I ṭhâlbe aṭang tein lalte an lo chhuak ang.

¹²Abrahama leh Isaka ka pêk ram chu Tûnah ka pe a che, I thlah lo la awm tûrte tân He ram hi ka pe che a ni,” a ti a.

¹³A biakna hmun ata chu Pathian chuan a kalsan a.

¹⁴Jakoba chuan Pathianin a biakna hmunah chuan lung a phun a, inthawina uain a bun a, hriak a leih a.

¹⁵Pathianin a rawn biakna hmun chu Jakoba chuan Bethel a vuah a.

¹⁶Bethel aṭang chuan an chhuak a, Efratha khaw thlen hma deuh chuan Rakili chuan nau a vei a, a na hle a.

¹⁷A nau vei nat vânglai chuan nau chhartu chuan, “Thlaphâng suh, fapa i nei leh dâwn e,” a ti a.

¹⁸A thi a ni ta mai a, a ṭawng hnuhnûngah a fa hmingah chuan Benoni a ti a. A pa erawh chuan a hmingah Benjamina a sa a.

¹⁹Rakili chu a thi ta a, Efratha khaw kawngah chuan an phûm a, Efratha chu Bethlehem an tih tâk hi a ni.

²⁰A thlânah chuan Jakoban hriatrengna lung a phun a, chu chu tûn thlengin Rakili thlânah chuan a la awm a ni.

²¹Israela chu a kal zêl a, Mig-dal-eder piahah bûk a khuar a,

²²heta a awm lai hian Reubenan a pa hmei Bilhaii a lo mutpui a, Israela chuan chu chu a hria. Jakoba chuan fapa sâwm leh pahnih a nei a.

²³Leaii hrinte: Jakoba fa u ber chu Reubena a ni a; a dawttu chu Simona te, Levia te, Juda te, Isakara leh Zebuluna te an ni.

²⁴Rakili hrinte: Josefa leh Benjamina.

²⁵Rakili bawih Bilhaii hrinte: Dana leh Naftalia.

²⁶Leaii bawih Zilpaii hrinte: Gada leh Asera. Khîng khi Jakoba fa, Padan-aram-a a awm laia piangte chu an ni.

²⁷Kiriat-arba, Hebron an tih tâk rama Mamre khua, a pa Isaka awmna chu, Jakoba chuan a thleng ta a. Chu hmun chu a ni Abrahama leh Isaka mikhualna hmun chu.

²⁸Isaka chu kum za leh sawmriata upa a ni a.

²⁹A hnuk a chat a, tarkûn khûp bihin a thi ta a; a laichînte hnênah hruai a ni a. A fapa Esauva leh Jakoba chuan an phûm a.